سودارس : روفا في الارجاء يا…!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

روفا في الارجاء يا…!

سوبر هاتريك نشر في كورة سودانية يوم 25 - 03 - 2025

طارق محمد عبد الله
روفا في الارجاء يا…!
& ثلاثة أيام كاملة العدة والعتاد شاملة الضريبة الإبداعية وانا أشاهد مرارا وتكرارا لقطة موسيقار الأمة وفنان الشعب عبد الرؤوف اختصارا روفا وفي كل مرة كنت (بشوف زاوية إبداعية مختلفة عن الثانية) والحق يقال ونحن في حضرة الجمال فان ما قدمه روفا من خليط إبداعي وعصير دهشه أولى وثانية وثالثة ورابعة مشتركة( فوق )، امام السنغال شيء اصلا ماعادي وانا شخصيا نفسي ومنى عيني اعرف روفا الظريف عمل اللقطة الفنية الإبداعية الخيالية التحفة دي كيف ؟؟؟ ياولد ماشاء الله تبارك الله بالجد انت موسيقار ماهر تجيد العزف على أوتار الإبداع وتقديم أعذب الالحان الكروية الشجية التي لها القدرة على الابهار وتقديم كل ماهو جديد وفريد في عالم الساحرة المستديرة حاجة كده تخليك تبتهج بكل الحب والاشواق من عمق الأعماق بعد ما تفتح الروح ضلفتين عشان كده قامت الدنيا ولم تقعد وضجت كل وسائل الإعلام بأحدث موضة إبداعية روفا في الارجاء والأجواء الإبداعية مع تحياتي (لصرفه) ولكل مدافع عن وطن المبدعين الحبيب في المحاور والمنابر .
& من الطبيعي أن يتصدر ماقام به روفا في الارجاء والأجواء الإبداعية المشهد في الماما افريكا وفي كل العالم وكيف لا و دافنشي وبتهوفن السودان روفا في الارجاء يقدم لقطة اعجازية فيها كل الفنون والإبداع المجنون لايقدمها الا مبدع استثنائي صاحب خيال خصب وشاعرية ياخ دي خليط من النثر والشعر والموسيقى حاجة كده زي وتر الموانئ لما يصدح لي سفينة وحقيقة روفا أعطانا سعادة نابعة من عمق الأعماق باللقطة بل بالتحفة الإبداعية المحتشدة بالجمال أول حاجة روفا قطع شك سرح وبخيال خصب ابهجناو فتح في دنيتنا بالرغم من آلام وأوجاع وأحزان الحرب صوامع للمرح .
&وحقيقة فان اللقطة الإبداعية لموسيقار الأمة وفنان الشعب وامير المبدعين روفا في الليلة ديك فتحت الروح ضلفتين وإسعدت السودانيين وغيرهم وغيرهم وغيرهم غايتو ياروفا عمليتك دي ماكورة ماشاء الله مزيكا عديل زي مقطوعات بتهوفن ولو دايرين نقارن بصوت غنائي قطع شك طوالي حنتذكر واحد من ثلاثة وردي ، مصطفى سيد احمد أو الحوت ولو مشينا لي انو الموضوع رسم اكيد حنقول لمعجبي الموناليزا ودافنشي جاكم الجديد المأمتلو شيء وبالجد لقطتك ياولد يا فنان حاجة زي وتر الموانئ لما يصدح لي سفينة صحت جوانا كل جميل ورائع وفي اللحظة ديك هبت نسمة في عز الصيف ونزل المطر وبرد الجو وذهب العطش الإبداعي أن شاء الله التاكلوا كلو ينفعك وبطنا جابتك والله مابتندم وعلى غرار صرفه تاااااني روفا في الارجاء يا …!
اهداف سريعة..اهداف سريعة
&بعد لقطة روفا في الارجاء لم يرفع ساديو مانيه راسه من على الأرض في ما تبقى من زمن المباراة عارفين ليه …؟؟؟
& طبعا السنغالي عارف انو الناس
في المقام الاول جات تشوف ماني وإبداع ماني وتوهج ماني وأهداف ماني ولمن طلع كل المذكور اعلاه فشنك وهنا لابد من أن نذكر بإعجاب ما فعله العجب في رمضان وخلى ماني في خبر كان .
& وجاء روفا بالجديد المبتكر المدهش وحلق عاليا عاليا في الارجاء والأجواء الإبداعية اكيد السنغالي بيكون تحت تحت لي هسه شامي روفا وانتوا قايلين شكلتو معاهو جوه الميدان صدفه…؟؟؟
&وبالجد فقد سحب المبدع السوداني الاستثنائي البساط من الجميع وبات روفا في الارجاء حديث الصباح والمساء في كل الدنيا.
& غايتو اللقطة المعجزة قسمت المشاهدين الأجانب الى اتنين فرحانين وبسالوا السودانيين جبتوا الابداع ده من وين …؟؟
&وواحدين تانين لي لي هسه مندهشين حتى فغر
الفم انتوا لسه شفتوا حاجة دي المناظر الفلم لسه روفا في الارجاء والأجواء الإبداعية والسمع يكلم الماسمع .
&وبعد الحصل ده نقول لروفا تاااااني قدام بس وابداعك البقى علني ما بالدس ضاعف من مسؤوليتك.
&هسه ممكن نقول وبملء الحلق انو روفا في الارجاء والأجواء الإبداعية بالجد واحد من أبرز مبدعي القارة السمراء ونطمع في المزيد والإبداع المبتكر الجديد .
&عشان موسيقار وفنان الشعب السوداني يكون المبدع الاول في أفريقيا وقريبا باذن الله في العالم بأسره.
& ولن نمل التكرار روفا في الارجاء والأجواء الإبداعية حتى يحقق المراد بالتبشير الكروي الإبداعي عن كنوز البلاد.
& دائما نتطلع لهلال قيافة فايت الناس مسافة .
& وأخيرا احمد الله كثيرا انني حي ازرق .

انقر هنا لقراءة الخبر من مصدره.