*خسرنا بالتعادل أمام هلال الفاشر *البعض يحمل بيتر مسؤولية هدف الفاشر *حقو الحتة دي ما نقيف فيها كتير *فبيتر في بداية مشواره معنا *ما بنحكم علي الكورة لأننا ما شفناها *بث الممتاز بقي زي تشكيل الحكومة بعد خمسة وعشرين أكتوبر *لكن حتى لو شفناها *البقت بقت *وما كان بالإمكان أفضل مما كان *لأنو ماظنيت فينا زول بعرف أكتر من إبراهومة *ضف إلى ذلك (ظروف) اللاعبين الحاصل فيها شنو والإصابات *وبعدين التعادل أو الخسارة مع أو من فريق بالممتاز ما (فوكا) حاجة *بس الما ممتاز إنك تفقد أمام فريق لا مشى معاك معسكر أربعة شهور *ولا كشفو فيهو أربعة وخمسين ما بين جاهزين ومعلقين *ولكنها عثرة يفترض أن تصلح المشي *والدقسات الزي دي مفيدة *لأنها تظهر السلبيات المغلفة خلف التصريحات الخنفشارية والمانشيتات الموجهة *وخيرها في غيرها *المهم *كورة (الدلال) والأهلي تمت إعادتها استنادا على شنو يا الاتحاد الأحمر؟؟؟ *أحمر بالحا!!!!! *ولسه ياما نشوف من هذا الاتحاد *أنا لا أعلم بالغيب *ولكن المجرب لا يجرب *ولنا من التجارب من أيام (اتحاد اللقيمات) ما يجعلنا نحسن توقع ما يمكن أن يحدث فترة ولاية هذا الاتحاد (الأحمر) مجازا *المهم *الدوري طوييييل *والرك على كورتنا ضد (دلال) الاتحاد *فالبطولة دوما تنحصر بيننا وبينهم لضعف الآخرين مع احترامنا لهم وقلة طموحهم *ولسوء إدارة الرياضة في البلد *فالحكومات تدعم القمة (طمعا) في رضاء الجماهير *وقد يكون الدعم لإلهاء الناس عما هو أهم في ساحات الوطن ومناحي الحياة واستشراء الفساد *لأن في الوسط الرياضي من يعشق ناديه أكثر من عشقه للوطن *وممكن ما يعشق الوطن ذاتو إذا الوطن (كحكومة) ما دعم النادي *عشان كده صورة البشير كانت تتصدر المشهد الرياضي *قربوا يطبعوها في الفنايل *والآن *ولأن الحصة وطن *ولأن الكلمة للشباب *ولأن الشباب واعي *بقت رشوة الدعم ما بتجيب حقها في مجتمعات الأندية *نهايتو *حالة شلش *أها *نجي لي شمارات والي الخرتوم *والينا المكلف علينا *بشوف في تحركات بعد صممنا تسعة طويلة نقطع كرعينا *صحية متأخرة ولا خوف على الطويلة ولا خوف مننا علينا؟؟؟؟ سلك كهربا ننساك كيف والكلب قال بالطريقة دي تسعة طويلة حاتقصروا عمرها وإلى لقاء