دق الدلجة محمد عبد الماجد جوليام وجونيور – لو استمريتوا بي طريقتكم دي بتجيبوا (نيمار) عندنا في الحلة زول صعب. طبعا اي ناس حرة في حلتها. وحرة في صعوبيتها. يعني الزول يصعب الموضوع زي ما عاوز – ما في زول بقدر يقول لينا حاجة. نحن قاعدين نسألكم في البنزين. قاعدين نسألكم في الرسوم. في الرغيف. في المواصلات. في الغاز. قاعدين نسألكم في القطوعات. طيب مالكم؟. نصعبها زي ما عاوزين. عندنا زول صعب شديد في الحلة. الزول دا لمن يجيبوا ليه (الليمون) – لو ما كان (مسيخ سكر) ما بشربو. ولا بمشي على خشمو. ما عارف علاقة مساخة سكر الليمون بالصعوبة شنو؟. ما تسألوني. انا لو عارف – ما بقعد ليكم في البلد دي. المهم الزول دا صعب وخلاص. جنكم اسئلة متل شفع سنة رابعة. زمان نحن كانوا وقت يقولوا لينا الامتحانات شهر اكتوبر.. كنا بنقول للاستاذ ..طيب يا استاذ بتعلقو (جدول الامتحانات) متين؟. زي كأنو المشكلة كلها في تعليق الجدول. ما عارف علاقة تعليق جدول الامتحانات بالموضوع دا شنو؟. ما عارف. الشيء البعرفو اننا كنا بنسأل من تعليق جدول الامتحانات. ولمن يعلقوا الجدول – الحديث بنتهي. ولا كلمة. البشوفنا بنسأل عن الجدول بقول بقفلوا الرياضيات. المهم عندنا زول صعب في الحلة ..الشاي لو ما جابوه ليه من نارو – ما بشربو. ولا بمشي عليه. ولا بجامل في الحاجات دي. بقول ليك شايل (الشاي) دا ورجعو من محل ما جبتو. زول صعب. وما بتفاهم. نحن حسب فهمنا في الوقت داك – كنا بنفتكر الموضوع دا موضوع (صعوبة). عشان كدا لمن نكون عاوزين نصعبها ..بنرّجع الشاي. ما بنشربو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس يوم داك لاقت لي (جزائريين) في الشارع – قلت ليهم انتوا المريخ وقع معاكم في مجموعة واحدة. قالوا لي : والله نحن المريخ دا عندنا زي (الحلو) البجيبوه لينا بعد (الغداء). المريخ ح يحلوا بيه الجزائريين. زي الفواكه. قالوا ليك بعد مجموعة الجزائر دي ..نص لاعبي المريخ طالب بالاعارة لهلال الابيض. سعيد السعودي قال ليهم – ولا برجع ولا حاجة. خلوني في شندي دي. زولنا الصعب داك ..الكلمتكم عنو في بداية العمود ..كان وقت تجي مطرة بقول للاولاد ..يا ولاد في (باسطة) في التلاجة …امشوا احفروا الخور للمطرة وطلعوا الموية من الحوش …وامشوا بعد كدا اضربوا (الباسطة) الفي التلاجة. المطرة ما تفوت ليها (40) دقيقة من نزولها – إلّا وتسمع بي الصالون جاء واقع. عمك بيطلع من جوة ويكورك للاولاد ويقول ليهم انتوا انا موش رسلتكم …عملتوا شنو في الشغلة الرسلتكم ليها؟. بقولوا ليها : اكلنا (الباسطة) يا عمنا. عمك بقول ليهم والله ما قصرتو – اكل (الباسطة) في المطرة دي ما بقدر ليه زول ساهل. زول ما عندو ضهر. بعد شهر ..عمك تاني بطلع. بيلم الاولاد من اول وجديد ..وبقول ليهم في (باسطة) في التلاجة وفي (حيطة) وقعت في الحوش الكبير – عاوزكم تبنوها ..وتضربوا الباسطة. الاولاد يدخلوا على الحوش. عمك بيجيهم بعد اسبوع – يلقى ليك (الحيطة) في مكانها..(طوبة) ما عملوها فيها. بقوم يقول ليهم انتوا يا ولاد عملتوا شنو في الاسبوع الخليتكم فيه دا؟. بقولوا ليه : اكلنا (الباسطة) يا عمنا. عمك بقول ليهم اصلو ما قصرتو …(الباسطة) ما بياكلها زول هوّين…الله يديكم العافية. عمك تاني بيظهر. بيلاقى ليك ولدو الكبير. بقعد معاه. وبقول ليه يا ولدي انا ما ح اعيش اكتر من العيشتو في الدنيا دي. انا ح اعيش ليك لي متين يعني؟. يا ولدي لو عاوزني ارتاح في قبرى البدفنوني فيه – عاوزك تعرس بنت عمك في العيد ..وتضرب (الباسطة) الخليتها ليكم في التلاجة. بيجي العيد. ويفوت. وعمك بلاقى ولدو في خشم الباب – بقول ليها اها يا ولدي العيد فات…عملت شنو في الوصية الخليتها ليك؟. الولد بقول ليه : اكلت (الباسطة) يا حاج. عمك بقول ليه : تب ما قصرت. عداك العيب. قطعت نص المشوار. وعمك بلاقى ولد الجيران. بقول ليه يا ولدي نحن كبرنا. النظر ضعف. والسمع تقل. والضهر اتكسر. يا ولدي لازم تبقى لينا طبيب. لازم تبقى لينا دكتور – عشان تريّح اعمامك ديل شوية. لكن قبل ما تبقى دكتور في (باسطة) في التلاجة امشي اضربها. عمك بعد ست سنوات بلاقى ولد الجيران. بقوم يسألو. ويقول ليه : اها يا ولدي ان شاءالله خير – عملت شنو في الموضوع؟. الولد بقول ليه : اكلت الباسطة. عمك بقول ليه ان شاءالله تنفعك. ما قصرت. قسمت نصف المشوار. عمك ..بعد ما خلاص يبقى على الموت. وهو بين الحياة والموت. في السكرات الاخيرة. بقولوا ليه يا حاج ..تفتكر مشكلتك كانت شنو في الحياة دي؟. بقول ليهم مشكلتي كانت (الباسطة). بجيب ليهم الباسطة في التلاجة – بركزوا على (الباسطة) ..وبنسوا الموضوع. زولكم وهو في الحالة دي..ولدو جاهو جاري من برة. جا منهار. حالتو كعبة. ابوهم بقول ليهم اطلعوا لي من الغرفة – عاوز اتكلم مع ولدي شوية. عاوز اقعد مع ولدي براي. الجماعة بطلعوا من الغرفة. عمكم اول ما يطلعوا ليه من الغرفة بقول لي ولدو ..لو جاتني حاجة والايام تمت …اعملوا لي (سبيل موية) في الحلة واضربوا (الباسطة) الخليتها ليكم في التلاجة. عمك يقول كلامو دا ويموت. النسوان يطقن الكواريك. بعد سنة ونص من الكلام دا ..عمك يجي لي ولدو الكبير في المنام – ويقول ليه اها عملت شنو في (الوصية) الخليتها ليكم؟. الولد بقول ليه : اكلني الباسطة يا حاج. يقول ليه كلامو دا – ويقوم مخلوع من نومو. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بس (الباسطة) البتكلم ليكم عنها دي ما تهملوها. فيها (فهم) تاني. هسع واحد من المريخاب …قالوا ليك دخلتوا (خلعة). جاتو صدمة. قال ان شاءالله التسجيلات تنتهي الليلة قبل بكرة. قلنا ليه كيف الكلام دا. قال لينا ناس الهلال ديل جابوا ليهم مهاجم من البرازيل اسمو (جوليام) القون عندو اسهل من (السلام عليكم). قلنا ما مشكلة. مهاجم ..وبنستحمله. صبرنا شوية ..قاموا جابوا لينا من البرازيل صانع العاب اسمو (جونيور)..الصناعة عندو زي (التسالي). قلنا ليهم خلاص طقوه لينا عين. عاوزين تنشوفه لينا. قالوا ليك صانع الالعاب من (جديتو)..جاء بي اولاده. ما بلعب. المريخابي شاف الطيارات تشيل وتنقل في البرازيلين ..قال ناس الهلال ديل لو ادوهم (48) ساعة اضافية في التسجيلات بيجيبوا (نيمار). الجماعة ديل لو مشوا بي طريقتهم دي بيجيبوا (نيمار). ديل لو لقوا ليهم جنسية اضافية ..بنشفوا ريقنا. نيمار دا لو ما عندو نهائي دوري ابطال اوروبا. الكاردينال كان جابو الهلال. بس مسجل في قائمة برشلونة..في كاس العالم للاندية – يعني لو جبناه ما بنستفيد منو اي حاجة. إلّا في الدوري المحلي. والدوري المحلي دا ناس (وليد الشعلة) بيقوموا بالواجب. ………….. و بكرة اخر يوم في التسجيلات. ان شاءالله مساعي الهلال كلها تكتمل. وان شاءالله ناس المريخ يقعدوا ينظروا كدا لي ديسمبر. عنبكة مسكين. راحت عليكم. كمان قالوا ليك الابيض فيها جنس خريف. غايتو زي حقارة غارزيتو دا اصلو ما شفت. الله يستر على عبده جابر. تراوري يعمل اي حاجة ..ويقعد في الكشف. الباشا وين؟. لا شطيوه لا اعاروه. بس قاعد كدا. …….. السيدة (ل) خلينا نفترق بي اختيارنا – يمكن الظروف تقصد تعاندنا تقوم تجمعنا تاني. وقرّض على كدا.