محمد عبد الماجد فبراير.. ما قَصّرْتَ معانا..!! انتهت أيّام فبراير 2023م ودخلنا على شهر مارس.. وشهر فبراير عندنا ليه محبّة خاصّة.. بنشيل ليه (مَعزّة).. (ونحن ناس بنعيش حياتنا الغالية بالنية السليمة.. وأي زول دايرين سعادتو تشهد الأيّام عليمة). لا أدري ما هي علاقة هذا المقطع بانتصارات الهلال أو بشهر فبراير وأنا أذكره والحديث عن فبراير؟.. ارتبط المقطع هذا عندي بانتصار الهلال.. وأذكر في هذا المقام (الطريفي) رحمة الله عليه وهو أحد هلالاب (كبوشية) المعروفين، وهو تاجرٌ في سوق كبوشية، له مكانة وكلمة، وكبوشية خرج منها ود الفكي وعبد الله الماحي، حيث بدأت أغنية الحقيبة من هناك ولاحقاً جاء منها التنقاري والعمرابي وهي أرض حضارات وأدب وثقافة وأهرامات وحديد.. وهي الموطن الرسمي لأغاني الحماس والدلوكة (الرحمة وبت أم قلو وحميرا والجود).. ومازالت كبوشية تشهد عصاريها وأماسيها ذلك الطرب الجميل والحفلات التي تملأ النفوس شهامةً وشجاعةً وكرماً.. ومازال محجوب كبوشية سلطان الأغنية الشعبية. الطريفي رحمة الله عليه كان عندما ينتصر الهلال أجده يردد هذا المقطع.. (ونحن ناس بنعيش حياتنا بالنية السليمة.. وأي زول دايرين سعادتو تشهد الأيام عليمة) بسعادة بالغة وكأن السعادة ارتبطت بانتصار الهلال.. لهذا ارتبط المقطع عندي بانتصارات الهلال.. مازلت أذكر فرحته بعد هدف صاروخي سجله صلاح الضي (الكي) في شباك المريخ وهو يخوجل بجلباب سمني وطاقية (محدرة) وهو يردد هذا المقطع قرب بوستة محطة كبوشية الشهيرة. الأغنية هي (الطير الخداري) كتبها الحلنقي وتغنّى بها الراحل علي اللحو.. لكن أول ما سمعتها أنا من الطريفي وهو يترنّم بذلك المقطع. ارتباط المقطع هذا بانتصار الهلال يمكن عشان (النية السليمة).. ويمكن عشان (السعادة) بتبقى لينا عمة وشال وشاي وقهوة عندنا ينتصر الهلال. وتبقى لينا صباح. وعصاري. وأمسيات. وصحبة ولَمّة. شوفوا لمن ينتصر الهلال بتكون أصلو ما في (عوجة) زي كأنو السعادة موقعة معانا عقودات على هذا. أي حاجة بتبقى تمام. وبصحة جيدة.. العافية ذاتها بتبقى مية المية.. ما بتلقى ليك زول بيشكي من حاجة. أو وجع ضرس. أو عاوز ليه حبة بنادول.. أو زائغ من بتاع الإيجار. حتى (الفلس) بنتهي. الناس مبسوطة.. تتضحك من غير سبب.. من الأضان لي الأضان. مرة الكهربة قطعت.. اتحسّرت وقلت: الكهربة قطعت.. الزول المعاي قال لي نحن الكهربة نعمل بيها شنو مع انتصار الهلال دا؟.. ليليبو منوِّر لينا. انتصارات الهلال الشاي لو جابوه ليك سادة بتلقاه بي لبن.. ومُقنّن كمان!! أنا ما بدهشني أنه أصبح شاي بي لبن.. لكن بدهشني كيف بقى (مُقنّن) بالسرعة دي؟! ونحن ناس بنحب شاي اللبن المُقنّن. وعندنا فهم فيه. عشان نكون واضحين معاكم. لمن ينتصر الهلال الفول بتصلح براهو.. والعدس يبقى ليك زي (الكبدة).. والسمك بدون شوك. والمواصلات لو طلعت عليها تلقاها فاضية.. ومشوارك بكون عديل. والرغيفة قدر ما تأكل منها ما تكمل. مرات في حاجات بتحصل ما بتقيف عندها في وقتها.. بعد سنوات ترجع ليها وتربط بينها وبين الواقع تلقى في علاقة قوية تجمع بينهما. في 13 فبراير وفي شهر رجب المبارك تم تأسيس الهلال، ليطلق على الفريق اسم الهلال من قِبل الخريجين الأوائل، وهم يجتمعون لتأسيس النادي واختيار الاسم، حيث أهّل هلال رجب في سماء زرقاء وأمسية بيضاء ليهديهم ذلك المشهد اسم الهلال. فكان الهلال – لا أزيد على ذلك فليس هنالك أعظم من الهلال. بعد الهلال تاني ما في قول. نقول شنو؟ من بعد فنحن نصوم على رؤيته ونفطر على رؤيته ونعيّد على رؤيته، فهو في السماء (زمان) وفي الأرض (مكان)، اخترنا له أن يكون في القلوب تدق بانتصاراته وتتوقّف بخسارته.. مثلما صمنا برؤيته وفطرنا برؤيته. لا أعرف كيف شعر بنا الغرب ولا أؤمن بما يأتي منهم؟.. ولكن هو إحساس منهم كان لا بد أن يجعلوا يوم 14 فبراير (عيد الحب) وذلك لسبب واحد عندي هو أن الهلال تأسس يوم 13 فبراير، لذلك لا بد أن يكون اليوم التالي عيداً للحب!! كفاية أنّ فبراير عشان الغلابة وناس المرتبات هو دون الأشهر أحياناً كثيرة يكون (28) يوماً فقط. نحن في أيِّ حاجة بنختلف. رحمة فبراير تظهر في ذلك 28 يوماً.. فهو الشهر الذي تأسّس فيه الهلال. إنّه الهلال. في فبراير حدث كل ذلك. الهلال مَعروفٌ أنّه نادي الحركة الوطنية وهو تأسّس من أجل الوطن.. وحمل اسم الوطن في شعاره (الله – الوطن – الهلال). لهذا لا عجب أنّ أكثر فنانين تغنّوا للوطن وناضلوا من أجله، وقدموا أجمل أغنياتهم عن السودان، ودخلوا السجون حسن خليفة العطبراوي ومحمد وردي هلالابيان. من غنّى للوطن (أنا سوداني أنا) و(لن أحيد) و(يا غريب يلا لي بلدك) غنّى للهلال وعُرف في عاصمة الحديد والنار بهلاليته. وردي غنّى للسودان والاستقلال وغنّى للحبيب، وكان طبيعياً أن ينتمي للهلال، وأن يغني (وكانت ساعة النصر في اكتمال الهلال). انتصر الهلال على الأهلي المصري بعد حرمان الهلال من جماهيره – انتصر الهلال بهدف ليليبو وخرج الأهلي من الجوهرة الزرقاء يشكو من (الشمس) ومن (موية الصرف الصحي) – قالوا الشناوي أُصيب بلحظة عمي. تصرفات الشناوي بعد المباراة بتأكُّد فعلاً أنه ما بشوف. طيِّب الشناوي عرفناه. كورة ليليبو فيها (بمبان). فيها (شطة)؟! علي لطفي الذي يجلس احتياطياً له مالو؟! ذنبو شنو؟! علي لطفي خلوه. حارس مرمى القطن الكاميروني مالو ما بشوف؟! إذا لم يشاهد هدف ليليبو في قاروا.. ألم يشاهد هدف ليليبو في الأهلي المصري؟! ما عندهم تلفزيون؟ ما عندهم قناة؟ في فبراير انتصر الهلال خارج قواعده على القطن الكاميروني بمدينة (قاروا). ليليبو سجّل هدفين في القطن. الأول (إعادة). الثاني (ختم). والكلام عن الهلال كتير – دائماً نحن نقصر في حق هذا النادي.. مقصرين والله. الهلال أول نادٍ حمل هذا الاسم في العالم.. من تشبّه بالهلال وحمل اسمه في السعودية بعد الهلال السوداني أصبح زعيماً لقارة آسيا ووصيف العالم.. المشبه بالهلال والمسمى عليه فعل ذلك في آسيا.. فكيف بالهلال سيد الاسم؟ – سيد البلد في أفريقيا. في سوريا هلال، وفي اليمن هلال، وفي لبنان وفلسطين وليبيا، حتى في تونس هنالك هلال الشابة.. وفي مصر الهلال المطروحي. هلال في كل حِتّة. والفضل يرجع لسيد الاسم الهلال السوداني. هلال الملايين. هلال الحركة الوطنية. هلال الخريجين الأوائل. هلال أم درمان. الهلال العاصمي. صاحب المقام الرفيع كما أطلق عليه الراحل عبد المولى الصديق. الهلال في مكان آخر. مثلما حقّقنا أهدافنا في فبراير.. نريد أن نُواصل في مارس بنفس الصورة. في مارس سوف نُواجه القطن وصن داونز في أم درمان.. ثم نُواجه الأهلي في القاهرة.. وسوف تكون تلك المباراة في شهر رمضان. شهر مارس هو شهر (الحصاد) وهو شهر التأهُّل بإذن الله تعالى لدور الثمانية في البطولة الأفريقية. نحن في مارس لا نريد أكثر من الهُدوء والتركيز. مباراة صن داونز الطريق لحسمها يمر عن طريق (الهُدوء). أصلو ما عاوزين ننفعل. ما عاوزين نستعجل. كل شيء بالرواقة. صن داونز بيلعب كورة.. ألعبوا كورتكم.. إنتو ما عندكم مشكلة في الحتة دي. اتغلّبوا على الضغوط والعجلة بالهدوء. الرياح سوف تأتي بما تشتهي سفن الهلال إن شاء الله. ما تركِّزوا مع المصريين.. ما تشتِّتوا تركيزكم. ركِّزوا مع فريقكم. بالهداوة. أي شيء بالهداوة مُمكنة. مارس سيكون مثل فبراير سوف نكمل فرحتنا. ورجب وشعبان ورمضان كلها أشهر مباركة. انتصرنا على الأهلي المصري في 27 رجب.. وقادرون على أن ننتصر عليه إن شاء الله في رمضان. القطن فزنا عليه في شعبان.. وفي شعبان أيضاً سوف نفوز مرة أخرى على القطن وعلى صن داونز إن شاء الله. بس بالهداوة. ما تستعجلوا. الكورة في ملعبكم. والقرار قراركم. والكلمة كلمتكم. نقول يا رب. ونرمي لي قدام. ………………. متاريس مباراة الهلال أمام الأمل، سوف تمنح الهلال إعداداً جيداً قبل المواجهات الأفريقية. والدوري الممتاز، التنافس فيه قوي والأندية محترمة. الهلال من 9 نقاط عاوز 6 نقاط.. والأهلي عشان يتأهل من 12 نقطة.. عاوز 12 نقطة. موقف الأهلي منيّل ستين نيلة. لا بد أن يجعل الهلال مباراته الأخيرة في القاهرة (ودية). أو مباراة من أجل صدارة المجموعة. أفضل رد على الأهلي المصري أن تجعل مباراته (ودية). ولا كلمة. حالتها دي بدون جمهور. الله يديم الأفراح. وربنا ينصر الهلال أمام القطن وأمام صن داونز. ……….. ترس أخير: شمس جنوب أفريقيا قالوا الأيّامات دي معاها مطر.
