محمد الطيب الأمين العندو الغربال وياسر ما بهددو بالكديسة البرتقالية ! * كل الدول في العالم اتغيرت ما عدا نيجيريا. * نيجيريا هي نيجيريا قبل سنين طويلة. * تعتمد على (اللعب خارج الملعب) عشان تحقق من خلاله نتائج داخل الملعب. * وهو سلوك غير رياضي وقد تجاوزه الزمن. * حكاية إنك تأخر إجراءات الفريق الزائر بالمطار وترش الملعب وتقطع الكهرباء وتعمل إزعاج في الفندق وتضبح كديسة برتقالية. * دي أساليب تجاوزها العالم ولكن ما تزال الفرق في نيجيريا تعتمد عليها. * وما بتجيب نتيجة. * ولا بتنفع. * الحاجات الزي دي لو بتنفع كان نفعت المريخ. * قبل كده المريخ جاهو فريق من بره (ما بتذكر اسمو شنو). * ناس المريخ حجزو للفريق ده فندق في الصحافة. * الفريق عشان يصل ملعب المريخ اخد ليهو ساعتين ونص. * وفي النهاية غلبوا المريخ زي الما حصل شي. * الحرب النفسية ما بتمشي إلا في الفرق الضعيفة نفسياً . * لما تكون أنت (هش) ممكن الخزعبلات دي تأثر معاك. * لكن الحمدلله الهلال ما عندو مشكلة في الحاجات دي. * العندو الغربال وياسر مزمل ما بحاربهو بتلاتة ساعات إنتظار في المطار. * غربال لأي زول. * البعثة الإدارية بقيادة رامي كمال يجب أن تضرب على هذا الوتر. * الزول البعمل ليك حرب نفسية معناها خايف منك. * خايف منك لدرجة إنو بحاربك بطرق غير مشروعة. * ونحن علينا أن نستغل خوفهم هذا على النحو الأمثل. * هم عارفين حجم وقيمة الهلال عشان كده بعملوا الحركات دي. * اصلو ما في مشكلة .. هم عملوا حرب نفسية خارج الملعب ونحن نعمل ليهم حرب نفسية داخل الملعب. * والفيهو طيب بنشم. * لما تصدق (الأوهام) بتمشي فيك. * بتذكر المريخ في عهد جمال الوالي سافر الكنغو لمواجهة مازيمبي. * وهم سامعين إنو مازيمبي بلعب خارج الملعب وبعمل حاجات ما كويسة. * قام جمال الوالي أجر طيارة خاصة للبعثة. * الطيارة بخلاف اللاعبين والجهاز الإداري والفني كان فيها (عشرة بودي قارد) و(أربعة طباخين) وعدد (2 فنيين لفحص الهوا). * والله صحي. * الكلام ده ما كذب ولا خيال .. موجود في الأرشيف. * عشرة بودي قارد قالوا عشان يحموا البعثة ويستعرضوا (عضلاتهم). * أربعة طباخين .. قالوا عشان يعملوا ليهم الأكل لأنو مازيمبي ممكن يدس السم في الدسم. * واتنين فنيين لفحص هوا المكيف. * قالوا مازيمبي بيضع مخدر في المكيف. * ومازيمبي عليك أمان الله ما شغال بيهم الشغلة. * الحاجات دي كلها ممكن مازيمبي يعملها لكن قطع شك ما بعملها مع المريخ. * المريخ كمان محتاج ليهو مخدر؟ * مازيمبي ممكن يستخدم الحاجات دي مع الأهلي المصري أو الترجي أو الهلال. * أي الهلال الذي هو أول فريق يغلب مازيمبي في استاده. * وأوع تقول لي مازيمبي اداك خمسة في استادك. * الخمسة دي أنت اداك ليها هلال الأبيض وما ادراك ما شيخ موكورو. * الهلال الأبيض اداك خمسة ولا أنا ظالمك؟ * المهم .. مازيمبي اليوم داك ضرب المريخ بالشيخ (ساماتا). * غلبوهم ودقوهم ودقوا البودي قاردات العشرة ومعاهم الطباخين كمان. * ويومها لم يجد إعلام المريخ مبرر للخسارة بخلاف قولهم : (غارزيتو باع المريخ). * خلاصة الموضوع .. يجب أن لا تكون هش. * وما تصدق الأوهام. * أدخل ألعب كورتك وبإذن الله منصورين. * ونركب صافنات ونجيبة (هلالايية) واصلو الزول بيموت والذكرى تفضل حية. * و.. و.. * والحوت ما بخوفوهو بالغرق.
