بسم الله الرحمن الرحيم سلكشن قاعدين كلنا امام التلفزيون كاسره مستقره وحترمه , نتفرج ونتبادل الحديث بين الحين والحين , جات اعلانات , اثاثات , كلها اثاثات , شعبله يشكر ويغني , ومحمد صديق يغني ويتبسم وناديه احمد بابكر رافضه الرجعه الا مع العفش , كل يوم بنضحك فيها لما تقول ( اني بنجو مع العفش ) كل يوم بنضحك , وماعارفين بنضحك علي ناديه ولا في ناديه ولا علي روحنا ولا علي اسياد المعارض البدفعوا قروش الاعلانات بالشئ الفلاني ونحن اكتر الناس فرجه علي اعلاناتهم وعلي اثاثاتهم , وشوف العين ما بكتل غزال , ومابنشتري , هو الشراء بالعافيه ! لو الشراء بالتمني كان تندلنا بيوت الايجار عفش لما تآمن , لكن ليس كل مايتمناهو المرء يدركه 0 ياناس الاثاثات عمر الله بيوتكم وبيوت من يستطيع ان يشتري منكم , لكن نرجوكم قنواتنا كل روادها من ذوي البث الارضي , يعني الديجيتال الرخيص ده نهي طريقه ليهو , ومن له قدره علي تغيير الاثاثات ليسوا من رواد القنوات الارضيه , يعني بتعلنوا لي ناس ما بجونا بس تعذبونا 0 يعني موظف ماقادر يغير نظارة القرايه يغير غرفة نوم كيف ؟ وهو زاتو النايم ليها شنو ؟ معقوله زول لغي وجبتين يشتري سفره ؟ زول يجلس القرفصاء في واطات الله دي عشان يحسب متطلبات الحياه يشتري غرفة جلوس ازاي يا شعبله ؟ اعلان آخر يبشرنا , بشري للمواطنين , شقق تمليك وبقساط مريحه قد تصل الي اربعه وعشرين شهرا , لا ياخ ! معقوله ! وهي زاتها وين الشقق دي ؟ العمارات شارع كذا وكذايين ؟ وهو زاتها وين العمارات دي ؟ جوار الديم , طيب ماتقول كده من الصباح بالله عليكم زول بشتري كهربا بجنيه علاقة الاعلان الفات ده بيهو شنو ؟ قال بشري للمواطنين يا اما الزول العمل الاعلان ده غريب يا نحنا غرباء , ودي تبقي طامه كبري واعلان آخر , البنك المركزي يناشدنا بالمحافظه علي العمله , البنك المركزي الله يخليهو داير يورينا نحافظ علي قروشنا كيف , الله يسألكم ده اعلان بخص غالبية الشعب السوداني ؟ يابنك يامركزي لو عندنا عمله انت ما بتورينا نحافظ عليها كيف , ورينا يا بنكنا ويا حبيبنا نجيب العمله من وين ونعدك بالمحافظه والمحليه والولايه زاتها , بس هي تجي 0 وكمان اعلان الشريحه المستهدفه فيه هي نحن , نحن ديل , الاعلان بقول في معناهو انو بودونا اريتيريا والحبشه عشان نقضي اجمل اجازه في التاريخ , خلاص نحن عملنا كل ضرورياتنا وفضل لينا التنزه والصياعه كمان خارج الوطن العزيز , لكن ماورونا اريتريا والحبشه ديل نمشي ليهم باولادنا ولا نزوغ منهم ونقول عندنا شغل ! الحته دي مهمه جدا 0 واعلانات بسكويتات شاي الصباح واللبن رافض يدخل البيت ليهو سنين الا اذا كان في زول عيان خطر وكبايه واحده بس , قال بسكويت قال , بسكويت بالبا ؟ ده غير اعلانات الودائع الاستثماريه , وسوق الخرطوم للاوراق الماليه , نحنا جيبوا اعلانات سوق سته , سوق امدفسوا , سوق كرور , سوق المرحوم كان قدرك , سوق استعمال بره , سوق الله واكبر العديييييييييييييييييييييل ده 0 ناس شغلهم الشاغل المويه زادوها , المدارس بتقفل متين عشان الصرف يقيف , بمناسبة المدارس قرأت تصريح في الاسطوره لوزير التعليم يقول فيه لارسوم علي المدارس وفي مكان آخر بنفس الصحيفه يقول لايطرد الطالب الذي لم يسدد الرسوم 0 اضحك ولا ابكي ولا اجري ولا اقول الله يقطع التعليم وسنينو ؟ خلونا من الاعلانات , سمعتوا بي انفلونزا الماعز ؟ غايتوا انا ماخايف منها , لكن ملارية الاسود كان ظهرت الله يسترنا 0 سلكتد الاعلان هو ترويج لسلعه او خدمه وسط القوه الشرائيه المستطيعه , ما تكملوا قروشكم ساااااااااي 0 والي لقاء
