بسم الله الرحمن الرحيم في السلك • جينا • من كل البقاع • من كل حدب وصوب • جينا • مليانين (فل ) • بعشق الوطن • جينا عشان نشجع الوطن تشجيع الرجال • جينا لانفرق بين عمر وزيد • ولكن ننتقي شعار الوطن • وندثره بالهتاف الحلال • ولكن • كان للقدر معنا ميعاد • عندما يصاب الانسان بعد ان يأخذ الحيطه والحذر اللازمين يكون هو القدر بعينه • ولكن عندما يهمل الانسان ويصاب حرام عليه ان يرمي اهماله علي القدر • وهذا ماحدث منا • لم نحسن الاختيار • ولم ندفع باصحاب المرحله من الشباب ليمثلونا في بطولة المحليين • ظلمنا الشباب • والشباب هذه الايام يلتقي بالفيس بوك بقلب عاليها واطيها • فما بالك اذا التقي الشباب بالميدان • لو لعبنا بفريق حارسه جمعه وطرفه بويا وارتكازه السعودي وصانع العابه جوجو وراس حربته فضل بابور ومصعب وراجي ورمضان عجب ومعاهم كم شبل كده ومدرب خواجه اضنينو حمر تفتكروا كان طرنا ؟ • ولو طرنا تفتكروا كان خسرنا ؟ • بالتأكيد كان كسبنا لاعبين شباب بخبره دوليه حتي ولو طرنا وهو المطلوب • خلاص • طيرتونا وقعدتوا • راعي الضان في الخلا يعلم تماما ان كاريكا ضعيف في تنفيذ ضربات الجزاء • والدليل الموسم الماضي • اضاع ما اضاع منها • وحتي التي احرز منها تكون علي دفعتين • ومنها كورة جزيرة الفيل • بتاعت البلنت الضرب في الماسوره ورجع للماسوره واحتسبه خالد عبد الرحمن هدفا • وفتحنا خشومنا دهشة من ذلك الهدف • وقبل ما نقفل خشومنا من فرط الدهشه • فاجأنا الاخوه خبراء التحكيم باستفسار الفيفا عن ماهو حكم من لعب ضربة جزاء وضربة في الحديده وعادت لنفس اللاعب واحرز منها هدف • ومازاد من دهشتنا انو ما سمعنا برد الفيفا لليوم ولم نسمع بملاحقة اهل السؤال للفيفا عن الاجابه لسؤالهم • ولكن كانت قمة الدهشه في اختيار السيد محمد عبدالله مازدا للكابتن كاريكا لتنفيذ ضربة الترجيح • واحد في الاتنين • يامازدا ما متابع الممتاز • وهذا قصور منه كمدرب للفريق القومي • واما انه درب كاريكا علي ضربات الجزاء • واثبت كاريكا فشله في ذلك • تاني الضيع منو ! • طيرتونا وقعدتوا ! • طيرتونا بالعشوائيه وعدم التخطيط السليم • بالارتجال وقوة الراس • بالخيار والفقوس • بالكليه المرضتنا دي • كليه لابتخرج زول • ولا بترفد زول • ولا بتقبل زول جديد • طيرتونا وقعدتوا ؟ • لو الاماني بايدي كنت اهديك عيوني واسقيك من وريدي • كنا نتمني ان توج بالبطوله • والبرنس يرفع الكاس • عشان يكلل مسيرته الطويله ببطوله دوليه • لكن ليس كل ما يتمناه المرء يدركه • توج البرنس مسيرته الدوليه بكرت احمر • لا لانه تمناه • ولكن لانه فقد اللياقه والتركيز منذ منتصف الشوط الثاني • ولكنه بقي • ماعارف • بقي لانه لم يطلب التبديل • ام بقي لان مازدا اراده ان يبقي • ياناس • الكوره عند ناس انجولا تشعر بانهم لديهم تكتيك معين ينفذونه • الكورة عندنا • ماشه وين هي زاتها ماعارفه • خلوها كورة انجولا • من بداية البطوله • في زول عارف نحنا لاعبين كيف ! • ولا مازدا زاتو لا اظنه يعرف كيف كنا نلعب • ايها الناس • يجب ان نستفيد من التجربه • نقيمها بكل تجرد • حبا في الوطن • نعيد النظر في كلية الطب • وفي عميد الكليه • تاريخ الطب لا يخرج طبيبا ناجحا ياناس • يكتب ليك روشته دواء يكون مصنع ذلك الدواء قفل ليهو تلاته وعشرين سنه • فكونا من النمطيه • والوجوه التقليديه • العصر عصر الشباب • اطلقوا العناء لهم • بالتأكيد سنصل لمنصات التتويج • طيرتونا وقعدتوا ؟ • تتذكروا ابيات الطبيب الخفي التي نشرناها اول امس ؟ • للتذكير • يقول في آخرها • يبقي عيب علينا نستضيف بطوله******* وتمشي لي سوانا • وبقت علينا • العذاء الوحيد في اليوم الختامي • يجب ان يكون يوما قدرنا ويشرفنا • طيرتونا خلاص ؟ سلك كهربا لا انت بتتنسي ولا يوم امس بتنسي والي لقاء سلك babikir maki [[email protected]]
