محمد الطيب الأمين كلو القلوب قالت (ااااح) !! * أي مريخابي امبارح شاف قون سيف تيري قال (ااااح). * من الوجع قالوا ااااح . * ونحن من الفرحة قلنا يا الله . * سبحان الله المريخاب زمان سيف تيري عندهم زي (جنا الحشا) وهسه بقي ليهم (حارق حشا) . * قون تيري هز قلوب المريخاب قبل ما يهز شبكة غينيا. * في زول عاقل بخلي لاعب زي ده يمشي الدوري المصري وبالمجان؟ * سيف تيري بعد مشاركته بجانب ياسر مزمل وبوغبا احدثوا نقلة حقيقة في شكل ومضمون المنتخب. * هجوم كاسح وأداء أكثر من جيد لصقور الجديان. * تيري يعرف التألق في حضرة الغربال . * يا السوباط ما تحرم قلوب قصتهم فريدة وقصة حبهم ياخ في الملعب شديدة . * وعليك الله ما تقول ليهو لا . * وافق عليهو وأنا راضي بيهو وعليك الله ما تقول ليهو لا . * وأنا ما بفسر وأنت ما تقصر . * المهم .. رغم أخطاء التشكيلة إلا أن ما قدمه المنتخب اسعدنا. * نصر الدين الشغيل لعب واحدة من أجمل مبارياته. * الشغيل في كل يوم بأكد الكبير كبير . * لعب المنتخب في المغرب والمباراة محدد لها أم درمان . * الله يجازي الكان سبب . * الكاف حرمنا من ملاعبنا لأننا ناس مواهيم ساكت . * وبالمناسبة. * أول ما صدر قرار من (الكاف) بحرمان الفرق السودانية من اللعب داخل السودان ، إجتمع مجلس الهلال. * اجتمعوا وقرروا إنو يلعبوا في السودان. * في الوقت الفكروا فيهو ناس برقو في القاهرة كملعب بديل للمنتخب كان الهلال يفكر في استادو. * لما ناس برقو ببكوا وبيقولوا : المصريين بالغوا معانا ، كان الهلال قد بدأ العمل. * برقو قرب يغني : (ما اتوقعتها وبالجد منصدم). * البصدمك شنو يا مولانا؟ * قال المصريين رفضوا يستضيفونا. * بحقهم خليهم يرفضوا. * أنت عندك تسعة استادات ما قادر تجهز إستاد واحد زي الناس عشان المنتخب يلعب فيهو؟ * دولارات (فيفا) ودولارات (كاف) ما قادر تجهز ليك ملعب واحد؟ * علاقات مع الأمارات وقطر ما قادر تستثمرها في التأهيل؟ * برقو خلي ، ناس المريخ ما فكروا أساساً. * مرة يقولوا ح يلعبوا في ملعب السويس ومرة يقولوا في المغرب. * والله دولة المغرب شقاوتها شقاوة. * ح يعذبوا المغاربة ديل عذاب والله. * الهلال ولأنه مُختلف فكر في استادو. * وبدأ العمل الذي مازال متواصل (بالنهار وبالليل). * الناس صاحية وشغالة. * ركبوا الكراسي وعملوا توسعة للغرف وغيروا بنك البدلاء ومقصورة الإعلام وشغالين في النجيلة على أجمل ما يكون. * ماشاء الله تبارك الله. * ده الفرق بين الزول الإيجابي والزول السلبي. * الإيجابية هي الخلت الهلال يفكر في إكمال نواقص ملعبه. * والسلبية هي الخلت برقو وناس المريخ يفتشوا دول الجوار. * بدل ما يجوا يقيفوا مع الهلال ويساعدونا إن شاء الله بالموية الباردة جروا يفتشوا بره. * كان تساهموا مع الهلال بالكلمة الطيبة عشان استادنا هو الأقرب وهو الأنسب. * بكرة (الكاف) يوافق على ملعبنا يجيك محمد سيد أحمد الجاكومي (كاتل ضلو) ويقول ليك دايرين نلعب هنا. * والله أنا لو علي اصلو ما تخلو المريخ يلعب هنا. * مش إستاد الهلال كان سبب في إصابة التش؟ * أوكي .. امشوا ألعبوا في إثيوبيا. * طبعاً المريخ عشان يأهل استادو ويحصل على موافقة الكاف داير ليهو إستاد من أول جديد. * الكاف قال تكملت النواقص لكن استادكم ده ما بتعرفو إستاد إلا يقولوا ليك ده إستاد. * كلو نواقص. * والعجب النجيلة. * نجيلة بتصيب (البصر) بالأذى ناهيك عن إصابتها للاعب. * نجيلة في عينك بتعمل ليك رباط صليبي. * رباط صليبي في النظر. * وتبكوا بس .. عين قطرة وين مس. * تنويه .. (اليوم ستقوم قناتي على اليوتيوب ببث حوار كابتن الهلال السابق محمد أحمد بشة الذي ذكر من خلاله إفادات ساخنة). * أرجو من الأصدقاء متابعة الحوار والاشتراك في القناة. * للاشتراك .. تدخل اليوتيوب تكتب قناة (دقايق) تعمل اشتراك وأكون شاكر ليك. * بث الحوار ح يكون الساعة (12) ظهراً إن شاء الله. * و.. و.. * والحمدلله على نعمة الإسلام والهلال والموية الباردة.
