محمد الطيب الأمين الخرطوم الوطني بشيخو وسوداكال بمحايتو!!
* هل تفتكر دي صدفة؟ * هل ولا ما هل؟ * تتعادل أمام أهلي شندي في أول مباراة بعد ذهاب سوداكال. * ثم تتعادل أمام الخرطوم الوطني في ثاني مباراة بعد ذهاب سوداكال. * دي صدفة ولا حاجة مقصودة؟ * لو صدفة هل الصدفة ممكن تتكرر في ظرف أسبوع مرتين؟ والمرتين بعد ذهاب سوداكال مباشرة؟ * لو افترضنا إنها حاجة مقصودة هل هي مقصودة من سوداكال ولا من اللاعبين ولا من (شيخو)؟ * وشيخو ذاتو (شيخين). * والشيوخ خشم بيوت. * في شيخ كورة زي شيخو (بيسجل وبيصنع). * وفي شيخ (بخور) من بره الملعب وبرضو (بيسجل وبيصنع). * وشيخو البره الملعب ده هو الذي سيهبط بالمريخ إلى الدرجة الأولى. * ما عندكم سكة إلا تقولوا لسوداكال (أرجع تعال). * أرجع تعال عود ليا ورجع حنانك ليا. * وخليني في جواك وشدد حراسة عليا. * كنتوا ماشين في أمان الله متصدرين وما عندكم عوجة. * سمعتوا كلام اعلامكم السالب أو كما قال (الكوز) جمال الوالي الشهير ب(عزو). * سمعتوا كلام الإعلام السالب وقلتوا ما دايرين سوداكال. * مع إنو سوداكال أفضل رئيس مر علي المريخ. * ترضى ولا ما ترضى هو أفضل رئيس جاك. * أفضل من جمال الوالي الذي في الأساس هو (هلالابي). * هلالابي قام زرعو عمر البشير في المريخ. * وطبعاً أبو العائلة ما محسوب لأنو هلاليتو أوضح من هلالية صلاح إدريس. * براك قلت ما داير سوداكال. * قلت ولا ما قلت؟ * أي. * وقلت ليه؟ * يقول ليك لانو زول كعب. * كيف يعني كعب؟ * يقول ليك لأنو فرط في أبو عشرين. * أبو عشرين ب(الحاء)؟ * طيب يا الفالح امبارح رمضان عجب لعب ولا ما لعب؟ * محمد الرشيد لعب ولا ما لعب؟ * قوم على حيلك. * فيهم واحد نفعك؟ * النافع الله. * بصمات سوداكال بدأت تظهر الآن. * بصمات واضحة جداً. * العاجبني في سوداكال إنو ح يتفرغ ليكم بعد كده. * والله صحي. * سوداكال لما يكون في المعارضة صعب شديد. * ممكن يصرف في المعارضة أكتر من القروش الصرفها في الرئاسة. * ولسه بصمات سوداكال ح تظهر لما يطالبكم بالديون. * انت عارف ديون سوداكال كم ولا ما عارف؟ * (700) مليار. * دي المسجلة. * وهنالك ديون صغيرة صغيرة. * وتعال اناقشك. * انت فاكر دخول الحمام زي الخروج منه؟ * والله سوداكال ده يعمل فيكم عملية النجار في الخشب ما عملها. * اقعدوا (نقطوا) كده لما تلقوا أهلي مروي بقى وصيف الهلال. * سوداكال زعلان. * ليه زعلتوا (سودا)؟ * في زول بيخلي سوداكال يزعل؟ * ما بتقدروا على زعل سوداكال. * ح يكلفكم كتير. * عموماً نحن نطالب الأخ سوداكال أفضل رئيس مريخي نطالبه بضبط النفس والتعامل بحكمة. * نرجو منه عدم التصعيد. * الناس ديل كفاية عليهم شيخ الخرطوم الوطني. * وغايتو السنة دي بالذات يا متنا من الضحك ويا كمان الضحك كتلنا. * وتبكو بس .. عين قطرة وعين مس. * ونركب صافنات ونجيبة (خرطومية) واصلو الزول بيموت والذكرى تفضل حية. * و.. و.. * وبقليبك تقول لي تعال وتعال وبعيونك تقول لي …………. (المحاية) تقيلة .
