بسم الله الرحمن الرحيم في السلك · كمل الصبر بالتعادل مع العرب · الناس كلها هاجت وماجت · ناس كتاااار قالوا السبب ابراهومه · وناس قالوا الديسكو طواااالي دي طريقتوا · والديسكو قال دائما كبش الفداء احد ابناء المريخ · يا اخوانا · ابراهومه بافتراض انه كان مسؤلا عن المباراه · يكون غلطان لو لعب بطريقه عقيمه · يكون غلطان لو بدأ بتشكيله خطأ زي كامبوس · يوم كامبوس العالمي اخد الخمسه العالميه · المهم · كيف يكون ابراهومه السبب ونحنا لاعبينا تباروا في الاستهتار امام مرمي العجب · السعودي ( القناص ) · قنص شنو ؟ · يتعامل مع الكوره باالكعب في خط سته ونحن نحتاج لهدف · هل ابراهومه قال ليه العب كعب بالكعب ؟ · عنتر ( ملك السنتر ) · ملك جد جد · يتفرج علي الناس البتجري · هل ابراهومه قال ليهو اقيف وسط البلد وجرجر رجلينك ياكابتن ؟ · دفاع تقيل زي الكمبيوتر الضاربو فايرس · ابراهومه يجيب ليكم انتي فايروس من وين يا ناس ! · يا صفوه 00 عينكم للافيال ما تطعنوا في ضلها · يعني خلاص اولادنا بنفذوا كلام المدرب بحزافيرو عشان نجي نحمل المدرب النتيجه ! · الكوره في البلد دي تديهم لياقه بس وتقول ليهم برطعوا علي بركة الله · خطة شنو وطريقة لعب شنو البعرفوها اللاعبين في السودان · دائما الضحيه المدرب · طوااالي مازدا · واليومين دي ابراهومه · ولان الساقيه لسه مدوره حقو نسميهم ابراموزدا · علي العموم نتيجة العرب تؤكد علي ان الشطب السنه دي سبعين ما سبعه بس · شطب بالشيني يا والي · ولما تجي تشطب ياوالي شوف ناس الهلال بقولوا شنو · اللاعب البقولوا عليهو ماسوره خليهو ده الواجعهم · واشطب الباقين · والبقولوا لعاب وحافظها وبشبهم طوالي وديهو ليهم بي عربيتك · اهو برضو اقرب من السعوديه · الاهله دايرننا نشطب بله وموسي وايداهو ووارقو · ودايرن جمال يتعين انشاء الله وزير عشان يخلي المريخ · قالوا مدرب الهلال العالمي قرر ينهي تعاقده مع الهلال عشان عرس بتو قرب · ياربي العرس في البرازيل بستمر سنه ولا شنو ؟ · لو عالمي وعاجبكم امشوا معاهو العرس واقعدوا تلاته يوم وتعالوا · قلنا ليكم ماسوره · قلتوا لأ · تحت 00 تحت 000 قالوا جايبين كروجر · جيبوا معاهو ويلي · البدفع ليكم منو ؟ · الكاردينال وزعل منكم · انتوا بعد تجيبوا كروجر تعالوا نديكم الوالي والاستاد · اسلام قالت لي ناسنا بقوا يلعبوا كعب لييه ؟ · قلت ليها اسأليني دبل · قالت لي انا لو محل عمو جمال بقول ليهم ( علي الطلاق ) تاني تلعبوا كعب بجيب ليكم مازدا · ضحكت · امس حلمان حضرت تمرين مازيمبي · بس اشوف ليك مدربهم قال الناس اللعبوا كورة الهلال في السودان يجوا بي جاي · الناس جو كتااار · وقال الناس اللعبوا كورة الهلال هنا يجو بي جاي · جوا المواسير · قال ليهم بالفرنساوي · مواسيق لاعبيق سبوبوبيا كارتيق اصابوسيو جسوي فاينلو هارتد لاند · يعني يا مواسير لعبتكم بسبب الكروت والاصابات وانا عندي نهائي مع هارتدلاند · شوفوا تشكيلة خمسة دموع المطار · وتشكيلة رد الاعتبار · وقارنوااااااااا · تبكوا بس · المهم صحيت وتاني نمت · حلمت بعادل امام بقول · بتوع مازيمبي خدوا طياره وراحو علي نيجيريا وانا اعييييييط · في مطار نيجيريا آبلهم الشريف مبسوط مني وانا اعيييييييييييط · وجابولهم المطافي ووزير الرياضه وابو كدايس · ابو كدايس مين ؟ · وانا اعييييط · بكره انشاء الله بحكي ليكم الحلم بالتفصيل · الاهله ذكروني الشافع لما يكون ببكي ودموعو سايله ونخرينو جاريه , لما تشاغلو يضحك وتاني يتذكر سبب البكا ويبكي من جديد · احيييييييييي يا ود امي · سلك كهربا البكا ما بجيبوا ليا والي لقاء