مفاهيم نادية عثمان مختار [email protected] زيدان مات .. ولا عزاء للوطن !ا أرجو منك السماح عزيزي القارئ أن أتحرر اليوم من قيود اللغة العربية الفصحى وقواعدها، لإحساسي بأن (عاميتنا) السودانية قد تساعدني في تسطير وجعي كما هو؛ بغير محسنات ولا رتوش لغوية، وليقيني بأن (الدراجية) سوف تعطيني مساحتي لأبكي كما تبكي النساء في بلادي حين يأخذ الموت عزيزا لديهن .. فكيف لو كان هذا الفقيد هو فقيد الوطن بحاله وشعبه المكلوم الفنان الراحل زيدان إبراهيم ؟!! الله .. الليلة ده خبر السواد على أهلك والبحبوك يازيدان إبراهيم.. ياعندليبنا الأسمر ويامعشوق جماهيرك ومحبين فنك الخالد !! أبكن يابنات..غنايكن مات ..!! زميلي بقناة امدرمان الفضائية نقل الخبر الحزين هاتفيا لزوجي الإعلامي جمال جادو وبرعشة الصوت الحزين جمال قال لي : (زيدان مات يانادية) !! الله .. كُر على حبايبك الليلة ياود أمي !! كُر على ناس (الحاج يوسف) والعباسية وعموم امدرمان وكل السودان الليلة وحدت بينا يافنان الجمال والكلمة الرقيقة المبدعة !! اتصلت بالصحفية الزميلة العزيزة (المصرية) صباح موسى مشرفة موقع ( أفريقيا اليوم) لأنها كانت الناقل اليومي لأخبار العندليب ردت بصوت كله حزن وأسف وبصوت مليان دموع وقالت لي: (زيدان مات بالأهمال من بلده) !! في التصريحات الكانت بتنقلها صباح قالت الكاردينال (وعد) !! يرسل خمسة آلاف دولار، وجمال الوالي بجلالة أمواله رسل بس ألفين دولار والدولة وعدت ووقفت تتفرج لمن مات زيدان !! آه يا وجع العدم يازيدان وقلة (المال) وشر الحوجة .. الأعمار بيد الله لكن (يد) الفرحتهم بجميل ألحانك تناسوك في محنتك وخلوك تموت حزين على حالك وانت راجي إحسانهم و( إحسان) دولة مابتعرف تقيم المبدعين !! نقول شنو الليلة يازيدان ونودعك كيف يافنان الشعب؟! (داوي ناري والتياعي وتمهل في وداعي .. ياحبيب الروح هب لي بضع لحظاتٍ سراع) ده كان غناك السمح ياشيخ الطرب الأصيل !! الليلة يازيدان ببكن عليك ( عذارى الحي) ونساء السودان ورجاله من العشقوا فنك الراقي .. ياحليلك ياود أمي !! الليلة ياالتيجاني حاج موسى وياعمر الشاعر رحل تالتكم، ورفيق دربكم الغالي .. ان شاء الله البركة فيكم يا أخواني!! عاد الليلة القاهرة بتغرق بدموعك يا التيجاني؛ شفت كيف زيدان مات وأنت واقف فوق رأسه تقرأ ليهو سورة يس، وتتمنى ليهو عاجل الشفاء ؟! ربنا كتب ليك (الحضرة) وجعلك تقيف فوق غسولو وكفنو وتجيبو بيدك تدفنو في (أرض الوطن) القصرت حكومته في حق زيدان وماعالجتو على نفقة الدولة..!! أريت الحكومة طايرة في السماء كان مافيها مسؤول يدق صدرو ويرسل لزيدان يتعالج في أحسن مستشفى فيك يا مصر !! عاد نقول شنو الليلة يازيدان ونتأسف ليك كيف على إهمال (الدولة) وتقصيرا في علاجك يا أخوي ؟! سامح تقصيرنا فيك ياعندليب وسامح كل زول ( غنيان) جاملتو في مناسباتو وصدحت ليهو ببلاش، وبخل عليك ولو بماية دولار تساهم في علاجك ياعملاق !! سامح صحافتنا كان قصرت في حقك وكالعادة هسي حاتسود صفحاتها بخبر ( نعيك) لأننا مابنهتم بمبدع إلا بعد موته للأسف !! أمر الله نفذ ياود إبراهيم ولا اعتراض على حكم الله ..!! ودعناك الله والرسول يافنان وربنا هو الرحيم الرحمن يتولاك ويسكنك فسيح الجنات برحمته يارب !! ليك الرحمة يازيدان ونعيم الفراديس .. وللسودان وشعبه الصبر على فراقك الحار وكامل السلوان يارب !! و والله وحّدوا بينا الفارقونا وراحو .. شالوا من وادينا بهجتو وأفراحو !! الأخبار نشر بتاريخ 26-09-2011
