سودارس : دوري (دبِّل ليهو)!!

كلمات مؤثرة في الوداع... كجاب يترجل عن الخدمة برسالة إيمانية السودان ومصر يوقعان بروتوكول مشترك لمكافحة بعوضة الجامبيا حاكم النيل الازرق يصدر قرارا بتعديل ساعات حظر التجوال واستعمال المواتر الله يستر.. الناس دي ح تبدأ تدور..!! شاهد بالصور.. السلطانة هدى عربي تخطف الأضواء بإطلالة مبهرة من حفلها الأخير بالرياض أمجد فريد الطيب يكتب: حياة تجلت في وضوح المبادئ: وداعا فينك هايسوم عثمان ميرغني يكتب: حرب السودان ومخطط شد الأطراف الخليج الضحية الكبرى: إيران وجهت 83% من هجماتها إليه… و17% فقط إلى إسرائيل محاولة قصقصة (أجنحة) الهلال بعثة المنتخب تصل بورتسودان وسط إهتمام كبير 13 حزمة لغوية جديدة لترجمة محادثات "واتساب" سناب شات" يحوّل الصور إلى فيديو بالذكاء الاصطناعي كواليس صادمة... كيف تعطلت صفقة تسليح الجيش السوداني في اللحظات الأخيرة؟ الباشا طبيق : السيطرة على الكرمك تعيد تشكيل الخريطة العسكرية في السودان بالصور.. مدارس أبو ذر الكودة تلزم أسرة طالب بدفع غرامة قدرها 100 ألف جنيه بسبب كسره مفتاح مروحة بالفصل ومتابعون يتصدون للدفاع عن المؤسسة هل يكون محمد صلاح الصفقة الكبرى القادمة بالدوري الأمريكي بعد جريزمان؟ جلسة مع محمد صبحى في الزمالك.. اعرف السبب استمرار محاولات الأهلي لإنهاء أزمة الشرط الجزائي مع توروب 11 دقيقة إضافية من النوم ليلا تساعد فى الوقاية من النوبات القلبية يارا السكري تكشف لليوم السابع تفاصيل دورها فى فيلم صقر وكناريا شاهد بالصورة.. فاتنة الإعلام السوداني تخطف الأضواء بأحدث إطلالة لها والجمهور يطيل الغزل في جمالها: (يا دووب كدة عيدنا) باسم سمرة: الناس بقت تناديلى ب«زكى».. ونجاح عين سحرية توفيق من ربنا ذكرى رحيل أحمد حلاوة.. ممثل جمع بين الهندسة والدكتوراه فى فلسفة الفنون نصائح لوقاية مرضى حساسية الصدر من التقلبات الجوية والرياح مشروبات تساعد على حرق الدهون بعد كحك العيد اكتشاف مرض وراثي جديد يسبب الشيخوخة المبكرة والقصور الإدراكى شاهد بالصورة والفيديو.. في تقليعة جديدة.. شباب سودانيون يلطخون صديقهم العريس ووزيره ب"ظهر الصابون" و"البودرة" الهلال يواجه ضغط المباريات في رواندا مهلة أخيرة للمخالفين: خيارات متعددة لمعالجة أوضاع التأشيرات المنتهية في السعودية كيف تفاعل النجوم مع خبر رحيل صلاح عن ليفربول؟ ضبط 2800 قندول بنقو بالجزيرة في عملية نوعية لمكافحة التهريب ترامب يصدر أوامره ويكشف تطورات مثيرة مع إيران طهران ترد على تهديدات ترمب هل مخالفة ترامب خلل في الكون؟! الأمن يداهم مخزن يبيع الوقود المهرب لعصابات التنقيب عن الذهب تراجع معدّل التضخّم في السودان بادي يصدر مرسوم تنظيم أعمال التعدين التقليدي وضبط آليات التعدين بالنيل الأزرق رئيس الأهلي مدني وابنه يتعرضان لحادث مروع المباحث تنهي مغامرات شبكة إجرامية متخصصة في الإحتيال علي أصحاب المحلات التجارية عن طريق اشعارات تطبيق بنكك المزيفة شركة كهرباء السودان تحديث حول سير أعمال الصيانة الطارئة للشبكة القومية توقّعات بارتفاع غير مسبوق في أسعار النفط ضبط 238 كجم من "الآيس" وأسلحة بجانب نحاس بولاية البحر الاحمر ضبط 238 كجم من "الآيس" وأسلحة بجانب نحاس بولاية البحر الاحمر الشيخ بن زومة.. إلى جنة الخلد أغلى علبة كعك في مصر تشعل مواقع التواصل قيم الهلال المتوارثة يجب أن تبقى أبد الدهر بنك السودان المركزي يصدر توجيهًا للمصارف إبراهيم شقلاوي يكتب: الزراعة ما بعد اقتصاد الحرب في زمن الضجيج.. القرآن بوصلة المعنى والسكينة د.مزمل أبو القاسم يكتب: دموع الباز.. وزاهر! (2) السودان.. الدفاع المدني يستعين ب"التوك توك" طفح جلدي في رقبة الرئيس ترمب يثير تساؤلات حول صحته ملتقي التحصين للعام 2025 ينعقد بحضور التحالف العالمي للقاحات والشركاء صوت لا يغيب.. محمد رفعت ورحلة الآذان الخالد في رمضان أجهزة الأمن السودانية تنهي مغامرات لص الصيدليات في عطبرة شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم شاهد بالفيديو.. الوطن يتعافى ويعود.. تزاحم مئات المصلين في صلاة التراويح بمسجد السيدة سنهوري بالخرطوم السودان.. فكّ طلاسم"تبيدي للمجوهرات" في الخرطوم والتحقيقيات تفجّر مفاجأة

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

دوري (دبِّل ليهو)!!

صابنها نشر في كورة سودانية يوم 19 - 05 - 2025

محمد عبد الماجد
دوري (دبِّل ليهو)!!
على ناس المريخ مجلس الإدارة والإخوة الأفاضل في المكتب الإعلامي للقلعة الحمراء أن يجهِّزوا منذ الآن تهنئة كبيرة قدر (الليلة وباكر)، تهنئة غليدة للهلال الذي فاز في ظروف الحرب ببطولة الدوري الموريتاني – السوداني (دبِّل ليهو) أو اقترب من ذلك بإذن الله بعد أن أصبح الفارق بين الهلال البطل المُتوّج أو المُشرف ووصيفه بطل الدوري على الأندية الموريتاتية نواذيبو (5) نقاط قبل نهاية الدوري بجولتين، مع مباراة إضافية مُؤجّلة للهلال.
كلِّموا ناس المريخ يجهِّزوا تهنئتهم للهلال، يرفعوا إيدهم ويعلوا صوتهم ويقوموا يبشِّروا في العريس ويباركوا ليه بعد أن حقّق الهلال بطولة الدوري الموريتاني السوداني (دبِّل ليهو) في ظل الحرب المشتعلة في السودان والهلال يلعب غريباً أو ضيفاً على الدوري الموريتاني السوبر.
فوز الهلال بهذا اللقب إن شاء الله سوف يكون تاريخياً، وهو سوف يكون لنا ذكرى خالدة بعد انتهاء الحرب الآن أو لاحقاً سوف نقول لأولادنا وأحفادنا إنّ الهلال أثناء الحرب فاز بالدوري الموريتاني – السوداني (دبِّل ليهو)، الحرب سوف تصبح ذكرى.
تاريخية هذا اللقب (دبِّل ليهو) تأتي من كونه لم يسبق لفريق أن حقّق لقباً خارجياً بالفوز بدوري غير دوري بلاده، أعتقد ذلك، لا أقطع بهذا.. فليبحث لنا الدكتور علي عصام عن هذا الأمر هذا حدثٌ فريدٌ ونادرٌ وغريبٌ في نفس الوقت، خاصةً أنه يحدث في موريتانيا الدولة الشقيقة التي نحبها كثيراً، وقد أحببناها أكثر بعد أن شارك الهلال والمريخ في الدوري الموريتاني، فوجدنا من الإخوة الموريتانيين في كل القطاعات كل احترام وتقدير وحُب.
الفوز بالدوري الموريتاني – السوداني (دبِّل ليهو) إنجازٌ عظيمَ للهلال سوف يُكتب في السجلات وهو حدثٌ لا أظنه سيتكرّر لنا أو لغيرنا بعد ذلك، ومن هنا تأتي غلاوته ربما يحدث ذلك كل مائة عام.. قوة الدوري الموريتاني تظهر في المركز الذي يحتله المريخ الآن سادس الدوري ولا أظن أنّ في إمكانية المريخ أن يتحسّن مركزه أكثر من مركزين، على أفضل الأحوال، كذلك أحسب أنّ الكرة الموريتانية مُتطوِّرة، كفى أننا شهدنا تنظيماً بديعاً للدوري الموريتاني وهو أمرٌ كنا نفقده نحن في السودان حتى قبل اشتعال الحرب وأتوقع أن يحدث تطورٌ أكبر في الدوري الموريتاني والكرة الموريتانية في السنوات القادمة بصورة أكبر، خاصةً أن ممثلي الكرة الموريتانية يتواجدون في كُبرى الأندية الأفريقية، وفي بعض الدوريات الأوروبية وسوف ترتفع رقعة تمثيلهم بصورة أكبر في الفترة القادمة، وسوف نقول كلما تُحقِّق الكرة الموريتانية نجاحاً، إنّ الهلال سبق أن فاز بالدوري الموريتاني – السوداني (دبِّل ليهو) أحفادنا ح يقولوا لينا دي حصلت كيف؟ ح نقعد نحكي ليهم.
ح نقول ليهم الهلال كان عندو مدرب طلس مدرب قاعد ساكت جعل الهلال يصل لدوري الثمانية في البطولة الأفريقية، بعد غياب عن هذه المرحلة لمدة عشر سنوات، وفاز بالدوري الموريتاني – السوداني (دبِّل ليهو) وهو غريبٌ علينا، مدرب قاعد ساكت أكيد، ما في مدرب بفوز ليه بدوري (دبِّل ليهو) في موسم واحد. طبعاً من لهم رأي في فلوران من ناس الهلال ح يتفقوا لأول مرة مع المريخاب على أن الدوري الموريتاني ضعيفٌ، لا أعرف كيف يقول المريخاب ذلك على دوري يحتلون فيه المركز السادس (فضيحة السواد)؟! يتحدّثون عن ضعفه بعد أن خسروا فيه 9 مباريات، دوري خسروا فيه من رابع الطيش ومن ثالث الطيش ومن تاني الطيش ومن الطيش في عضمو، يبقى ضعيف كيف؟ حيث أصبح فارق النقاط بين الهلال والمريخ 17 نقطة وللهلال مباراة مُؤجّلة ستجعل الفارق إن شاء الله على أقل تقدير 20 نقطة.
الكلام دا بعد النمير وبعد مدرب إيطالي ومدرب سوداني ومدرب صربي ومدرب مصري والفرق يمكن أن يكون بين الهلال والمريخ 20 نقطة، فضيحة السواد (دبِّل ليهو).. أتاريهم ناس أسامة عطا المنان وعامر عثمان كانوا ساترين فضائح.. كانوا شايلين بلاوي!!! 20 نقطة وبهاجموا في فلوران أتحدث عن ند الهلال فريق المريخ الذي يبقى كبيراً في كل الأحوال.
دي ما حصلت قبل كدا الرقم القياسي بين الهلال والمريخ في الدوري السوداني كان مسجل بفارق 18 نقطة لصالح الهلال، هذا الموسم ممكن الفارق يبقى 20 نقطة!!!
الفأر كان عندو دور!!
فضيحة السواد!! (دبِّل ليهو).
كلو من فلوران بعمل في حاجات غريبة.. إنت بتعمل في حاجات زي الورد.. (دبِّل ليهو).
طيَبعاً المنتقدون لفلوران ممكن يقولوا ليك المريخ ضعيف وظروف الحرب وعدم الاستقرار الفني، طيب إنتوا يا فالحين وقت عارفين عدم الاستقرار الفني بعمل كدا، ليه بتطالبوا بالإطاحة بفلوران، عاجبكم عدم استقرار المريخ؟! (منطق غريب)، أما الحرب فهي كما وقعت على المريخ وقعت على الهلال.. إنتوا بتتكلموا عن الهلال السوداني وليس الهلال السعودي. وعن ضعف المريخ فالمريخ يبقى المريخ حتى لو شال الكورة وهرب. وهل هنالك ضعف أكثر من ذلك؟ فقد كان ذلك يحدث في السودان.
أما من يُشكِّك أو يُقلِّل من قيمة الدوري الموريتاني من ناس الهلال، فنقول لهم إنّ الهلال لم يأتِ للدوري الموريتاني من الدوري الإنجليزي أو الإسباني، وإنما جاء له من الدوري السوداني الذي يعاني في البرمجة والتنظيم ويعاني في الملاعب والتحكيم، وإن كان يتفوق الدوري السوداني على نظيره الموريتاني في الجانبين الإعلامي والجماهيري.. لكن حتى على مستوى النقل المنتظم للدوري الموريتاني في القناة الموريتانية يتفوّقون به على القنوات السودانية التي كانت تنقل الدوري السوداني، مع حاجة القناة الموريتانية لمراجعات في النقل التلفزيوني، إذ تبدو الصورة بعيدة إلى جانب إشكاليات في الإخراج والإعادة، ودي برضو حاجات نحن بنعاني منها. أضف الي ذلك تقنية الفيديو المستعلمة في الدوري الموريتاني وغائبة في السودان، وهو أمر يحسب لهم.
فنياً، ليس هنالك أي أفضلية للدوري السوداني على الموريتاني بل يمكن أن يتفوّق الدوري الموريتاني على السوداني في السرعة والقوة البدنية واللياقة.
المهم يا جماعة الكلام دا بنرجع ليه تاني، بس كلِّموا ناس المريخ وذكِّروهم بتهنئة الهلال، خلوهم يجهِّزوا لينا تهنئة معتبرة.. تهنئة غليدة (دبِّل ليهو) نحن ممكن نسامح في أي حاجة إلا في التهنئة دي.
الهلال حقّق بطولة مركبة بفوزه بالدوري الموريتاني السوداني (دبِّل ليهو)، فهو إلى جانب تغلبه وتصدره على كل الأندية الموريتانية، بما في ذلك نواذيبو الذي حقّق البطولة قبل هذا الموسم سبع مرات على التوالي، ليأتي الهلال ويتغلّب عليه في دوريه ويُحقِّق ما فشلت فيه كل الأندية الموريتانية، الهلال إلى جانب هذا الإنجاز هو تصدّر وتغلّب في البطولة الخاصّة التي تجمعه مع نده المريخ، بحساب المواجهات المباشرة وبحساب حصيلة الهلال في النقاط والأهداف في الدوري الموريتاني.. لهذا نطلق على الدوري الموريتاني – السوداني الذي يجمع بين القمة السودانية الهلال والمريخ والأندية الموريتانية دوري (دبِّل ليهو)، لأنّ الهلال حقّق البطولة دبل، الموريتانية والسودانية، دوري تربيع، لذلك نحن نُطالب بتهنئة ليها (ضُل) من ضُلنا حتى في الدوري الموريتاني غايتو الزول وقت يكون (ضُل) يكون ضُل طول عمره، في السودان وقت شالوا الكورة في أول بطولة للممتاز، وفي تنزانيا التي انسحب فيها المريخ من أمام الهلال في السوبر السوداني بعد التسخينة وفي سيكافا الأخيرة التي انسحبوا عنها أيضاً، وفي الدوحة (والي الدين)، وفي أبوظبي (النعسان)، وفي نواكشوط (الغربال).. ضُل في أي حتة، في أي زمان وأي مكان.
عايزين تهنئة (دبل)، وقت بتعرفوا تهنوا ما بنخلِّيكم، زمان كنا بنلقى ليكم العُذر، لكن تاني ما عندنا ليكم عُذر.
يلا هنوا يلا صفِّقوا كلكم.
زمان كان عندنا قريبنا اسمو (عباس خلي الملامة عليّ)، كنا بنقول ليه كدا، عشان كان زول لوّام لوم شديد، محل ما يلاقيك بتكسر ليك لوم، مرات تزوغ منو، ومرات تخلي ليه الشارع، عشان لو وقّفك ما بفكِّك.
يدور فيك لوم زي عريضة الطلاق!!
عباس خلي الملامة عليّ، كان وقت يلاقيك في مناسبة زواج بمسكك في العقد ويقول ليك: إنت مالك ما بترد على تلفوني؟ تقول ليه ضربت لي متين؟ يقول ليك الشهر الفات، قبل 21 يوماً كدا تقريباً زي الساعة (7) صباحاً.
تقول ليه (7) صباحاً ضارب لي مالك؟ إن شاء الله خير؟ (7) صباحاً لو ضربوا مصنع الشفاء ما بقوم، عاوز إنت وقت تضرب تلفوني أقوم أرد ليك!! يا راجل قول كلام غير دا.
يقول ليك أبداً، بس كنت بتغالط مع المدام، الكبير إنت والّلا أخوك الكبير؟ وإنت عارف الغلاط دا ما بقعد لي بعدين.. ما بنتظرها إلى أن تشرق كويس.
تقول ليه الغريبة رقمك مسجل عندي، لكن رقمك ما جاتني منو مكالمة.
يقول ليك يجيك كيف؟ أنا ضربت ليك من رقم تاني.
تقول ليه: والله ما عرفتك..
يقول ليك يعني إنت ما بترد على رقم غريب!!!؟ خلاص تاني بعمل ليك رسالة، قبل ما أضرب ليك، بس رد علينا، عشان الصباح دائماً أنا والمرا بنبدأ يومنا بالغلاط.. نقعد نتغالط كدا لامن تشرق، وبنحتاج ليك مرات في بعض المسائل. بنشرب الشاي بالغلاط بدل الزلابية.
تقول ليه جداً.
عباس خلي الملامة عليّ، مرات يلاقيك في المقابر، ويقول ليك: يا زول إنت مالك ما بتسلم، يوم داك شايفك من بعيد في المولد النبوي قدر ما رفعت ليك إيدي ما ردّيت عليّ، ولا عبّرتني، بعدين مالك ضعفت كدا؟ ضربك سكري والّلا دي الحرب؟
تتجاوز موضوع الضعفة دي وتقول ليه والله ما شفتك، أشوفك كيف في المولد مع الخلق دي؟
يقول ليك يا زول أنا كنت ظاهر، لابس طايقتي الحمراء، معقولة تكون ما شفتني.
تقول ليه: والله ما شفتك.
يقول ليك: خلاص عليك الله تاني طاقيتي الحمراء دي لو لاقتك في أي حِتّة أعرف طوالي دا أنا، عباس... عباس خلي الملامة عليّ بقول في الكلام دا والناس بتدفن، والميت بيسألوا فيه والمشيعون بيدعوا ليه.
الفايق لي طاقيتك الحمراء منو؟
وعباس خلي الملامة عليّ مرات بتلقاه في الكورة، الجابو اليوم داك الاستاد شنو ما عارف؟
محل ما تقبِّل تلقاه قدامك متل البرّاد الصيني.
الليلة الله يحلّنا.
من اَشوفو بقنع من الكورة.
يقوم يخلِّي الكورة ويمسكك إنت، ما تفهم أي حاجة في الكورة، من التسخينة يشبكك إنت ما سمعت بي التايا بنت جاب اللبن.
تقول ليه التايا بنت جاب اللبن مالها؟
يقول ليك ماتت.
تقول ليه متين؟
يقول ليك يا زول إنت قاعد وين؟ الزولة دا على الأقل كدا ماتت قبل خمس سنوات، أو سبع سنوات.
تقول ليه ما سمعت بيها أصلاً أنا ما بعرفها.
يقول ليك، عشان كدا أنا زعلان منك.. ما تعزيني في التايا بنت جاب اللبن؟
تقول ليه وإنت علاقتك بي التايا بنت جاب اللبن شنو؟
يقول ليك كيف؟ إنت ما بتعرف حسن تور الجك؟
تقول ليه ما بعرفو.
يقول ليك ما بتعرف صلاح ود كترينا؟
تقول ليه ما بعرفو.
يقول ليك طيِّب ما بتعرف تاج السر السنم؟ الزول دا هو وجدك المات سنة 64 قرأوا خلوة في الدامر.. قول ما بتعرفو كمان؟
كانوا دفعة واحدة !!.. أنا دفعتي ما عارفها، عاوزني أعرف دفعة جدي اللي مات سنة 1964م.
تقول تتخارج منه عشان تأخذ ليك نفس بين الشوطين والله الجري الجريتو مع عباس خلي الملامة عليّ، حكم المباراة ما جراهو.. تقول ليه أيوه بعرفو…
يقول ليك التايا بنت جاب اللبن القلت ما بتعرفها ديك.. تاج السر السنم بيبقى ليها خالها باللفة.
تقول ليه وعلاقتك إنت بالموضوع شنو؟
يقول ليك كيف: العراقي بتاعي السمني المُشخّط خيطتو عند خال التايا بنت جاب اللبن الشفيع السنم أخو تاج السر السنم البتكلم ليك عنو من بداية المباراة لغاية ما الحكم الرابع ما رفع الزمن البدل الضائع.
العراقي السمني بتاعي تعرفو؟ مرة ادّفق فيه شاي لبن الطيب سجلات عينو حارة مرة شافو، قال لي مالك قصير كدا؟ عامل زي فتيل الريحة لمن يكون في آخرو، تدسو في آخر الدولاب وقبل ما تتريّح منه تعاين ليه سمح في حسرة، من اليوم داك تاني ما شفت لي عافية أقوم وأقع من ملاريا لي تسمم زي شافع التسنين، الله يلعنو الطيب سجلات عينو زي اللجنة الشعبية ما بتريّح ليها زول.. زي لوح الطاقة!!
تقول ليه: طيِّب البخليني أعزيك عشان خياطة عراقيك السمني شنو؟ كمان العراريق دخلت في صلة الرحم؟ والّلا عشان لونه سمني؟
تقوم تقيف فجأة، بعد ما روحك تطلع وأقول ليه خلاص أنا طالع، عشان ألحق المواصلات قبل الأبواب ما تزدحم، الزمن بدل الضائع دي عندك حاجة عاوز تقول ليّ فيه؟
يقول ليك أبداً، بس عليك الله لمن نضرب ليك رد على التلفون، عشان مرات أنا والمرا بنقعد نتغالط وبنرجع ليك في بعض المسائل.
تقول ليه جداً.. وإنت طالع كدا، الحكم يصفر معلناً نهاية المباراة، بتشوف أقرب زول جنبك في المدرجات وإنت في الطريق للباب وتقول ليه: أسمع الكورة انتهت كم؟
الزول بعاين ليك كدا وبفتكرك من بتاعين الملح البدخلوا بعد ما يفتحوا الأبواب، وبقول ليك، الواحد طول وعرض ولابس نضيف، ويدخل ملح، إنتوا وقت بتحبوا الكورة ما تدفعوا.
عباس خلي الملامة عليّ مرات بلاقيك في الفرن. بقول ليك إنت مالك ما بتكفِّر لي؟
تقول ليه مالك، أكفِّر ليك شنو، تراكا شديد ولضديد متل الحصان، يكفِّروا ليك في شنو؟
يقول ليك الأسبوع الفات كانت عاوز تقرصني عقرب، والله مرقت منها بي بنط.. مرقت منها بكرامة البليلة.
تقول ليه: والله ما سمعت بيها، ولو العقرب لدغتك، كنا بنجيكم عشان نكفِّر للعقرب.
بفتكرك بتهظر وإنت قاصدها!! تقوم تفوت تخلي العيش، خليهم يعملوا أي شئ، كسرة، قراصة، عصيدة، إن شاء الله ما نأكل، بس نتخارج من الفرن دا.
وعباس خلي الملامة عليّ، مرات بلاقيك في المستشفى وإنت بين الحياة والموت، شغّال فحص وكشف، يمسكك في غرفة الموجات الصوتية، ويقول ليك: بنتي يخطبوها ما تبارك ليّ؟
تقول ليه، إنت عندك بنت؟
بقول ليك إيمان بنت عمتك خطبوها.
تقول ليه وإنت علاقتك بي إيمان بنت عمتي شنو؟
يقول ليك إنت ما عارف إيمان دي زي بنتي، أكلت سمايتها وشربت شاي اللبن في السماية حقّتها بالزلابية، وما تبارك لي؟
تقول ليه لكن إيمان دي أقرب لي منك.. إنت مفروض تبارك ليّ.
يقول ليّ يا زول إنت نسيت، أنا شربت في سمايتها شاي اللبن بالزلابية، إنت شربت في سمايتها الشاي باللبن بالزلايية؟
أقول ليه أبداً؟
يقول ليّ طيِّب مالك؟
تقوم تسكت يمكن علاقة الزلابية بي شاي اللبن في الزمن دا بقت أقوى.
زي العراقي السمني!! والطاقية الحمراء.
يمكن البلد دي أي حاجة فيها بقت جائزة.
قبل ما يفوت بقول ليك أسمع خلي تلفونك فاتح يمكن نضرب ليك في أي وقت، عليك الله لو مسكلت ليك أرجع ليّ.. الشبكة مرات بتكون كعبة، عشان كدا يمكن أمسكل ليك (4) صباحاً، عليك الله أرجع لي ما بكون عندي رصيد.. خلي الغتاتة وأرجع ليّ من أول جرس، أنتوا القروش دي عاوزين توديهو وين؟
أقوله تمسكل ليّ (4) صباحاً ليه أنا دكتور نساء وتوليد؟
لكن عشان أقفل الموضوع بقول ليه جداً، وأقوم بدون ما أشعر "كركرب أجي واقع".. نسيتوا إني في المستشفى.
الجماعة بقولوا للدكتور يا دكتور الزول دا مالو؟
الدكتور بعاين لي الموجات الصوتية وبقول ليهم الزول دا هسع في وقفتو دي طقتو مُسيّرة.
دا شغل مُسيّرة عديل الدكتور ما عارف عباس خلي الملامة عليّ، أخطر من المُسيّرة.
أها أنا عاوز أعمل لي ناس المريخ زي ما عمل لي عباس خلي الملامة عليّ، يمين ما تهنئوا الهلال بالدوري الموريتاني السوداني (دبِّل ليهو) أشبككم زي الفاتح جبرا رحمة الله عليه وقت شبك الجماعة بمطار هيثرو.
يلا صفِّقوا كلكم!!
…
متاريس
نحن ما بنخلي حقنا، أقصد ما بنخلي تهنئتنا.
يا تهنونا يا تهنونا.
الدوري دا نحن تعبانين فيه وإنتوا الجهاز الفنى حقكم بقى زي (غيار الزيت) كل شهر بتغيِّروه!!.. دوري غيّرتوا فيه الجهاز الفني 4 مرات واحتليتوا فيه المركز السادس أنا ما عارف علي جعفر دا في شنو؟ المركز دا ما عاوز ليه مدير كورة، ولا عاوز ليه حارس مرمى.
أكيد ثلث كشف المريخ مُهدّد بالشطب بعد التقارير التي وصلتنا من جان كلود، إذا أقيم الدوري السوداني.
يمين كسلا فيها حلاة فتك ومتك.
نصيحة لمصعب مكين، الكلام دا ما بتقدر عليه، أحسن شيل دفتر العيادة.
نحن زمان كنا بنزوغ من الاختبارات وحصة التسميع بي دفتر العيادة.
نحن كنا شفوت.
وعارفين أي حاجة.
الشئ البضحِّك، ناس المريخ عادي ينسحبوا من أمام الهلال، فعلوها في السوبر السوداني وفعلوها في سيكافا، هسع بلاحقوا في الاتحاد عشان ينظم الدوري السوداني.. ولمن تأتي ساعة الجد بنسحبوا!!
يا كابو خليك قريب.
جان كلود دا ناس مصعب مكين ما بقدروا عليه.
...
ترس أخير: صلاح نمر بكون أكتر زول مَبسُوط من جان كلود الأيّامَات دي.

انقر هنا لقراءة الخبر من مصدره.