في حاجات غريبة بتحصل في الكورة ما موجودة إلا عندنا ومن أمس إلي اليوم شهدنا ثلاثة من غرائب الكرة السودانية أول هذه العجائب والغرائب في منتدي إسمه منتدي جماهير المريخ عمل إحتفال لنجم الموسم ووقع الإختيار علي لاعب المريخ الإيفواري باسكال نجما للموسم .. الغريب إنه نجم الموسم بدون تحديد يعني لو قالوا نجم الموسم في المريخ كان (بتتبلع) أو لاعب الشهر من المريخ حسب الفكرة الأولي لتشجيع نجوم الفريق لكن نجم الموسم بالطريقة دي ده إختيار حقنا زي لما تختار أفضل صحفي رياضي وهو في الأصل كاتب نادي (الهلال أو المريخ) صعب يكون افضل صحفي رياضي وهو مصنف نفسه كاتب الهلال أو كاتب المريخ وضع يشبه إختيار باسكال من منتدي جماهير المريخ . ثاني الغرائب تصريحات جمال الوالي رئيس مجلس إدارة نادي المريخ في يوم الإحتفال عندما قال ( إذا تقاعس اللاعبون وخرج المريخ مبكرا من دوري الأبطال الأمر لن يتوقف عند حدود إيقاف هذه التكريمات بل سيكون لنا رأي آخر وكلام آخر حتي في حوافز اللاعبين ورواتبهم الشهرية وشدد الوالي علي ضرورة أن يذهب المريخ بعيدا في دوري الابطال حتي يتم تحفيز النجوم بمقدار مايقدمونه من عطاء وبمايحققونه ) إنتهي .. جاني إحساس وأنا بقرأ في كلام السيد رئيس مجلس الإدارة أن المريخ أصبح منظمة خيرية مالكها رجل المال جمال الوالي وليس نادي محترم وكبير صاحب تاريخ .. ولو ماأخاف المبالغة كنت حااقول إنه بيتحدث وكأنه يمتلك اللاعبين .. مع إنه حسب معرفتي المتواضعة لاعبي المريخ محترفين وجميعهم لهم تعاقدات رسمية مع النادي مودعة في الإتحاد العام مفصلة علي الأقل في جانب الرواتب الشهرية والحوافز .. تصريح زي ده من رئيس نادي يهدد بإيقاف حوافز ورواتب اللاعبين في حال خرجوا (بدري) من البطولة الأفريقية ممكن نقول عليهو شنو؟ الإجابة إنه الوالي رئيس هاوي وماعارف أنه الإحتراف تعاقد وعمل زي أي عمل الناس بتاكل منه عيش .. وإنه المرتب والحوافز حق مافضل منه يتكرم بهم علي اللاعبين وقت مايحب ويمنعه عنهم وقت مايحب .. ياجماعة الخير كما يقول الاستاذ عبداللطيف البوني موضوع الإدارة عندنا مشكلة عويصة وحلها واحد ماعندو إتنين (الرحيل) نماذج إدارية مثل جمال الوالي من المستحيل أن تستوعب معني الإدارة .. وهؤلاء لايفهمون سوي لغة واحدة .. المال .. وقناعتهم أن به وحده يمكن يقرروا مايريدون وقت مايريدون .. وهو عندهم قانون تصغر أمامه كل قوانين الدنيا وينهار في مواجهته (أجعص جعيص) .. ويرضخ عند التهديد به حتي صاحب الحق (مرتبات اللاعبين) .. نصيحة لجمال الوالي شغلانية الإدارة دي كبيرة وكرسيها أوسع من إنك تجلس عليهو شوف شغلة غيرها .. إشتغل قطب .. ممكن ومناسبة .. ولو خايف تدفع وماتظهر شوف رئاسة مجلس الشوري مناسبة أهو بترأس ناس برضو .. بالمناسبة التصريحات دي خطيرة جدا وبتحمل تفسيرات كثيرة أقلها إنه بيدفع لبعض اللاعبين أكتر من مرتابتهم الرسمية زي ماحصل مع الحضري (الاتفاق الرسمي معه خمسة ألف دولار شهريا كان بياخد 15ألف شهريا ) .. الموضوع عايز دراسة وفي كل الأحوال الحل في الرحيل . ثالث الغرائب وآخرها خلال اليومين الماضيين مطالبة عصام الحاج بفتح ملفات الصرف في الإتحاد العام وأنه (لافض فوه) كون مع آخرين لجنتين واحدة خاصة بالنقد الأجنبي والثانية خاصة بالسفر مش كده وبس قال بعد ماتفرغ من أعمالها حايصعد الأمر لأعلي المستويات .. و ياخالد عزالدين الزول ده ماجاء من كهف .. ده أكيد كان إدري قبل العام الميلادي .. مستويات مين ياود الحاج إنت قايل الإتحاد العام عضو في المؤتمر الوطني .. قصة وآخرها لسه .. hassan faroog [[email protected]] ///////////
