Awad Hassan [[email protected]] سوء تفاهم بين فراش ووردة والنسيم يتدخل منحازا للوردة .................................... الورد دايما بيبسم جوّ قلب النّاس بيرسم صورة لي روعة جمالو لرشاقتو وانفعالو سر عظمتو واكتمالو برضو واضع في احتمالو إيه بنقّص من كرامتو لمّا يكشف عن وسامتو ويهدي للناس إبتسامتو .................................. الورد خات في ضميرو إيه بضيرو ................... لو مصيرو يفوح شذاهو ويهدي للأحباب عبيرو ................................... ديمة في أعماقو شايل لهفة الشوق والرسايل خاتي دايما في اعتبارو إنو درب الحب مسارو في شعارو الإعتيادي الورد لابعرف إكره لا بعادي ................................... مرّة طلت وردة قالت من رحيقا الدّمع سالت تشكي من روعة صباها من جمالا ومن بهاها تبكي من حرقة حشاها من فراش مغرور غشاها جرح خدودا رشف نداها .................................... ديمة شايلا جمالي غنيه قلبي فاتح ابوابو دنيا ماني فاكره في ناس بتقسى للمحبة كمان بتنسى عارفة إنو خدودي واحة قلبي دايما ليها مرسى زي نضاري واخضراري حبي ظاهر في احمراري لا مظنّة ولا مدسّة .................................... الفراش كايس طريقة يسكّت الوردة الرّقيقة ياوردة يا متمرّدة أصلا بداية الحب كده لمّا شفتك إنزهلت بنضارك إنبهرت قلبي رفّ وحلقي جفّ قلت لو ألمس خدودك من رحيقك شلت رشفه لاني خاين مرة خنت لاني غدار يوم غدرت إلاّ بس أغراني حسنك قلت اقاوم ماقدرت ، منو البقاوم لجمالك كل زول في قلبو شالك في المناديل والأغاني مرّة في كروت التهاني مع الأماني، ياوردة مالموضوع غرور لمسة خدود رشفة ندى ، ياوردة ماجربتي حب ولا عيونك سهدا ؟؟ الحب دا نار متوقده رويحتي بالشوق مجهده من يوم بدا قلبي لا ارتاح لا هدا مرات بيسرح في المدى يرجع يكلّم في الصّدى ياوردة يامتمرّده الحب دا حال متفرّده لا عندو ساس لا قاعده ناس تقصدو وناس يقصده ناس تزهدو وناس يزهده ناس تعبدو ويستعبده ناس تكتمو ويسهده ناس ترفضو ويتودده ناس تنكرو ويهدده ناس تقربو ويستبعده ناس تبعدو ويتوعده ناس تقبلو ويوحده ناس تجبرو ويحايده ناس سارحا فيهو مشرّده ناس ساكنا بيهو مقيده ناس في سعادتو ممدّده ناس للجحيم متوسده يا وردة يا متمرّده أصلا حكاية الحب كده ........................................ الوردة ملّت للجدال يافراش مافيش مجال للملام والإنفعال تاني أعرف في المثال زي الغمامة لقاي محال لو كنت عاشق للجمال أغزل وأنسج في الخيال ...................................... الفراش أصبح وجيع ياوردة خوفي بلاك اضيع كيف استطيع بعدك أحلّق في الغمام وافرح واغني مع الربيع ما إنتي عارفا هواي دفين قلبي في حبك سجين لو رفض قلبك يلين بقبل هلاكي مع اليقين ياوردة يامتمرده معقولة بس للحدي ده تصبح حياتي مهدده ....................................... مرّ النسيم والدنيا غيم شاهد الجو مضطرب الوردة تبكي وتنتحب الفراش واقف حزين مجروح قلب يشكي ويسب للحبّ يوم أو عاوز يحب ،، النسيم سمع الحكاية من البداية قال للفراش خليك بعيد وشوش علي الوردة ومسح دمع الخديد (( معذورة يا ست الجمال يالفي الحسن ماليك مثال أصلو الفراش مغرور بليد وكمان عنيد ،، ( تعال يا غبي أديك كدا !!! لفح الفراش بإنفعال خلاص شفت ومقدده عامل صبي بئر التفاهة محدده وفي الحب كمان عامل نبي الحب دا حالة مجرده يسري في الرّوح يسعده ناس تعرفو متأكده ناس تجهلو زيك كدا،، الحب دا مالعبة حشر ولا كمان حالة سعر منو العلمك خلاك عنيف وملاكا شر ؟؟ ردّ الفراش في صوت حزين (تعلمت من فعل البشر