تقدم العالم حولنا واصبح قرية صغيرة واي شئ فيه متاح الا الدوري السوداني لكرة القدم لو دافع ومشترك في الجزيرة مابتشوفو شفتوا التخلف دا كيف . لو داير تحضر كورة الا تمشي الاستاد وتاخد سوطين من العساكر وتدافر وقبلها تقيف ساعة في الصف عشان تقطع تذكرة ... اسع عليكم الله انتو من زمن التذاكر الببيعوها بالصف .. مش قلتا ليكم عالم متخلف . عالم ماتتقدم اصلو ...... ماعلينا نرجع لي موضوعنا تاني تخش جوه حدث ولاحرج كراسي وسخانة وفيها طين وصغيرة بنصحك لو ماشي الاستاد البس هدوم وسخانة ولو كنتا سمين احجز مقعدين انتو الدخل الفرحانين بيهو دا بتودوا وين ماتنضفوا بيهو كراسيكم دي . على العموم دا كلو هين العوجة في وقفة التسعين دقيقة جمهور الكورة كلها واقف والله انتو عندكم لياقة عند اللاعب السوداني مافي ... اسع اللاعب السوداني دخلو شنو .. اها يعني بالطريقة دي لو ماشي الكورة من الدوام الا تكون ماخد اليوم القبلو اجازة وعامل لياقة او تاخد اليوم البعدو اجازة وتريح فيهو ... يعني مثلا انا ساكن الكلاكلة لو داير امشي الكورة معناها ما ارجع البيت من الشغل اتغدى بره وامشي الاستاد عدل اطلع من الكورة الساعة عشرة احصل الكلاكلة الساعة 12 التقول راكب بص الوالي .. باقي ليكم بكرة بقدر اشتغل .بص الوالي تطير عيشتو. بس كلامك بتاع الاجازات دا بخلي الناس عطالة ... ياخي مايعطلو هو الدوري مامنقول الشغالين ليها شنو .. انا المحيرني سوداني دي راعية الدوري لي شنو يعني الجمهور حيشوف لافتاتكم دي ولا حيشوف جائزة نجم المباراة الشالها اتوبونغ . انا اسع جبت سيرة لي موسي الزومة ..سوداني دي قروشا محرقاها ساااااااااااااي. اسع دا دوري يرعو. دوري نقل مامنقول راعية شنو الجاتكم .. قالو ليك في بتاع كارو جا مكاتب الاتحاد العام قال للناس بره (نادو لي الزول المسعول هنا ) طلع ليهو مجدي ياهو مجدي ذاتو القال لا جديد في موضوع النقل .بتاع الكارو قال ليهو (قالو لي عندكم كور بدورو تنقلوها ) مجدي قال ليهو انتا ماسمعتا تصريحي الجديد في موضوع النقل امشي تعال الدورة التانية .. اسع عليك الله وكت مادايرين تدو لي قناة ما تدو لي بتاع الكارو دا ينقلو نحنا بعد داك بنتصرف ندي لي ياتو قناة اسع موضوع القناة دا موضوع . انا عارفكم فرحانين بي الدخل بس ان شاء الله سوداني تسحب منكم الرعاية والجمهور يفلس ومايخش تاني ودوريكم يبور ويعنس ومافي قناة تشتغل بيهو .. بتاع الكارو مايجيكم تاني .. اسع بتاع الكارو ذنبو شنو.. اموت واعرف الاتفاقيات الاربعة ولا الحريات الاربعة بين مصر والسودان دي مافيها موضوع النقل ولا شنو اسع الدوري المصري منقول في تسعة قنوات والدوري السوداني بالكارو مانقلو .... الدوري المصري تطير عيشتو مما نقيت فيهو لغو . فلاحتكم بس تسجلو بي الحريات الاربعة لكن اصلو مابتنقلو بيها .. اسع في زول جاب سيرة الحضري .. تخريمة : مسطول قاعد يحضر في كورة جا واحد سألو انت بتشجع منو ؟ المسطول قال ليهو : انا مامحيرني الا اللاعب اللابس اسود في اسود داك من قبيل لافي الميدان زي كيس النايلون ولمن الكورة تجيهو بجري منها خايفا توسخو واللافت نظري اكتر كل دقيقة بطلع كرت مرة اريبا ومرة زين وبرفعهم فووق اظنو الشبكة طاشة منو دايرة تجي عشان يشوت فيها ... دا شبكتو ماطاشة دا برفع في شارة البث للجزيرة .. انتو في دوري السنة دي يعميني ماشفتو لا في الولايات لا في دول المهجر وهنا ذاتو الا لمن استطاع اليه سبيلا غايتو يامعتصم الله يسامحك . دمتم في امان الله وجمعة سعيدة