بسم الله الرحمن الرحيم في السلك اسمحوا لي الليله داير اتكلم عن الوطن شويه وطنا الجميل رغم انف المستحيل وطنا الغالي برغم اي سعر يفوق مقدراتنا وطنا الحلو ده بالمناسبه تحضرني عشرة ونسه كانت مع الحاجه المرحومه نورالشفيع والدة الدولي كرار ابو علي ووالدتنا جميعا الصباح بدري جيت عليهم في البيت بدري الكلام ده زمااااان كانت قاعده وبتسمع في الراديو برنامج الصباح وصينيه الشاي امامها اوانيها فارغه الا من آثار الشاي باللبن جلست جوارها ابتسمت لي ابتسمت لها وكانت تستمع باهتمام للمذياع استمعت معها مذيع ومذيعه يتبادلان في عباراة المحبه والثناء للوطن المذيع 000 اشرقت شمسك ياوطن واحتضننا صباح جديد من صباحاتك المشرقه المذيعه 000 صباحك ياوطن يدغدغ الافراح فينا المذيع 0000 فركبنا ياوطن علي صهوة الانتماء اليك المذيعه 0000 وحملنا يا وطن اليك البسمات زادا في مسيرة يومنا حاجه نور قفلت الراديو واطلقت آهه طوووووووووويله واتلفتت علي قائله الراجل يشيل ويشكر الوطن الوطن 000 المرا تشيل وتشكر الوطن الوطن 000يلفح منها الراجل ويشكر الوطن 0000 تلفح منو المرا وتشكر الوطن الوطن ماعرفناهوا ياسلك ياولدي البشكروا فيهو ياهو وطنا ابو شاي الصباح بالتمر ده ولا وطنا تاني وضحكنا بدري الكلام ده اليومين دي كل الحديث يدور حول الاستفتاء هل سينفصل الجنوب ! هل يستمر الوطن واحد مليوني ! نقول رأينا ايها الناس نحن من نفر عمروا الارض اينما سكنوا غنينا مافي شمال بدون جنوب ومافي جنوب بدون شمال كلنا اخوان كلنا اخوان غنيناها ليس مجامله لمايو ولا كسير تلج للاتحاد الاشتراكي ولا لدعاية انتخابيه ولكن غنيناها قناعة راسخه في النفوس لاننا اول ما تعلمناه كان منقو قل لاعاش من يفصلنا نحن لانوافق علي الفصل ولا نوافق علي الانفصال لسنا علي استعداد لكي نفقد كواتو الرائعه ولسنا علي استعداد كي نفقد فرقة واراب للاداب والفنون ولسنا علي استعداد كي نفقد استيفن اخانا في الوطن والفن والهم ولسنا علي استعداد كي نفقد رنة عربي جوبا وانة لغة الدينكا في السننا التي احبتها بمثلما تحرك الدلوكه في حنايانا فان البالمبو يداعب الوجدان هذه هي دواخلنا لن نتخلي عن الجنوب ونحن تربينا علي ايدي مقايا (رحمه الله ) ودرسنا مع ابو بكر دينق وكمال احمد زايد (ده ولد الحكم الحكم كورة المريخ والهلال في افتتاح جامعة جوبا وفاز فيها المريخ بهدف سامي في الدقيقه الاخيره ) تراثنا الغنائي فيه جوبا مالك عليا انا جوبا شلت عينيا وحلاة اتوك يحضن التك وفيفيان ياناس جنوبيه وطن واحد وطن واسع لايقبل القسمه ولكنه يسع الجميع وطن لانتخيله نص نص ما بكفينا لازم وطن كامل ممكن تشوف زول ببنطلون بدون قميص ! نحن نفخر بالتشكيل العرقي في الصحن السوداني حلاة الجرجير الاخضر وهو يحتضن الطماطم الاحمر التي تستلقي علي خد الجزر الاصفر محفوفه بالعجور الحرجلي جوار بصله بصلية اللون والملامح اجتمعت في صحن السلطه السودانيه الوان ومذاقات ادهشت العالم والاعين والالسن صحن سلطتنا المميز لانتخيله ناقصا لعنصر من عناصره التي تميزه عن الآخرين الحاجه المحترمه المرحومه نور الشفيع ماشفت الوطن البلفحوا في شكروا المذيعين وطن عاش واستمر ولابد ان يفضل الشمال والجنوب اسكيرت وبلوزه خايلات مع بعضهما البعض وماشات سوا سلك كهربا ولا حته ما بتتقسم منك يا رائع والي لقاء سلك babikir maki [[email protected]]