* المعلوم اننا في السودان نتعامل بسذاجه كبيرة مع الامور * والمشكلة الكبيرة انو الادارات تعتقد ان الجمهور عبارة عن اناس بسطاء يمكنك ان تخدعهم الف مرة في العام * قبل فترة بسيطة كان غارزيتو افضل مدرب قدم للمريخ وتحدث عنه اداريو المريخ حديثا لم يتحدثوه عن مدرب من قبل وقالوا ان من اوصل المريخ لدور الاربعة هو غارزيتو * والآن تحول غارزيتو من افضل مدرب الى اسوأ مدرب بل ذهب اداريو المريخ الى ابعد من ذلك وامس الاول قال حاتم عبد الغفار انهم تعاملوا مع خواجات ولم يعهدوا فيهم الكذب * يعني المعني الواضح والصريح انو غارزيتو ( كذاب ) * غارزيتو ما كذاب لكن زول واضح وواضح شديد * وفي البلد دي الواضح مابنفع * والواضح في المريخ فاضح * غارزيتو قبل فترة قال انو ماعارف محسن سيد وصل كيف لما يدرب منتخب السودان , وقال انو المنتخب بخسر عشان بدربو محسن * الكلام دا يمكن يكون صاح * انا شخصيا من غارزيتو اختلف مع محسن عرفت غارزيتو مابقعد في المريخ * محسن طبعا سرو باتع * وغارزيتو زول صعب وراسو قوي * نحن في السودان دايرين زول مسكين واضينه ودي عن غارزيتو مابتتلقي * بعدين غارزيتو كتر المحلبية شوية * لانو هاجم الوالي وقال انو سبب الخروج الافريقي * عرفتو كيف كتر المحلبية ؟ * الوالي قاعد في المريخ ( 13 ) سنة ماجاب غير تلاتة كاسات ممتاز وبرضو قاعد ومافي زول انتقدو تجي نت ياخواجه تنتقد الوالي * ياغارزيتو شوف ليك بلد هجوم الوالي دا يوم واحد تاني مابتقعد في البلد دي * ناس حاتم عبد الغفار ديل لو حمرته لي الوالي ساي بشاكلوك خلي تهاجمو * غارزيتو بي شخصيتو القوية قالوا كنا بنخت ليهو التشكيله * طيب ياحاتم وكت انتو بتختوا التشكيلة لي غارزيتو خسارة الدولار في شنو * الدولار الولع نار دا * احسن تدوها لي محسن وتختوا ليهو التشكيلة * ياغارزيتو سلم علي الاولاد وناس فرنسا وبرج ايفل عليك الله وبلغن تعازينا في فقداء التفجيرات * مع السلامه .. ( 2 ) * ونسي دا رئيس محظوظ جاء شهرين بس وقاد المريخ في تلات كور واحدة لعبوها واتغلبوا فيها تلاتة وتلاتة كور المريخ يجي الميدان وما يلقى زول ومع كدا حقق بطولتين . للمعلومية ماحققه ونسي في شهرين حققه الوالي في ست سنوات * الوالي يدفع دم قلبو ومابحقق بطولة وونسي قاعد في مكتبو وغالبو يسجل لاعبين وبعد تعب جدد لراجي ومع كدا يحقق بطولة * والله الامور دي قسم بس ( 3 ) * الايام دي ارتحنا من التصريحات الكتيرة للكاردينال * لكن بيني وبينكم ماعارف السبب شنو * ياربي يكون الكاردينال مافيش واللا الحاصل شنو * الكاردينال كان كل يومين بتكلم في الرياضية هسا ماظاهر كلو كلو * يكون الحاصل شنو * الله يتم لينا الجوهرة على خير * انا غايتو متوقع بعد هزيمتنا الكبيرة في قضية الاتحاد نشوف وهمه جديدة الايام دي * ان شاء الله سادومبا ( 4 ) * اخونا سلك الوصية بالمهلة * انت زول زميلنا وعلاقتك كويسة مع الوالي * انا قاصد الوالي بتاع الخرطوم ماواليكم الزمان * عليك الله كلمو قوليهو ناس بحري دايرين يشيلوا القمامة بتاعتن ويودوهو الحاج يوسف * والحاج يوسف بدون وسخ بحري الفيها مكفيها * وبالمرة كلمو عشان يكلم معتمد شرق النيل يصحى شوية