محمد الطيب الأمين الثورة ثورة شعب و(التشكيلة) للمكنات.. !! * عند الشباب هنالك مصطلح إسمه (مكنة). * يقول ليك فلان ده (مكنة). * (مكنة) يعني زول شِفت أو مميز. * وقد راج هذا المصطلح أيام الثورة فكان الهتاف الشهير (الثورة ثورة شعب والسلطة سلطة شعب العسكر للثكنااات والشارع للمكنات). * وبما أن ذلك كذلك فإن الهلال هذا العام كلو (مكنات). * بسم الله ماشاء الله. * أمسك من الحارس ولحدي أصغر مهاجم عندنا. * كلهم مكنات. * وأكبر مكنة في البلد هو الغربال. * ثم ياسر مزمل. * الغربال ومزمل لما يجو جارين عليك إلا تعمل ساتر. * ماشاء الله تبارك الله. * والمكنة الجد جد لأمين جارجو. * لعيبة الشباب التنزاني في لحظة من اللحظات بقوا يتلبدوا من جارجو. * لوشافوا مسك الكرة بعملوا فيها ما شايفين. * والله صحي. * وفي بعض الأحيان لما يمسك كرة بيجوا عليهو أربعة لاعبين دفعة واحدة. * ما بجيهو إلا بالجملة. * والود ماشاء الله خفيف وحريف. * مكنة. * والهلال كلو مكنات الحمد الله. * النابي قال اندهش لمستوى الهلال في الشوط الثاني * طبعا فلوران هزم النابي في شوط المدرب. * النايي دخل الحصة الثانية من أجل تسجيل هدف ثم هدف ثاني وهكذا. * داير يلعب الشوط الثاني هجومي. * وإندهش لما شاف الهلال ذاتو بيهاجم. * الحاجة دي حيرتو. * أتوقع انو الهلال يحافظ على التعادل أو حتى الخسارة بهدف. * أتوقع کده. * ولكن فلوران لعب وكأنه يلعب بأم درمان. * لا خوف ولا توتر. * كل أفكار النابي ضربت. * والله أنا فرحت جداً وحسيت بفخر لما شفت الهلال (ماخد راحتو في الهجوم). * وده كان تکتيکي مضاد لتكتيك النابي. * تكتيك خبيث جداً * ولولا سوء الحظ لكانت تلك هي المباراة الأخيرة بالنسبة للنابي مع الشباب. * لكن إتكتب ليهو عمر جديد. * عمر ربما لا يزيد عن الأسبوع. * يوم الأحد ممكن نكتب نهاية النابي. * يوم الأحد ح نخلي كالالا يندم على إنو ما قبل عرض الهلال. * تعال عشان تعرف المكنات. * جمهورنا ذاتو أكبر مكنة. * ولذلك إستعدادنا لهذه المباراة يجب أن يكون عالي جداً. * أي تراخي أو إستهتار سيكون الثمن غالي. * وغالي جداً. * الناس بعد ده تنسى نتيجة الذهاب وتتعامل مع المباراة القادمة بجدية وتركيز. * كرة القدم مجنونة. * ولو نمنا على العسل ستكون العواقب وهمية. * شدوا حيلكم. * وخليكم في الموعد. * وإن شاء الله ما بتجينا عوجة. * و.. و.. * والله في.
