محمد الطيب الأمين تحضر مباراة لعقد الجلاد وحفلة للهلال !! * أقصى (7) أمنيات يمكن أن تتمناها هذه الأيام (5) هي : (تشيل رغيف بدون صف ، وتمشي في الأرض بدون ما تتزلق وتأكل بدون ما الذباب يأكل معاك). * دي بقت أمنياتنا. * لأنو فعلاً بقينا نشتري (كيسين) رغيف يومياً. * كيس بناكلوا إحنا وكيس بنديهو للذباب. * ومع المطر وشوارع الخرطوم (ترى الناس سكارى وما هم بسكارى ولكنه الطين). * وتشوفنا واقفين صف للرغيف تحلف تقول منتظرين (تفاح لبناني). * وبعد ده الخرطوم أول أمس استقبلت المغني المصري حسن شاكوش. * وحسن شاكوش هو أسوأ منتج فني مصري. * شاكوش أقل وزناً وقيمة من العروس عشة الجبلية. * استغرب في بلد فيها محمد عبد الرحمن الشهير ب(الغربال) و المشهور ب(لو رجعت السودان ما بلعب إلا للمريخ) ومع ذلك بتسمع حسن شاكوش. * هو في شاكوش أكتر من الغربال ده؟ * البيعمل فيهو الغربال ده أقرب للغناء. * والله صحي. * نقول ماشاء الله تبارك الله. * الهلال كلو على بعضو الايام دي متعة. * الهلال كلو غربال. * ولكن لمحمد عبد الرحمن خصوصية ونكهة. * هو براهو مسجل (26) هدف مع أن كل عدد الأهداف التي سجلها المريخ 40 أو 30 هدف. * يعني محمد براهو بيوازي (كل المريخ). * وتعال اناقشك. * الهلال لحدي الآن سجل في مرمى الخصوم (64) هدف. * ال(64) دي محمد عندو فيها (26). * المريخ كفريق سجل (40) هدف. * يعني يا مولانا تقدر تقول (محمد عبد الرحمن بالمريخ كلو). * غربال لأي زول. * لحم لأي فحم. * (26) و(40) في الزمن ده بقت حاجة واحدة. * لما تكون انت فريق كامل مسجل 40 وفي لاعب واحد مسجل 26 فهذا يعني أن (26 الفردية) تعادل ال(40 الجماعية) . * والجميل إنو قون الغربال بيجي (على الريق). * بدرررري. * ماشاء الله تبارك الله. * ربنا يحفظو ويحميه ويبعد عنه العوارض والعيون الحارة. * وتاني بنقول ماشاء الله تبارك الله. * تميز الغربال عمل شخصية هجومية واضحة للهلال. * هجوم الهلال بقى مخيف. * وده كان من أهم أسباب تأجيل مباراة القمة. * لو سألت الفاتح باني قلت ليهو : ليه مباراة القمة اتأجلت ح يقول ليك لانو هجوم الهلال مخيف. * ما في سبب غير ده. * انت شايف في سبب غير ده؟ * قوم على حيلك. * وأوع تشبكني سيف تيري وما سيف تيري. * تيري لا يلعب بدون الغربال. * البيلعب تيري هو الغربال. * والغربال نحن شلناهو بعد ما إنتو عالجتو لينا. * المهم. * الهلال هذه الأيام هو (الفرقة الجماعية) الوحيدة البتطرب في البلد دي . * الهلال حل محل عقد الجلاد. * تحضر حفلة للعقد ولا مباراة للهلال كلو واحدة. * حفلة للهلال ومباراة لعقد الجلاد. * ما بتعرف البيغني الهلال ولا عقد الجلاد. * والله صحي. * نقول ماشاء الله وتبارك الله. * بصمات ظاهرة للمدرب وبسمات ظاهرة للشعب الهلالي. * الرغبة الهجومية والحيوية التي يلعب بها الهلال تؤكد أن هنالك عمل كبير قد تم. * لا ينقص الهلال إلا ثلاثة أجانب سوبر استار ومجاهد فاروق . * نلقى اجانب زي الناس والله أفريقيا تاني تنوم من العصر. * مجلس الإدارة عليه أن يلبي كل طلبات الجهاز الفني. * لو قال داير لبن الطير جيبو ليهو. * الجو والمناخ والمحبة هي التي تصنع الفارق. * نستمتع الآن بالنجم صلاح عادل. * عبد المهيمن قال لينا صلاح عادل لاعب محور لكن الراجل طلع صانع لعب ومحور ومهاجم. * صلاح عادل هو (تلاتة لاعبين في لاعب واحد) ماشاء الله تبارك الله. * والعجب بوغبا. * ده غير ميسي وميسي التاني وفارس وبقية المطربين. * لا يفوتنا أن نشيد بفريق حي الوادي نيالا الذي يعتبر هو من أفضل فرق الدوري. * برغم الخسارة إلا أن حي الوادي قدم مباراة مميزة بالأمس. * أيضا لابد من الإشادة بفريق هلال الساحل. * هلال الساحل لعب أمس في موقف جاكسون وكسب نقطة أمام فريق تعبان اوي. * غداً ان شاء الله نكتب عن (موقف جاكسون) الذي لعب فيه هلال الساحل أمام المريخ. * ونركب صافنات ونجيبة (هلالابية) واصلو الزول بيموت والذكرى تفضل حية. * و.. و.. * غربال لأي زول.