بسم الله الرحمن الرحيم ناس الفشخره بحق الناس ديل أمرهم غريب وحات الله، ناس فاشر السلطان قبل عام تعرضوا لنهب وقرصنه (تخطيط دكاترة ولعيبة الحجر والبيضة) كاوشت حتى مصلاية الصلاة بفقة الفهلوه وعدم مخافة الله ، ماسورة العمليات واقفين على رأسها ناس الجلد والراس من جهابزة ودكاترة وجقار المؤتمر الوطنى بالولاية يتقدمهم جقر لو رأيته لاستعذت بالله ألف مرة ومشيت لخليل طوالى، سوق مواسير مكرب ومحروس بجقار الخرطوم ، ووزارة العدل المسئوولة من حقوق خلق الله عينة فى الفيل لكن قالت ضلو أخطر ، والشغلة الوضحت لينا تسفية الجماعة ديل للعدل فى السودان، فما صرح به الوزير حاج ماجد سوار فى شأن اللقف واللحس والهبر( الممارس من ناسو) وكيفية المعالجة دليل حى على خراب البلد ، أي حاجة فى البلد قصوها ثم خصحصوها وبلعوها بدأ من الاتصالات وانتهاءا بالماعارفنها كويتية ولا سودانية ، واليومين ديل سواطيرهم بسنو فيها لل24 شركة حقت القطاع العام ذى ما قالوا ، هى الشركات دى ما حقتم من يوم 30يونيو وفروا ليها ميدان اللعب الكاشين بيهو بقية شركات خلق الله ، لاضرائب ولا زكاة وعينهم محمرة طوالى للمراجع العام البيقبل عربات التأمين الصحى المؤجرة لسعاتو وبرضها الشركات دى قالوا خسرانة ، الشركات دى يا حبايب كانت ذات شأن إقتصادى أيام نميرى بدروشتو الطلعتو برة سور أحمد شرفى ، جو الجماعة المتسلحين بادوات الشفط المالعب فصارت شركة كردفان للتجارة مختصة بصناعة الكوارو وصناعة سروج الحمير ، وشركة الجزيرة للتجارة والخدمات تحولت لفرش الجرجير والعجور بسوق الفراشة بمدن الجزيرة وطبعا بدون ايصالات محلية وكشة دفارات النظام العام ،وشركة الامن الغذائى خربانة وجعانة من ايام يوسف عبد الفتاح ودى قصة طويلة بطول شرحها ، وشركة بشاير للطرق والجسور يفطها مالية الشارع ومقرها وزير الطرق والجسور ما عارفوا ، لكن البجنن شركة اسمها شركة المشير الاستشارية الشركة دى فى الاساس حقت منو يا سعادة المشير.............. ؟ صديق ابوعمار
