الواء بيتر قاديت ل(السوداني) البترول هدفنا بعد انفصال الجنوب معركتنا ضد التهميش وسنترك السلاح في هذه(..) الحالة فقط هذا ما يجمعني بأطور ولام أكول.. لكن تانج ذلّّ نفسه..! هذه(....) مصادر سلاحنا .. ومنذ ذلك الوقت لم ألتق أطور حوار: رفيدة ياسين [email protected] مع اقتراب إعلان ميلاد دولة الجنوب بدأت المواجهات الجنوبية الجنوبية تطفو على السطح وتتزايد في الآونة الأخيرة بين الجيش الشعبي لتحرير السودان والقوات المنشقة عنه، خلفت وراءها مئات القتلى والجرحى، واتهامات متبادلة زاد فيها فتيل الأزمة اشتعالا خاصة بولاية الوحدة، حيث يوجد الجنرال المنشق عن الجيش الشعبي بيتر قاديت رئيس حركة تحرير جنوب السودان، أعلن الرجل في حواره ل(السوداني) أن البترول سيكون هدفا مباشرا لهم بعد إعلان دولة الجنوب، مشددا على أن معركتهم ضد من أسماهم بالمجرمين كاشفا النقاب عن تفاصيل تحدث عنها لأول مرة لصحيفة سودانية. فإلى تفاصيل الحوار الذي ننقله بذات اللغة التي تحدث بها نسبة لحساسية الموضوعات التي تطرق لها . _البعض يقلل من قواتك فكيف يمكن أن تكون لديك قدرة التأثير على حكومة الجنوب كما تقول؟ هم بقولوا ما بنقدر لكن إحنا شغالين شغل صاح (عديييل) وجيشنا كبير وعندنا وجود عسكري والبندقية دي ما بنتخلى عنها إلا بعد هزيمة الجيش الشعبي، وسنواصل في القتال إلى آخر عسكري عندنا. _هل هدفكم فقط هو زعزعة الأمن والاستقرار في الجنوب كما تتهمكم الحركة؟ لا أبدا نحن هدفنا إسقاط حكومة الجنوب لأن الحركة الشعبية ليست المفوض باسم الجنوب وحدها وإحنا جيش حقنا منتشر في كل الولاياتالجنوبية، وحنفضل ماسكين البندقية لحد ما ننهي التهميش، إحنا عندنا هدف هو القضاء على التهميش لأن الحركة ما بتعرف حق الجنوب والجنوبيين. _هل هناك تنسيق بينكم وبين جورج أطور وجبريال تانج؟ كلنا نخوض المعركة سويا في مواجهة حكومة الجنوب ونعمل كمهمشين لاسترداد حقوقنا وحقوق شعب الجنوب، وسنظل نعمل حتى النهاية لأنو حكومة الجنوب فاشلة في إدارة الجنوب، وكلنا نعمل بتنسيق مع بعض وهدفنا واحد ومتفقين على أن نظام حكومة الجنوب فاشل تماما - ما سر علاقتكم ب د. لام أكول اجاوين رئيس الحركة الشعبية للتغيير الديمقراطية وما طبيعتها؟ لام اكول مشروع رجل سياسي وعسكري وقطعا لام عانى مع الحركة الشعبية فالحركة لا تعطي صلاحيات وفرص للآخرين . _أسألك عن طبيعة هذه العلاقة ؟ لنا تنسيق سويا كمهمشين هدفنا واحد هو أن نكون سويا ونقف في مواجهة سياسة حكومة الجنوب الفاشلة، وأكبر دليل على فشلها أننا تمردنا عليها ود. لام اكول برضو انشق منها . _هل هناك تنسيق عسكري بينكم ولام اكول؟ لام دا زول سياسي وعندو حزب بيلمنا معاهو التهميش الموجود حاليا في جنوب السودان ما أكتر من كدا. _الحركة لديها علاقات دولية، ألا تخشون من تأثير الرعاية الدولية التي تجدها حكومة الجنوب عليكم ؟ ليس لدينا مشكلة إلا مع الإجرام الذي تمارسه الحركة ، النظام الجنوبي دا كله عندو مشاكل، والمواطن الجنوبي تعبان، نحن لا نخشى علاقات الحركة الدولية لأن عدد مظاليم الحركة كبير والنظام الدولي يجب ان ينتبه للمشكلات البتسببا الحركة داخل الجنوب مش يساندها. _وماذا حققتم أنتم على المستوى الميداني حتى الآن سوى القتلى والجرحى سواء من صفوفكم أو من صفوف الجيش الشعبي حتى مواطنين عزل وأبرياء؟ إحنا موجودين في الميدان، وسنخوض المعارك مع الجيش الشعبي إلى النهاية لحد ما نحقق العدل في الجنوب، أصلو لازم يكون في جرحى وقتلى لأنه دي حرب ودا شي طبيعي، إحنا كان عندنا معارك في ميوم في هجوم مع الجيش الشعبي، مات فيو عدد كبير وزي ما إحنا عندنا جرحى وشهداء برضو عندنا 23 أسير في المعركة الأخيرة، ثلاثة منهم سائقين من يوغندا جابوهم ناس الجيش الشعبي في عربات في رومبيك وبرضو عندنا ضباط وشاويش و5 عريف و14 عسكري. _وماذا عن أسراكم لدى الجيش الشعبي؟ ليست لدينا إحصائية دقيقة بعددهم . _ألا تعرف كم تبلغ قواتك ولا تحصر المفقودين؟ لا عارفين لكن لن نقول هم كم . _من أين لكم بالدعم والأسلحة التي لديكم الآن؟ الدعم بتاعنا من الجيش الشعبي ذاته، لما طلعنا منه طلعنا بناسنا وبسلاحنا، وبعد داك من المعارك الدارت بينا وبينم. _البعض يقول إنكم تستلمون دعما من الجيش السوداني؟ ما عندنا علاقة مع الجيش السوداني، إحنا في أرض ولاية الوحدة ما في شمال السودان، وما عندنا مصدر تاني بنمسك سلاح من الجيش الشعبي _لم تحدث معارك كبيرة بينكم وبين الجيش الشعبي لتجعل لديكم هذا الكم من السلاح؟ دا كضب ساي ما في مصدر غير الجيش الشعبي، وأنا زول جنرال لدي جيش حقي من الجيش الشعبي ما في دولة تانية ولا افريقية ولا الخرطوم ولا غيرهم. _ما ردك على ما أعلنته مجموعة استثمارية أمريكية خاصة تدعي أحقية الامتياز لاستكشافات نفطية في الجنوب بتعيينك في منصب رفيع بمجلس إدراتها؟ رد ساخرا: دا كلام ساي ما بعلق فوقو. _تتردد أحاديث أنك وجورج أطور تنسقون وتجتمعون هنا في الخرطوم ..ما تعليقك على ذلك؟ دا كضب أنا ما شفت جورج أطور إلا في جوبا من أويللجوبا مشينا نيروبي وبعد داك أنا مشيت ميوم ما لاقيت جورج اطور من انتخابات الجنوب، فارقتو من الزمن داك وما اتلاقينا تاني. _ما رأيك في الحكومة التي شكلها أطور؟ ما عندي راي فوقو دا برنامج بتاعو وهو إحنا ناس اتمردنا على نظام الجنوب كل زول بعد داك عندو خطة حقتو لكن في النهاية بننسق مع بعض لأنو الهدف واحد. _ولكنكم تنتهجون أسلوبا غير أخلاقي في حربكم ضد حكومة الجنوب؟ رد متسائلا : كيف يعني؟ خططتم لاغتيال سلفا كير بحسب اتهام الحركة لكم؟ كلام دا ما صاح إحنا ما عندنا مشكلة شخصية مع سلفاكير، سلفاكير ذاتو لو براو إحنا ما بكون عندنا معاو مشكلة، إحنا مشكلتنا مع النظام الجنوبي كلو والبقولو زي ناس باقان ورياك مشار، لو قتلنا سلفاكير ذاتو مشاكلنا دي ما بتتحلا ، وإحنا ذاتو سلفاكير دا براهو كدا ما عندنا معاو مشكلة إحنا مشكلتنا مع السياسيين الخلف سلفاكير في الحركة وهم الفشّلو الحركة ودمروها . _هذا ادعاء لاتهامكم باغتيال أكثر من قيادي وليس سلفا كير فقط؟ قلت ليك إحنا ما عندنا مشكلة شخصية مع سلفاكير ولا مع زول بعينو إحنا مشكلة حقتنا مع النظام حق حكومة الجنوب دا كلو ولأنو الشعب الجنوبي كلو مهمش ولأنو الناس ديل بيقتلو المواطنين الجنوبيين و بشيلو قروش الجنوب بدون تنمية في البلد. _لماذا لم تتجهوا لمناطق البترول حتى الآن؟ ألا يعد بترول الجنوب هدفا لكم؟ نحنا حاليا قاعدين ورا مناطق البترول، لكن اولوياتنا حسي اننا نكون موجودين جوة البلد، لأنو الجيش الشعبي حسي ما قاعد في محل بترول ، إحنا حسي قضيتنا ما بترول لكن بترول الجنوب دا بنصلو وندافع عنو وقت الجنوب يبقى دولة براهو بعد 9 يوليو، هو حسي حق السودان عامة لكن بعد انفصال الجنوب هنصل مناطق البترول حنمشي نحمي مناطق البترول لانو معركتنا الآن مع النظام ، وهدفنا حسي ما البترول . _فهمت من حديثكم أن البترول سيكون هدفكم ما بعد 9يوليو، لكن هل تعتقد أن الحركة ستسمح لكم بذلك؟ عندما ينفصل الجنوب لن نسمح لغيرنا بأن يحمي البترول ومناطق البترول وحنقدر نسيطر على بترول حق الجنوب لانو حق الشعب الجنوبي ما حق الحركة وأنا زول جنرال ما حاجة ساكت كدا وبقدر بقواتي أصل مناطق البترول واحميها من الحركة. _في رأيك لماذا لم تنجح خطى المصالحة التي بدأتها معكم الحركة في الحوار الجنوبي الجنوبي قبل إجراء الاستفتاء؟ إحنا ذاتو معترضين على كلام العفو القالو ناس الحركة دا، لانه إحنا ناس اتمردنا وطلعنا من الجيش الشعبي بناسنا مفروض يعملوا حوار معانا وينهو التهميش مش يعفو عننا، وبعدين هو ذاتو كلام دا ما فات لقدام لانهم كتبوا كلام في ورق وما نفذوا منو حاجة، هم ناس الحركة دايرين يصالحونا ويهمشونا وكانوا دايرين يظهروا للناس انهم دايرين يحلوا مشاكل لكن مشاكل بطريقتم دي ما بتتحلا، وبعدين الحركة الشعبية ذاتا بعد د. جون انتهت تماما _ما رأيك في محاكمة قبريال تانج؟ نحنا ما عندنا راي في محكامتو لأنو هو فشل وبيذل نفسو هو خسر في معركة لحد ما قدرو يمسكوه و سلم نفسو في محل الهجوم ما ممكن العسكري يسلم نفسو زول كبير لواء يسلم نفسو دا ما بيحصل في العالم انو جندي كبير زي قبريال تانج يقوم يستسلم بسهولة لناس الحركة _هل تؤيد محاكمته؟ قلت ليك إحنا ما عندنا علاقة فوقو، كان مفروض يكون في حالة دفاع عن نفسو لكن هو استسلم، وبعدين قبريال ذاتو موقفو ما كان مفهوم وهو كان مواصل في سلام مع ناس الحركة وبتكلم مع الحركة واحنا كلام دا ما كنا عارفنو. _ترددت أحاديث عن خلافات بينكم وبين تانج ما صحة ذلك؟ هو عمل سلام مع الحركة الشعبية وتاني قام مسك البندقية موقفو ما كان واضح وما معروف بالنسبة لينا ، عشان كدا بطريقتو هو كان زول جندي كبير لكين ذل نفسو. _دوما تتحدثون عن فشل الحركة وعن تهميشكم لكنكم لم تقدموا مطالب واضحة لوقف هذه المعارك؟ نحن دايرين نهزم الجيش الشعبي ، وما حنخلي البندقية إلا الشعب الجنوبي يلاقي حقوقو الشالتا الحركة _أتحدث عن أجندة مطالب محددة من قبلكم لحل أزمتكم مع الحركة الشعبية بهدف وقف نزيف الدم في الجنوب؟ احنا بنقول انو لازم يكون في تعديل صلاحيات في الجنوب ، وانو ما يقولو علينا ميليشيات.. كيف نكون ميشليشيات في دولتنا احنا عصب الجنوب وحافظين الجنوب دا شبر شبر وحاربنا من اجلو كيف اكون ميليشيا وانا عندي حق في البلد دا؟ مشكلة التهميش الاحنا بنتكلم عنو دايرين الحركة تبطل تقتل شعب الجنوب الابرياء وترجع قروشو الشالتا في جيوبم وما عملو بيها أي تنمية، ما دايرين يكون في فساد. _هل هدفكم فقط هو القضاء على الفساد؟ ينظر الكثيرون لهذه المعارك أنها من أجل الكراسي؟ ليست من أجل الكراسي إحنا قاعدين في الخلا من أجل القضاء على التهميش وأعلنا ثورة ضد المجرمين والفاسدين ولن نسمح لهم بتدمير الجنوب ، ويكفي انهم فشلوا في إدارته. _لكن المعارك التي تدور بينكم وبين الحركة يذهب فيها كثير من المواطنين الأبرياء ضحايا؟ نحن ثورتنا ضد المجرمين وليس المواطنين الأبرياء، بل خرجنا وتمردنا من أجلهم ولكي ندافع عن حقوقهم ولكي نحسم مشكلة التهميش القائمة في البلاد، بل نثور من أجلهم لا عليهم. _البعض يرى أن الأزمة تقتصر على الصراع القبلي؟ ما عندنا حسي صراع قبلي في الجنوب، لأنو كل القبايل تعبانة ومهمشة في كل الولاياتالجنوبية العشرة بقولو دا شكل قبلية احنا لما انشقينا كان الجيش الشعبي دا لامي قبايل كلو لكن كانوا هم فاشلين في الادارة. _أخيرا أود أن أسأك عن الخلاف الدائر بين الحركة الشعبية والمؤتمر الوطني حول تبعية منطقة أبيي، هل تتفق مع الحركة في ضم منطقة أبيي لدستور الجنوب ما بعد الانفصال؟ أبيي دي أنا حاربتا فوقا مع د. جون قرنق وبعرفا كويس ..أبيي دي ما حقت زول، يجب انوالناس يطبقوا بروتوكول ابيي الجا في اتفاقية نيفاشا ،لكن ما صح انو الحركة تضم ابيي لدستور الجنوب بعد الانفصال دا أمر بيخص سكان المنطقة ما الحركة.
