محمد الطيب الأمين المحترف البيجي يوم الوقفة (يوم العيد) ما بنستر !! لا حديث وسط جماهير الهلال هذه الأيام إلا عن المحترفين الأجانب. * وصلوا؟ * بصلوا متين؟ * عددهم كم؟ * وهم من وين؟ * بلعبوا شنو؟ * والجايبهم منو؟ * كلها أسئلة تسيطر على مجالس الهلالاب هذه الأيام. * وسط تعتيم غير مبرر من مجلس الإدارة ومدرب الفريق. * أعتقد أن ملف الأجانب ما كان يحتاج لكل هذا الغموض والضبابية. * ولكن الواضح أن الهلال لم يتحرك في هذا الملف إلا في وقت متأخر. * دائما نحن نبدأ البحث عن المحترفين بعد إنطلاقة التسجيلات. * ما عندنا ثقافة رصد المحترف ومتابعته. * بنفاوض يوم الوقفة. * وبنسجل يوم الوقفة. * عشان كده (يوم العيد) الجمهور بيكون ما سعيد. * البترصدو وبتسجلو يوم الوقفة لازم يطلع ليك زي السنغالي انداي. * كان من الأفضل أن يتم حسم هذا الملف مبكراً سيما وأن آخر صفقات أجنبية سجلها الفريق كانت فاشلة جداً. * صفقات راحت قبل تكمل موسم واحد مع الفريق. * نقدر أن الإتحاد العام قد رفض فتح فترة استثنائية للتسجيلات أسوة ببقية البلدان ولكن كان يمكن للهلال أن يصل لاتفاقات مع الأجانب الذين ينوي التعاقد معهم منذ وقت مبكر. * يمكن أن تتعاقد مع المحترفين أثناء فتح التسجيلات في بلدانهم ثم ينتظروا حتى حلول موعد تسجيلاتنا وهذا أمر متبع في كثير من الفرق حول العالم. * كل الذي نخشاه الآن أن يتم التعاقد مع محترفين أجانب من باب (أداء الواجب). * كثير من الصفقات الأجنبية تمت من باب أداء الواجب وكانت ضعيفة ولم تشكل أي إضافة للفريق. * محترف لا يحدث الفارق لا فائدة منه. * محترف ما أفضل من الوطني لا داعي له. * محترف يجي عشان يقعد في الكنبة أخير عدمو. * مجلس الهلال عليه أن لا يلجأ لخيارات ضعيفة. * يا محترف محترف ويا بلاش منو. * وخليكم واضحين مع الناس. * حركات الكاردينال دي ما حبابها. * ما قدرت تجيب محترف سوبر طوالي أنسى الفكرة. * ما عشان (تبيض وشك) أمام الجمهور تقوم تجيب لينا محترفين من طرف. * شوف أول حاجة أنت داير المحترف لشنو؟ * الهدف منو شنو؟ * وهل بقدر يحقق ليك أهدافك؟ * أعمل العليك بدقة والتوفيق من عند الله. * ما تكلفتونا. * ولا تغشونا. * يا أجانب زي الناس ويا بلاش. * و.. و..