محمد الطيب الأمين مرات تحس بالموضوع مغارز مغارز كده !! * مرات بحس إنو الفاضل أبو شنب (بيكاوي) في الهلال . * والله صحي . * تحس بالموضوع (مغارز مغارز كده) . * زي المطاعنات الكانت مدورة بين (الدولية والجبلية) . * الفاضل أبو شنب ربما هو يستمتع بالنقد . * أو هو يحب أن يكون علي كل لسان حتي لو لم تكن سيرته بالحق . * والغريب (المغارز) دي ما بعملها للمريخاب . * لأنو عارف المريخاب الشوية . * أبو شنب أمبارح احتسب ركلة جزاء أنا لحدي اللحظة الأخيرة فاكر الموضوع كاميرا خفية . * قلت الزول ده بهظر . * اتوقعت إنو قانون التحكيم الجديد يكون فيهو (كاميرا خفية) . * لكن لقيتو جادي . * طلع الموضوع جد جد . * في وجود أبو شنب لن يتأثر المريخ بغياب سيف تيري . * هو في تيري أكتر من الفاضل ؟ * المريخ بدل يطلب تأجيل القمة كان يطالب بالفاضل حكم للقمة . * الخوف لشنو ؟ * المعاهو (القاضي) ما بخاف . * المشكلة خوف ومعاهو كضب كمان . * يقول ليك مدرب المنتخب طالب بالتأجيل. * مدرب المنتخب علاقتو شنو ؟ * خوف عجيب . * وكضب يحير . * يريد المريخ كسب الوقت حتي يعود تيري والتش . * فريق كامل راهن نفسو للاعب واحد . * سيف تيري ده لو جاهو عقد احتراف بتنسحبوا ولا كيف ؟ * مجلس الهلال عليه أن يتناسى الخلافات ويتبنى التصعيد الذي يقوده الطاهر يونس . * رئيس الإتحاد كمال شداد بعضمة لسانه قال أن مدرب المنتخب يعرف حدود عمله ولا يمكنه أن يطالب بتأجيل مباراة. * ده كلام شداد ذاتو . * تأجيل القمة طبخة تمت بين الفاتح باني والمريخ. * وسبب التأجيل هو الخوف . * واوع تقول لي : آخر قمة أنا غالبك ولا ما غالبك . * بطل الفصاحة وتعال لينا يوم الجمعة . * الكلام الكتير ما حبابو . * الخوف قاطع قلبكم . * خوف من الغربال. * والشعلة . * وأبو عشرين . * وما تقول لي بي أبو عشرين غلبتك . * تعال يوم الجمعة وورينا شطارتك . * الهلال يجب أن يتخذ موقف قوي حيال هذا التلاعب . * واضح إنو لجنة الفاتح باني تعمل بقوة من أجل أن يحقق المريخ اللقب . * بيدفروا في المريخ دفر . * أمبارح المريخ أكمل المباراة بدون لاعب السنية . * طلع الجزولي ودخل بكري . * الفاتح باني ممكن يقنعنا إنو بكري قدر الجزولي . * زي ما الفاضل أبو شنب ممكن يقنعك إنو (ضربة المرمي هي ركلة جزاء) . * الرومانسية التي تتعامل بها لجنة التطبيع مع الإتحاد العام ما بتنفع معانا . * ما عشان شداد جابك يا السوباط تقعد تتمسكن ليهو كده . * العين الحمراء مهمة . * والخط الماشي فيهو الطاهر يونس هو الخط السليم . * رومانسيتكم دي بضيع حق الهلال . * ولجان الإتحاد دي لو رخيتو ليها عادي ممكن تتوج المريخ بدون ما يلعب. * المهم . * أول ما يقولوا ليك المريخ غلب طوالي أعرف إنو سوداكال ما زال هو الرئيس. * لحدي أمبارح قبل الكورة أنا كنت فاكر الرئيس هو العندو . * لكن بعد فوز المريخ عرفت إنو سوداكال مسيطر. * بخور تقيل . * بخور وأبو شنب وغايتو اموركم ماشة . * وغايتو جنس غايتو . * و..و.. * واصلا ما براك سامعلك ….. (صوت جري) .
