محمد عبد الماجد المشاركة في كأس العالم ب (الخرفان)..!! زمان كان وقت يكون عندنا مشروع او رحلة او حاجة محتاجة للدعم بالقروش .. بقوم واحد مننا .. غالبا بكون (شعرو) كتير وعندو رأي في المسلسلات العربية وبقول يا جماعة الساهلة ... اي زول يتبرع بي اي حاجة .. الساهلة بس. ويقعد يكرر في (الساهلة) دي لمن يجمع القروش. ما عارف علاقة (الساهلة) بالمسلسلات العربية شنو؟ غايتو بتذكر زمان كان في ممثل مصري اسمو (عهدي صادق) كان تمثيلو تجسيد لكلمة (الساهلة) البتكلم ليكم عنها الآن. ما عارف الكلام دا مفروض ما كان اقوله ليكم. انتوا علاقتكم شنو ب (عهدي صادق) الذي رحل قبل فترة قصيرة. صاحبنا كان بكرر كلمة (الساهلة) دي مية مرة .. الى ان يجمع القروش ويصل الى (النصاب) المحدد لانجاز المهمة التى يجمع من اجلها القروش. زولنا كان بجمع القروش لكن بشيل نصها. نص في صندوق التبرع. ونصف في جيبو. عشان ما اعلق ليكم في (الساهلة)... منى اركو مناوي حاكم اقليم دارفور حسب تعريفهم ليه ... مشي الى قطر في زيارة رسمية .. في قطر مناوي على ما يبدو انه انفعل بعد ان شاف الترتيبات والتجهيزات العالية في قطر لكأس العالم وشاف (الكشافات) مولعة .. قام قال احسن يشوف ليه اي حاجة تجعله جزء من تلك الترتيبات. خلعتوا الكشافات. مناوي فتش عن اي شيء .. اي حاجة ما لقى غير (الخرفان) قام في قمة هذا الاندهاش بي قطر والترتيبات لكأس العالم اعلن عن تبرعه ب (3) آلاف خروف. عشان شنو؟ قال عشان ضيوف قطر الذين سوف يأتوا من اجل مشاهدة نهائيات كأس العالم .. كأنو الضيوف ديل ح ينزلوا في بيوت اهلية .. وح يضبحوا ليه. كأنهم ح ينزلوا في استراحة او زاوية او داخلية مدرسة ثانوية. الناس ديل ما ح ينزلوا في ديوان العمدة!! مناوي ما عارف الضيوف ديل جزء من الاسستثمار ومصدر اساسي في الدخل الذي سوف يعود الى قطر من خلال نزولهم في الفنادق والشقق المشروفة والسكنية في قطر. يعني الموضوع ما عاوز ليه اي (خروف). ولا عاوز ليه (ضبيحة). قطر ح تستثمر في (ضيوف) البلاد الذين سوف يتوافدوا من جميع انحاء العالم لمشاهدة نهائيات كأس العالم في قطر. معقولة بس (3) آلاف خروف لضيوف قطر الذين سوف يشاهدوا مباريات كأس العالم .. ونحن لعيبتنا بيألكوا البوش والويكة والعدس والبامية المفروكة. طبعا عندي مشكلة مع البامية المفروكة. عندي (تار) عديل مع البامية المفروكة. ضيوف قطر في كأس العالم الحكومة السودانية سوف تقدم لهم (3) آلاف خروف في الوقت الذي لم تقدم فيه حكومتنا السودانية دي (عتود) لمنتخنبا السوداني. ديل (الدكوة) دي بيبخلوا بيها على منتخباتنا. لا عندنا ملاعب. ولا عندنا مدرب. ولا عندنا حوافز. ولا عندنا كهرباء. ولا عندنا رغيف. ما عندنا اي حاجة. وحكومتنا بتتبرع ب (3000) خروف لضيوف قطر في نهائيات كأس العالم!! اتخيلوا ان منتخب قطر معظم عناصره (سودانية) الجنسية الى جانب عدد كبير من السودانيين الذين يشاركوا كقطريين في الالعاب الاخرى مثل معتز برشم الذي تقول سيرته انه (مختص في القفز العالي، حقق ذهبية في بطولة العالم للناشئين لألعاب القوى بكندا سنة 2010 مسجلا 30ر2 متر، وهو أيضا بطل آسيا 2011 في اليابان مسجلا 35ر2 متر، وحقق ذهبية دورة الألعاب العربية بالدوحة في ديسمبر 2011 مكنته من التأهل إلى الألعاب الأولمبية في لندن. والفوز بالميدالية البرونزية. كما تمكن من حصد الميدالية الفضية في دورة الألعاب الأُولمبية ريو 2016، وأيضًا حصد الميدالية الذهبية في دورة الألعاب الأولمبية في طوكيو 2021). برشم سوداني اصيل ومن دارفور كمان. اضف الى هؤلاء العدد الكبير من السودانيين الذين خدموا قطر وساعدوا في نهضتها ومازالت دولة قطر تنتفع من خبراتهم وامكانياتهم العلمية والعملية. بعد كل هذا العطاء غير المنقطع اعلن حاكم اقليم دارفور الذي تعان بلاده في كل الخدمات الاساسية عن التبرع ب (3) آلاف خروف لاكرام ضيوف قطر. والله لو اتبرع بي فدان فول مصري ما كان قلنا حاجة. منتخب قطر في نهائيات كاس العالم اغلب عناصره سودانية الجنسية .. بعد هذا سوف تقوم الحكومة السودانية بالتبرع ب (3) آلاف خروف لضيوف قطر. يعني المنتخب مننا والضيوف علينا. المفارقة ان اهل السودان في دارفور وفي غيرها سوف يكون على اي مواطن سوداني منهم في حاجة الى ان يدفع (100) دولار او ما يعادل (60) مليون جنيه سوداني من اجل مشاهدة مباريات نهائيات كأس العالم من خلال قنوات بي ان سبورت القطرية. نحن في السودان ندفع (60) مليون جنيه سوداني عشان نشاهد مباريات كأس العالم في الوقت الذي سنقدم فيه لمن يشاهدون مباريات كأس العالم من الملاعب في قطر (3000) خروف. يشاهدوا ويأكلوا لحمتنا. ونحن نشاهد وندفع بالدولار. المشاهدة بالدولار. والضيوف بيأكلوا في لحمتنا!! اكلوا لحمنا!! كنت سوف احترم مناوي جدا لو انه عمل من اجل ان يصل المنتخب السوداني الى نهائيات كأس العالم.. ان لم يكن في هذا العام ففي 2026م .. لكن ان نصل الى نهائيات كأس العالم ونشارك فيها ب (الخرفان) فهذا ما يفقع (مرارتنا). بمناسبة (المرارة) دي ... الخرفان التى سوف يتم التبرع بها الى قطر .. هل سوف يستفاد من (مراراتها)؟.. وإلّا (المرارة) بتروح في الكرعين؟ بتروح مع الجلد؟ اهم شيء في الخروف (المرارة)... ومرارة (3000) خروف ما نخليها تروح ساكت .. عشان كدا مفروض نرسل مع هذه الخرفان مختصين في (المرارة) وشية الجمر والاقاشي .. نحن خرفانا دي ما بنخليها تروح ساكت. ولا بد كذلك من مختصين في عمل (الكمونية). نحن طبعا (الكمونية) في الخروف .. بنتعفف منها في اليوم الاول. وبنتعفف منها في اليوم الثاني. ونتعفف منها في اليوم الثالث. وفي اليوم الرابع بنجري عليها جري .. عشان لو ما جرينا عليها (الكمونية) ذاتها ما بنلقاها. رابع يوم من (الضبيحة) اهم حاجة في الخروف بتكون (الكمونية). انا خائف القطريين يهملوا موضوع (الكمونية) دي وما يكون عندهم وقت عشان ينضفوا الكرشة والمصارين وينفخوا الفشافش. طبعا اهم شيء تنفخ (الفشفاش). النظام سمح. ضيوف كأس العالم بما انهم سوف يتناولوا لحوم الخرفان السودانية .. لازم كمان يضوقوا (المرارة) .. كفاية (المرارة) الضايقنها نحن من (العسكر) الى جانب شية الجمر والاقاشي والباسم. كأس العالم نحن عندنا فيه (اللحمة). ضبحنا للضيوف. هيع!! اصلو ما بتقصر يا مناوي. انتوا عارفين (3000) خروف فيهم كم باسم؟ .. فيهم (1500) باسم .. طبعا ح تقولوا لي في (1500) رأس ح تروح وين؟ ح اقول ليكم ح يضربوها ناس (سلام جوبا) ديل قبل ما تصل الى قطر. اقنعوا منهم. ديل شغالين النص بالنص. يمين الخرفان دي ممكن تصل بدون رؤوس .. وبدون (كلي) وبدون (كبد) وبدون (قلوب) وبدون (كروش) وبدون (لحمة فخدة) .. وبدون (جلود) ايضا. الجماعة ديل صعبين. ممكن يضربوا اي حاجة. وممكن الخرفان دي تصل (ورق) ساكت. وكلام. كفاية الحصل في (الذهب). يعني انتوا هسع صدقتوا مناوي؟ عاوز يتبرع ب (3000) خروف لدولة قطر الغنية من غير ما يستفيد حاجة؟ يتبرع كدا ساي!! انا متأكد .. اللجنة المنظمة لنهائيات كأس العالم اذا قرأوا عمودي دا برفضوا التبرع الذي اعلن عنه منى اركو مناوي. غايتو كلمتكم. قال (3000) خروف. ................ متاريس قرار ذكي من الهلال انه يعسكر في الكنغو ويلعب امام مازيمبي قبل مواجهة الشباب التنزاني. معسكر الكنغو ضربة معلم جد. لا بد من القول ان القطاع الرياضي بقيادة العليقي وعوض طارة شغال صاح. نتمنى الاستقرار للمكتب الاعلامي في الهلال. تعاطف الجميع مع انس محمد احمد ومحمد دفع الله ومساندة جماهير الهلال لهما شهادة نجاح وتفوق لأنس ودفع الله. جماهير الهلال ما بتقيف مع زول ساكت. الجماهير دي عارفة الشغال من الما شغال. جماهير الهلال عندها احساس بمن يخلص ويعمل من اجل الهلال. على جماهير الهلال دائما ان تحمي المخلصين للهلال. اختصاصي العلاج الطبيعي الدكتور احمد العابد نتمنى عودته من جديد للهلال مع الطاقم الطبي الحالي في الهلال. العابد زول شاطر وزول مخلص. نحن اي زول مخلص وشاطر بنحب نشوفه في الهلال. مباراة الشباب عاوزة اعداد خاص. والحمدلله ان الاعداد الخاص للمباراة ظاهر الآن. بكرة مباراة ما ساهلة للهلال امام هلال الفاشر. هلال الفاشر ما ساهل. بالتوفيق دائما وابدا للهلال. ........... ترس اخير : غريبة لغاية ما انتهيت من كتابة العمود الكهربة ما قطعت.
