أكتر حاجة عاجباني في كلام أبوجريشة عندما قال في رده علي البرير إنه (يقصد البرير) ماند ليهو وإنه صعد السلم في المريخ من لاعب كورة مع المريخ (شوط واحد) ده حسب كلام ناس النهضة زمان طبعا هسي بعد ما الجماعة كلهم بقوا تحت مظلة جمال الوالي ممكن يقولوا لعب قدر اللعبوا هيثم مصطفي في الهلال.. وإنك تكون تحت مظلة الوالي في السخانة دي رحمة والمظلة المقصودة هي المظلة ماحاجة تانية عشان ماتفهمونا غلط يعني القصة مافيها إمكانيات الرجل المالية (الصبابات) . وسبب العجب أن الرجل نسف جمال الوالي من جذوره الرياضية لأنه إذا كان البرير ليس صاحب إرث كروي مثل أبوجريشة لاعب الشوط الواحد المؤكد ان جمال الوالي لم يلعب (أم الحفر) في المريخ حتي يكون ندا لأبوجريشة لذا لن تنفع محاولات الرجل لوضع بعض المساحيق علي صورة الوالي بعد ماتأكد أيضا أنه ليس ندا لأبوجريشة ولن يغير من هذا الواقع أن يقول مثلا (المساس بالوالي مساس بالكيان) وهو هنايذكرني بقصة طريفة تتحدث عن شخصية مشهورة في المجتمع كان في إنتظار إحدي السيدات وهي أيضا من مشاهير المجتمع .. إستقبلها في الشارع زي مابيقولوا وبعد التحية والمجاملة وإتفضلي وفي اللحظة التي هم بمغادرة المكان مع ضيفته أوقفه شخص آخر ليأخذ معه فترة من الوقت ثم يسرع للحاق بضيفته التي كانت قد سبقته للمكتب وقبل أن يجلس إعتذر لها علي تأخيره عنها بسبب الزول (الشين) القابلوا بره فما كان من سيدة المجتمع الشهيرة إلا وأن باغتته أن من يتحدث عنه هو شقيقها وبسرعة بديهة حاضرة رد الرجل (مابتتصلح يافلانة مابتتصلح) . وأبوجريشة هنا لايختلف عن (درابة) الرجل التي إعترف أن إصلاحها صعب وحكاية أن المساس بجمال الوالي مساس بالمريخ الكيان لن يغير من حقيقة أنه وبمقاييس أبوجريشة ليس ندا له .. فالوالي في أقوال صلاح إدريس هلالابي بالميلاد ومشجع متعصب له أرشيف صور يؤكد مساندته للهلال وهو يلبس شعار الهلال بجانب أن أصل وجوده في المريخ قرار سياسي من رئيس الجمهورية لاعلاقة له بلونه الرياضي .. وبالتالي لاتوجد مجرد مقارنة بينه وبين أبوجريشة حتي ولو كان بجيب الكور من بره خلي لعب شوط ولا نص شوط ... انتو عارفين انا متكيف برضه من جمال الوالي لأنه بخت كل زول في مكانه يعني أبوجريشة الربط المريخ الكيان برئيس المجلس الحالي وجعل الإساءة ليهو من الإساءة للكيان ماقال الكلام ده نهائي لما كان في مجلس ودالياس انا خايفو يكون نسي ودالياس ذاتو خلي يقول الاساءة ليهو إساءة للمريخ الكيان مع العلم إنه ود الياس صاحب فضل كبير علي الرجل وهو إن لم أكن مخطئا من قدمه للمريخ بعد عودته الشهيرة من بوابة الدعم .. شفتو البوابة دي قديمة كيف؟ يعني مابداها صلاح إدريس وجمال الوالي .. بل علي العكس لو بالتاريخ في دي برضه جمال الوالي ماند لأبوجريشة . شفتو الزمن بعمل في الناس كيف .. أبوجريشة من الرجل القوي في المريخ وصاحب الكلمة والبعبع لمجموعة النهضة ورئيس دائرة الكرة الاشهر والتي كان يطلق عليها اعداءها إسم الدائرة الشيطانية تحول إي شخص وديع يدافع عن جمال الوالي بعد ماكان لديه جيش بأركان حربه يدافع عنه شفتو الزمن ؟ أما ناس النهضة فقصة طويلة عايزه ليها قعدة . hassan faroog [[email protected]]