محمد عبد الماجد بصمة جواو موتا في (الكشري) ظهرت لو سألوني عن الانطباع الذي خرجت به من معسكر القاهرة او الملمح او العنوان الذي يمكن ان اضعه لمعسكر الهلال في القاهرة سوف اقول بدون تردد ان اهم شيء في معسكر القاهرة ..(دقيقة التلفون ضرب). مرات الكتابة في اللاب توب بتطش. طبعا ضايقين وعاوزين تعرفوا هذا الشيء.. الذي جعلته عنوانا لمعسكر الهلال في القاهرة. في ناس ح يقولوا (البرد)!! دقيقة بس. يا جماعة اصبروا. برجع ليكم. اشوف التلفون. اقوم واقعد. انتوا ح تفتكروا ح اقول ليكم (جيرالد). الحقيقة لي الله – جيرالد كورتو متل عشاء (الكوكيتل). فيه أي شيء. طبعا زمان وقت ظهر عشاء (الكوكتيل) في المناسبات كان عامل شغل. نحن عندنا زول في الايام ديك فتح ليه (محضر) في القسم عشان فتح صحن الكوكيتل وما لقى فيه (زيتونة). القيامة قامت. زمان في الكوكتيل كان أي صحن بختوا فيه (زيتونة). افتكر الحكاية دي اختفت مع البرهان. انا قاصد برهان بتاع الكورة – ما تلخبطوا ساي. انا كنت بتكلم في شنو؟ صحن (الكوكتيل) الجابو شنو في الموضوع دا؟ اتذكرت – انا كنت بتكلم عن جيرالد. وافتكر عرضا كدا جاء الحديث عن صحن (الكوكتيل). ما عرضا والله – انا قاصد الحكاية دي. مالكم انتوا عاوزني انكر كلامي البقولو. قلت ليكم كورة جيرالد زي صحن الكوكتيل. وعشان ما تقولوا انا بتكلم ساكت – امس في مباراة الهلال ومصر المقاصة وجدت الاخ عثمان الاحمر يتحدث عن جيرالد. عثمان الاحمر قال هو مبسوط بي كورة جيرالد – كورة راقية وفاهمة. الكورة منو بتطلع بميزان الموية. بتمشى في نفس الحتة. وانا الكورة الزي دي بتسرني وبتعجبني. جيرالد عندو ميزة تانية وهو انو برجع يشيل مع الدفاع عندما يتقدم الهلال وتكون في هجمة مرتدة من الفريق المنافس. برجع متين ما عارف؟ بتلقاه واقف في الدفاع. غايتو كورة جيرالد دي زي اغنية محمد عبده (الاماكن). طبعا الاغنية دي انا بحبها من دون كل الاغنيات العربية. (الأماكن .. كلها مشتاقة لك..كل شيء حولي يذكرني بشيء حتى صوتي وضحكتي لك فيها شيء ..لو تغيب الدنيا عمرك ما تغيب.. شوف حالي آه من تطري علي). نحن طبعا نقطة ضعفنا الاماكن. نحن لغاية الآن مكسرين في المدرسة التى درسنا فيها. ولغاية الآن في شوارع بتخلينا نقعد في الواطة بسبب بعض الذكريات المرتبطة بيها. (المشاعر في غيابك .. ذاب فيها كل صوت..والليالي من عذابك .. عذبت فيني السكوت..وصرت خايف لا تجيني..لحظة يذبل فيها قلبي..وكل أوراقي تموت..آه لو تدري حبيبي..كيف أيامي بدونك..تسرق العمر وتفوت..الأمان وين الأمان..وأنا قلبي من رحلت..ما عرف طعم الأمان). شوفوا اقول ليكم سر في شارع زمان في حلتنا عندما كنت صغيرا وقعت فيه من العجلة – الشارع دا كل ما امر بيه بتذكر (الوقعة) دي. وبحس أني عاوز اتعتر. لمن اقعد اتلفت واعاين وراي – واقول في شنو ؟ (بسم الله). عشان نكون واضحين في (اماكن) كدا بتظل محفورة في قلبك وما بتقدر تتجاوز هذه الشوارع. شارع البيت وشارع المدرسة وميدان الدافوري – شوارع لا تستطيع ان تنساها. تمشى وتجي فيها. شوفوا الكلام دا (الأماكن إلي مريت أنت فيها..عايشه بروحي وأبيها..بس لكن ما لقيتك .. جيت قبل العطر يبرد..قبل حتى يذوب في صمت الكلام .. وأحتريتك..كنت أظن الريح جابت .. عطرك يسلم علي..كنت أظن الشوق جابك .. تجلس بجنبي شوي…..كنت أظن .. وكنت أظن..وخاب ظني..وما بقى بالعمر شي .. وأحتريتك..الأماكن .. الأماكن..الأماكن .. كلها مشتاقة لك). واحتويتك. شوفوا عليكم الله انا بكتب ليكم في شنو؟ ناس (ريمونتادا) منتظرين العمود – مفروض اكتب ليهم عن الكورة وانا قاعد في القاهرة وبكتب عن الاماكن. خلوها الكورة عليكم الله شوفوا الكلام دا استطعموه ..( كنت أظن الريح جابت .. عطرك يسلم علي..كنت أظن الشوق جابك .. تجلس بجنبي شوي). بالمناسبة الكلام دا ما بعيد عن كورة جيرالد…الزول دا كورتو زي اغاني محمد عبده. طبعا بحب محمد عبده واغنياته – ما تضايقو. انا كنت بقول ليكم في شنو؟ والله الكلام طار من رأسي. اتذكرت .كنت عاوز اكتب ليكم عن اهم ملمح للهلال في معسكرالقاهرة وبدون ما اشعر دخلت ليكم في (الاماكن). انا قبل دا كتبت ليكم عن هذه الاغنية. وهسع كورة جيرالد ذكرتني بهذه الاغنية. انتوا مفروض تحمدوا الله اني دخلت ليكم في (محمد عبده) والله لو دخلت ليكم في عبدالرحمن الابنودي للصباح ما افككم. بكرة يمكن نعرج على الابنودي على حس القاهرة. ارجع ليكم انتوا مفتكرين عاوز اقول ليكم الملمح كورة (جيرالد). تتخيلوا بعد (الاماكن) دي ما عاوز اقول العنوان الرئيسي لمعسكر الهلال في القاهرة روعة كورة جيرالد. ابدا والله. ولا عاوز اقول ليكم العنوان هو (ريتشارد) – الزول دا لو لعب قدام صلاح نمر بشيلو من المنتخب. واحتمال من المريخ برضو يشيلو. ولا عاوز اقول ليكم العنوان هو ابراهيم مصطفى – ابراهيم مصطفى امس لم يشارك بسبب الاصابة. ضحكت لمن ناس الفاضلابي كتبوا في جريدتهم ان ابراهيم مصطفى ماسورة مصدئة. اقول ليكم يا الفاضلابي الزول دا هو الذي يمكن ان ينطبق عليه (هو الزول دا مالو؟) تماما. شيلوا شيلتكم قائمة الشطب في المريخ طلعت. المرة دي طبنجة وحمزة داؤود ما بمرقوا منها. اقول ليكم – عشان الوقت اتأخر وانا عاوز اتكلم ليكم عن مباراة الهلال ومصر المقاصة. يعني ما معقول اسافر للقاهرة مخصوص عشان المعسكر واقعد اكتب ليكم عن (الاماكن). يا جماعة بالواضح كدا عنوان معسكر القاهرة هو بصمة جواو موتا. أي زول شاهد مباريات الهلال في القاهرة قال بصمة المدرب واضحة. اما نحن الذين تابعنا معسكر الهلال في القاهرة وشاهدنا المباريات وتمارين الهلال شفنا المدرب بتاع الهلال شغال كيف؟ والله عندنا مدرب شغال صاح. بصمة موتا في (الكشري) بتظهر. كورة الهلال بقت ممرحلة. الهجمة بتبدأ من الخلف. مباراة الامس نجمها كان الطيب عبدالرازق – مدرب مصر المقاصة قال اللاعب رقم (4) جامد. جامد اوي. اللاعب دا ازاي ما يكون في المنتخب. كورة الهلال بقت سريعة ..الاطراف الاربعة شغالين شغل الجن (ما شاءالله). موفق وعيد مقدم في ناحية. وحسن متوكل وعثمان ميسي من الناحية تاني. بقى عندنا اطراف زي (كراسي الجلوس) ما شاءالله عليهم. الهلال بقت كورتو سريعة …ريتشارد بخترق بخترق. لو ختوا ليه السد العالي قدامو بخترقو ليكم. كورة الهلال بقت جميلة – تمريرات جيرالد كلها لوحات ..ونزار حامد وحسين النور. لاعبو الهلال بقوا بعملوا ضغط عالي. ضغط متقدم. مبارك عبدالله ذكرني بي وليد طاشين ..نفس الملامح والمشية – شوفوا الكورة واحكموا بعد ذلك. موتا واثق من شغلو … في سؤالنا ليه عن شكل الهلال والمستوى الذي وصل له الفريق في وجود المترجم الانسان خالد ام بدة .. وجه موتا السؤال لشخصي وقال لي انت رأيك شنو في الهلال وفي المباراة؟ قلت ليه والله ما في كلمة. ما عارف خالد ام بدة ترجم ليه الكلام دا كيف؟ بين الشوطين قلنا نتكلم مع حكم الراية نشوف رأيو شنو ؟…عشان الحكم المساعد كان طول الوقت بكوريك (ميسي).. وما عارفو قاصد منو عثمان ميسي ام حسن ميسي؟ ..بالمناسبة اباذر ميسي برضو شارك. انا عارف ما في فريق يمكن ان يحتمل مواجهة ثلاثة ميسي في وقت واحد. رجل الراية قلنا ليه الهلال عندو 14 لاعب مع المنتخب..حكم الراية رايتو وقعت منو وقال لينا معقول. بعد المباراة دخلت على حكم المباراة في الغرفة وهو من حكام الدوري الممتاز في مصر واسمه محمد ابوخاطر لأساله عن رأيه .. فاشاد الطاقم كله بالهلال. طبعا انا ما عاوز انقل ليكم رأي الشخصي. انتوا اكيد بتقولوا بعد دا؟ انا بنقل ليكم في اراء ناس التقيت بيهم. كلهم تحدثوا عن بصمة موتا. الهلال السنة دي بي أي 11 لاعب بشيل الممتاز ان شاءالله. وفي المجموعات عندنا كلام تاني. افتكر الوقت اتأخر. احسن ألحق وارسل العمود. لكن والله في كلام كتير عاوز اقولوا ليكم. خلوه للمرات القادمة. يعني انتوا ح تفوتوا مني وين؟ انا قاااعد ليكم. …………… متاريس وتبقى القاهرة جميلة. جميلة بكل شيء. الطقس. والناس. والاماكن. القاهرة حتة مننا. ونحن بنحس بالراحة في مصر. علي المصري لاعب مصر المقاصة تحدث معنا بعد المباراة وشكر السودانيين واصبح بينا تواصل. ………. ترس اخير : احسن بعد كدا ارسل عديل.
