محمد الطيب الأمين ما عرفنا وسخانة الفنانة ولا قليل أدب الذباب ؟؟ * أكتر حاجة محيراني إنو الذباب بقى يصحى بدري شديد . * بعد أربعة صباحاً مستحيل تلقى ليك ذبابة نايمة. * شكلو عندهم (تمام) الساعة (أربعة ونص). * الأيام دي الذباب قائم بأعمال (المنبه). * لو ما داير تصحى بصحيك. * والمشكلة إنو بقى يدخل في وردية البعوض. * والله صحي. * أول امبارح كان عندنا حفلة عرس بالليل الذباب في الحفلة كان أكتر من المعازيم. * شوف عيني الذباب لما الأغنية تبدأ (بتلم) حول الفنانة. * وأول ما الأغنية تنتهي كل ذبابة بترجع كرسيها. * لا عرفت وسخانة الفنانة ولا قليل أدب الذباب؟ * ولا يمكن عجبتو الأغنية؟ * وسماع اضاني (القونة) بتقول : (فهم لأي وهم وذباب لأي بعوض). * وكمان لاحظت إنو ذباب السنة دي ما زي ذباب السنوات الفاتت. * مش عمك داك أيام الثورة قال (الخميس ده ما زي باقي الخمايس) . * هسه الذباب ده ما زي باقي الذبايب. * تحس بيهو عندو شجاعة أدبية كده. * ذباب ما بخجل. * المهم. * مدرب المريخ الفرنسي غارزيتو قال في تصريح له : (هذا ليس سودان السنوات الماضية). * غارزيتو الذي درب الهلال والمريخ في السنوات الماضية عاد مجدداً لتدريب المريخ. * وحقيقة رغم إنو أنا بشم غارزيتو ده لوجه الله ، ورغم إنو هو زول سمسار وبتاع (منشطات) إلا أن تصريحه مؤلم حقاً. * مؤلم لأنه تصريح واقعي. * دائماً الزول البيطول منك لما يشوفك بديك حقيقتك. * الزول لما يغيب منك سنين ويجي عكس الزول البيشوفك يومياً. * في زول بغيب منك زمن وأول ما يشوفك بقول ليك : (ماشاء الله سمنت وعملت ليك جضيمات). * وفي نوع بيقول ليك : (يا زول ما عرفتك والله مالك ضعفت كده جاك سكري ولا شنو)؟ * يسكك كلب إن شاء الله. * غارزيتو غاب عن السودان حوالي خمس سنين وعاد. * وقد جاء تصريحه : (هذا ليس سودان السنوات الماضية). * صحيح أن غارزيتو حاول يطلع من السياسة والإقتصاد وبرر تصريحه بأن الملاعب في السودان انتهت ما عدا ملعب الهلال على حد قوله. * حاول يحصر الموضوع في الملاعب ولكن الرجل يقصد بقوله (هذا ليس سودان السنوات الماضية) يقصد كل حاجة في السودان. * يقصد شعب كامل تغيرت ملامحه. * يقصد جروح في الروح سببها فض الإعتصام. * يقصد (صحتنا النزلت) بسبب الجوع والهم . * يقصد (ونستنا) البقت كلها شكاوى وشتيمة. * يقصد أخلاقنا الفجأة بقت ضيقة . * غارزيتو شاف الخوف والحيرة في عيونا . * شاف الحُفر وسوء الزلط. * شاف الوسخ والكهرباء المافي. * شاف الذباب والرائحة الكريه في الشوارع. * شاف بلد قلقانة ومتوترة وسرحانة. * شاف فنان بغني عريان وفنانة صوتها زي صوت الستارة الشايلها الهوا. * وطبعاً أهم حاجة شاف (المريخ بنضرب من حي الوادي نيالا). * زمان كان المريخ بنضرب من الهلال بس. * لكن هسه تماشياً مع ظروف البلد بقى بنضرب من طرف. * هي رسالة لحمدوك. * يا سعادتك الحالة صعبة والشوارع وسخانة والمستشفيات تافه والبلد مخنوقة. * الدواء نار والأكل في تلتلة والقراية دايرة رأس مال والسماية دايرة حرامي عديل. * الوزراء والولاة ضعيفين والواحد بيصرح ليك تصريح زي وشو . * إنتبه للبلد من جوة فكل شئ يدعو للقلق. * الحركات والالتهابات القبلية والقتل المجاني وتسعة طويلة. * اضبطوا البلد واضبطوا السوق وخلونا نمشي خطوة لقدام . * ونركب صافنات ونجيبة (سودانية) واصلو الزول بيموت والذكرى تفضل حية. * و.. و.. * وإنتِ ما إنتِ الزمان اصلي ما مصدق عينيا ……… (قاعدة تشربي مديدة ولا شنو)؟