تلاته يوم عملت هزه للنظام المهزوز من يومه وقاعد على الهبشه بس ما لقى اليهبشو صاح.. وزى ما بيقولو.. الجماعه الكنا معتمدين عليهم..فكونا عكس الهواء وكلو واحد بقى يلعب صالح ورقو...ودا ما وقتو.. معليش يا اخونا نتكلم بالبلدى شويه لهجتنا السودانيه العاديه مع انو الكتابه بيها من الصعوبه بمكان بالمناسبه فى المباريات دائما صعوبه دى اللاعب الخفى لانو دائما يقول ليك{بصعوبه} تغلب الفريق الفلانى على الفريق العلانى.. اها.. نرجع لموضوعنا قلنا تلاته يوم عملت هزه 7 درجات بمقياس رختر!! وطبعا دى عنيفه جدا ومن شدة عنفها الرئيس جاء مخلوع من بره من مؤتمر قمه واول هضربه طير ليك الاسمو(العكد) بره وجرى على المطار للامارات ، اصلوا فيلا طه جاهزه ومرطبه ومن هناك بدأ نشيد العصيان فاشل ووصل اعلى درجة تطريب بمقطع فاشل مليون فى الميه.. عادى لانو( لغفم) كلو من مليون وعيك.. طيب نسال بشه وفرقته بعد ان ادوا الفاصل الخاص بفشل العصيان نان الشى دا وقتين فاشل ومليون فى الميه حسب رمية الريس.. فوق شنو مقومين نفسكم.. شى استيضاحات ليه ما جيتو الشغل.. وشى سحب رخص بتاعة مدارس.. اها اسع ديل ذنبهم شنو؟؟! انا ابو شافع وما عايز ولدى يمشى الروضه اليوم داك تقومو تقفلوا الروضه!! والله دى يحسدكم عليها الحجاج بن يوسف وبالمناسبه وين اخونا يوسف بتاع سكلته امه.. مولد وسيده غايب.. قال فاشل قال.. الله الفشل الكلوى الما تلقوا ليه علاج بركة سيدى الاولادو معاكم!! طيب الشعب دا فاشل وما قدر يعمل عصيان مدنى رغم الرجفى الكتير الحصل دا انتو 27 نجحتوا فى شنو ؟؟ الله.. الله.. يا سعيد انت غبيان؟؟ ما تهضم الحقوق.. الناس ديل نجحوا مليون فى الميه فى حاجات كتيره اول هام الكذب مش قال ليه انت القصر وانا السجن ديك كان اول دلوبت ولو ما جينا كان الدولار المسكين دا وصل 12 جنيه لما كان الجنيه جنيه قبال ما يمحقو عبدالرحيم الما حامدينو... وافراح انفصال الجنوب وانو خليهم يطيرو بى بترولم و{ما حاياثر} معانا.... والليله الردحى كلو فى الطار دا .. كلو دا نجحتو فيه.. لا ولسه فى حاجات نجحتو فيها مليون فى الميه قلعتوا قروش الناس وكمان معاها قلعتوا روحم ..فتحتوا كازينوهات الطرب سميتوها بيوت الاشباح جننتوا الناس فيها بايقاعاتا الرهيبه وكمان ما قصرتو ومع حفلات الظار دى جبتوا المسامير ودقيتوها فى الراس أها.. فى نجاح فى الاجرام اكتر من كده.. غير القلتوا ليهم ادونا عرض اكتافكم برضوا يا سعيد تقول نحنا فاشلين .. لكن بصراحه انا زعلان منكم يعنى دى كان فرصة... شغلانية العصيان الفاشل دا.. كنتو تلموا عفشكم براحه وبشه يقول للناس يا جماعه كتر خيركم استحملتونا لغاية ما بقت على الحديده وودعناكم الله ..ما كان فيها حاجه على الاقل ناس المحكمه العوره ديل كان شطبو قضيتك وخلوها ملاعب داخليه وما احلى الدافورى فى السودان.. وكمان اهل عصام البشير كان طلعوا ليهم فتوى بتقول لناس العصيان الفاشل مليون فى الميه حرام عليكم تتظاهروا او تحتجوا او تقولوا ما عايزين بشه يعنى اى زول ينقلب على ولى الامر فهو قد اتى بفعل حرام .. تيب دى ذاتها يا طرش مش كان فرصه ذهبيه وتعودو وتذكروا الناس بموضوع هى لله هى لله وتقولو يا اخوانا نحن عامن اول غلطنا وعملنا عمليه حرام حسب فتوى الجماعه وانقلبنا على ولى الامر ودحين عايزين نتحلل ونتوب ونستغفر ونرجع الحكم للوالى الانقلبنا عليهو واهو ولدوا معانا فى القصر نسلموا الامانه بتاعة ابوه الشلناه منو بالحرام اليوم داك قبال 27 سنه... ولا الحرام دا يا ربى ما باثر رجعى بس من دا كلو عجبنى مصطفى شحده واغنية البنسلين يا تمرجى وكتر خيركم يا بلد الخير الاديتوهم الدواء بس يا ريت لو كان حاجه تانيه.. لكن دى خلوها على الفاشلين مليون فى الميه ديل بيقدروا عليها ما الولد ولدم عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.
