[email protected] حباب الحبان في كل مكان ,, الوجع بقى بارك ومحكر وسط كل بيت سوداني الوجع متربع في عرش البلد الحزين ,, حزين على إنفصاله وزمانه الضاع منه في 22 سنة ضاع بالحروب والفتنة والظلم الواضح كألشمس , وضاعوا ابناء هذا الوطن بالشتات والمرض والجوع ,,, ذكريات الوطن وكل غيور على وطنه تسرح في عشرات السنين المضت متسآئلة عن الضياع الحل بالبلد والدمار الذي طال كل شيء .. نعم كل شيء '' كل شيء ضاع وصبح في خبر كان ..واصبحنا كلنا نحلم في هذا الزمن الكئيب ونتحسر على ما مضى ونحلم بعودة زمنا سمح بالحيل ,,,, اسمحوا لي ان اعبر بهذه الكلمات البسيطة والغصة تطعن في الحلق ,,,,, *** حلم زمن الكآبة *** يا حلم زمن الكآبا يا دموع بلدى وترابا .. ناس بتحلم بى رغيفه .. وناس تبدل فى تيابا .. جاريه تنطح ومره تشطح.. داهسه فى رؤوس الغلابه.. لا بتعاين لا بتداين.. بس تناطح فى السحابا .. تختف اللقمه الهنيه .. وتظلم الناس التعابا .. ناس تهاجر من بلودا .. حاضنه احزانا ومصابا .. مره تبكى ومره تلهث .. تايهه فى ليل الرتابا .. زى عصافيرا بريئه.. ضايعه فى زحمة ايابا .. زى سنين تاهت وحيدة. حانه لى عودة شبابا .. زى شويفعه تنادى ضايعه .. يمه..يمه .. يا با .. يا با .. او وليدا دابو شب .. خط لى حروف الكتابا .. راح يناغم فى حبيبتو.. بحلم ارجع لى رحابا .. يا حلم زمن الكآبا .. ليه زمان الالفه ولى .. وودع الناس الصحابا ... اتناسو لمة ناس كتار .. حتى البيوت كم سدو بابا .. لا تو اصل لى قريبا ... لا تسالم لا حبابا .. ناس تجافى وما بتصافى ديمه فى وجوها الكآبا.. يا حليل زمنا بعيد .. حسراتو فى نظرات شيابا.. لما كان الود مفرهد ... فى ربوعنا وبين هضابا .. يزرع الكلمه الرضيه .. فى متاهات الضبابا ... يكتب النغم المسالم ... بين فصول وتر الربابا .. اسماء/ الجنيد نشر بتاريخ 30-09-2011