(التيار) الباب البجيب الريح العريس في نص الدارة يهوش.. ويبشر.. وينطط..ويضحك بي سبب وبدون سبب... الفنان يجتهد ويغني حم ما الله اداهو.... الولاد يبشرو ويعرضو...ما فيهم واحد يهز جذعه طربا.... والا بنات اعمو يحردن.... عيب.... البنات ينزلن يرقصن اتتنين اتنين..او اربعة اربعة ..او تلاتة تلاتة كيفما اتفق..... العريس هو البيرشح البت البترقص.... الترشيح مسموح للعريس وعند غيابه في مهمة جلد للجماعة الدايرين ينجلدو يحل محلو وزير العريس....يقوم البنت بعد ان تبدي تمنعا... ويتمنعن وهن الراغبات....تقوم ترقص.. رقيص رقبة.... الشبال بحقو ..دفع مقدم تمانية سيطان في ضهرو اسكراتش ابو تمانية الاسكراتش الجد جد.... كان الرقيص كدي زمان ...... الرقيص للبنات بمثابة اعلان عنها لو كانت غير متزوجة.... اخت العريس احيانا هي التي تصر على البنات ان يرقصن..... ولو ما رقصتي بكرة الحلوة بتجيكم ورقبتن تتمدا ترقص في عرس اخوكي تتقطع... تدفنيني تقومي.. الرسول يتعارض لك تقومي... تقول الرسول عزيز وغالي وحات الله بس عشان خسمتيني بالرسول...تقول كدي وهي دايرة ترقص ...ترقص فتبدي تفننا واتقانا ... ومعرفة تامة .. وايقاع موزون ومدوزن...ترقص لكن اوعى تبدي ابتسامة او ضحكة ترقص وهي جادة كل الجدية قافلة خشمها....ولو الله غضب عليها وابتسمت وهي ترقص تجي في البيت ويعقد لها مجلس محاسبة وقد تحرم من الرقيص الي يوم القيامة...اما حسي في الزمن العلينا دا.... كلو يرقص.. العريس علي العروس.... رجال ونسوان وشفع..... كبير وصغير.... البنات يرقصن لا شحدة ولا حليفة بالرسول......الواحدة تلقاها تتحرقص فوق كرسيها...وبعد مرات تلقاها ضيفة جاية مع صاحبة اخت العريس تستلم الرقيص وتقعد ترقص وترقص لمن نفسّها يتقطع....ترقص وشايلة الموبايل وتصور وبعد مرات ترفع ايديها فوووووق وتكورك( اوروروووووك) في لحظة طرب مست مشاعرها فقام عليها الظار..وتدي الموبايل لصاحبتا تقول ليها ( يعني يا هناية صوريني وانا برقص) فتصورها صاحبتا... واخوها بهناك يرقص ويصورو صاحبو... موبايلات تصور... وكميرا فيديو تصور...والعائلة كلها ترقص الاب على الام على الاخوان والاخوات....زمان كان الواحد لما اختو تعرس... من الخجلة ممكن يسافر من البلد." التوم ود الزين كان ولدن ضو وضكران خلاص.... اختو عرسوها سنة سبعة وستين سافر ولي يوم الليلة ما جا".. و لو ما سافر كان لما اختو تجي ترقص لقطع الرحط... يمشي يدسا في طرف الحلة في اي بيت.... حسي تلقاهو واقف في خشم الباب... واختو ترقص جوا ويتفرج.... ويجي بكرة يقول ليها( والله امبارح بالغتي... حتيتيهو حت شديد)..... وممكن في اختيار العلاّمة البتعلم الرقيص لاختو يكون ليهو راي.... فيشير عليها بان ترقصها علانة الرقصت فلانة...وممكن يمشي يحجز لها في الفندق عشان شهر العسل...وبتاع الريسبشن في الفندق يسالو( مبروك!! انت العريس؟)..ودا هنا يضحك ويقول ليهو( يا ريت!.... العروس اختي)..... قفل الباب:- لا تتعبي نفسك يا غاليه في البحث عن تجاربي الماضيه كل نساؤ الأرض في كفة وأنت يا أميرتي ، في الكفة الثانيه .
