سودارس : نعي جميل ...! ! ! ! !

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

نعي جميل ...! ! ! ! !

نعي ج م ي ي ي ل نشر في سودانيات يوم 19 - 11 - 2012

نعي جميل ...!!! قصيدة جديدة للشاعر هاشم صديق ...
(1)
فكيت زرار صدري
وسلّمت الحنين
أمري
فتحت الضَلفة
والضَلفة
والضَلفة .
...........
مديت صوابْع
الايد
أفتّش
عن فرح لهفة
أكوس عن وش
ملامح زول
نَقَشْت هواهو
في جواكا
بالعِرْفه
.........
عن ساعداً
تخُت راسك
وتتوسد
تحس بي نبضو
تتنسّم
شذي الالفة .
عن ذكري
وعن وردة
طلع من جواها
ضو فكرة
عن مُحراكه
عن مُفراكة
عن نفّاج
عن زاداً
موفّر
لي جعان محتاج
عن ناراً
تبلبل من تحت
في الصاج .
عن خرطوم
حنينه اللوم
ما ناسية
ولا قاسية
ولا في يوم
تِغَت
واتْبخترت
أبراج .
.............
فكيت زرار صدري
فتحت الضَلفة
والضلفة
والضلفة
مديت صوابْع
الذكري
واللهفة
أفتش
عن زمان ناضر
أقول يمكن
شرق حسه
غِشَتْني الحمي
والرجفه
وقَطّعني الحنين
غَصّه .
..........
فكيت زرار صدري
مديت صوابْع
الايد
صبغ ءايدَيْ
رماد دهشة
سمعت بعيد
قطار صَفّر
يكون
وسط العدم
طش .
..........
فكيت زرار صدرك
وفَتّشت
وفَتّشت
وفَتّشت .
...........
أيا مسكين
لقيت كل الغُرَف
فاضية
خراب وتراب
دمار مسكونة
بالأشباح
علي الجدران
نَصُل سكين
وبصقة غول
وفي برواز
معلّق
في جدار مشروم
( شبشب ) زول
تقول بس
صورة لي ( كافكا )
أو ( رامبو )
أو ( غوغول ) .
............
وفي وسط الدمار
شفت
هيكل في الغُبار
مجدوع
عُضَام مكسيّه
بي ( أبَرول )
ولعبة طفلة
لا ءايدين
ولا كرعين
بس راساً
مشقق
بي كسور وجراح
وفي الأركان
شفت الليل
مصنَقّر
في الزمان الراح
ومدفوس
الزمان أتراح
...........
كوركت
صرخت
بي عزمك
- ناس البيت
ناس البيت
يا أهلي
يا ( أجمل
زمان عمري )
- ناس البيت
ناس البيت
يا أروع
بيوت الناس
رحلتو ؟!
مشيتو ؟!
وين ءانتو ؟!
يا أبرك
( ظلال الالفة
والاحساس )
- هاجرتو ؟!
مُتّو .
خلاص ؟!!
............
في ذكري الموت
ومن حته
في وسط الخراب
دمدم
وصلصل صوت
عاينت
ولقيت وسط
الضلام مارق
شبح زولاً
تقول
( من شكلو )
كان مبلوع
وبصقو الحوت .
............
كان لابس
دِرِع ( هولاكو )
وكان في الوش
قناع ( نيرون )
وفي الايدين
شهر سيفين
ومن عِينيهو
اتراقص
لهيب الموت .
............
طلع صوتو
اتزلزل
كيان الذكري
بالدهشه
لقيتو ( قريب )
ومن دمي
تقول رحم الزمان
غَشّه
وتقول فانوس
( ولاد البيت )
غاب طشّ
وتقول اتْفَتْفَت
حنين الحوش
وصار مهروس
وكوم دُراب .
تقول وقع
واتْكشّف المستور
نَصَل واتْفَطّع
( القُرقاب ) .
...........
أيا زمن الوشوش
أغراب
داش راس
الوصال ( الشاب )
واتسمم
( تقاوي العيش )
ما فتّح
بصر قندول
ولا باها القصب
في طول
واتكندك
هوي الأحباب .
............
...........
فكيت زرار صدري
وسلّمت الفراغ
أمري
لقيت نفسي
ممحن في بيوت
أشباح
أعاين ( للغلط )
صاحي
ونايم في الخراب
( الصاح )
اتبهدل
عمار البيت
واندفن الفرح
أتراح .
...........
بقيت زي نقطه
في صحرا
ومداها فسيح
فكيت تاني
يا موهوم
زرار صدرك
وفي الايدين
بكت رجفه
رجعت أكوس
في الضلفة
والضلفة
والضلفة
أقول يمكن
أمل لابد
يهل يخلعني
في اللفّه .
............
ما خليت
ركن في البيت
ولا ذرة عِشِق
مدفونه
أو تصريح
اتْفَلّقت ( بالواقع )
لقيت الوحشة
والتجريح .
............
وآ حسرة
غُرَف قلبي
بقت مهجورة
بقت مطموره
بقت مسكونه
بي لعنة
صفير الريح
............
ودنقرتَ
شلت من الخراب
دُراب
وصرّيت الحُطام
في جُراب
عشان يمكن
يكون تذكار
بطعم النار
عن أطلال
هوي الأحباب .
............
وآ حسرة
غشاوْة العين
يا غبيان
زمان
قايْل ( الرِحِم )
تحصين
ما اتذكرت
قصص الخُوة
في تنزيل
كتاب الدين
ما تذكرت
كيف كتل الحسد
( هابيل ) .
............
وآ حسرة
غشاوْة الكان
وكان قدامك
الفرقان
ولاكا حسدت
لا اتقرّبت
بي قُربان
بس كتلك
غرام ( البيت )
وعِشق ( الحِلة )
وامدرمان .
...........
اتذكرت
كيف قصّ العجيب
قرآن
وكت ساق
الحسد أخوان
واتقاصر ضمير
الخُوة
مات الحب
وصار ( يوسف )
في بطن الجُب
وبات ( يعقوب )
حزين صابر
ما بارح يقينو
الرب .
..........
لا تراهن
علي الدنيا
كون مظلوم
ولا ظالم
( ولا تصدّق
كلام قلبك )
بس صدّق
عيون عقلك
ولا تْساوم .
............
في وش الطاغي
( حَتْ ان كان
رفيق دمك )
لا تهادن
ولا تسالم
واتعلّم ....
اتعلّم ....
ما راهَن
رحم يوماً
وقال
- أنجب
خِلُوق أخيار
اتعلم ....
عجين الدنيا
ده الشّكل
نفوس طيبه
وهوْ السَوّد
نفوس أشرار
وهُوْ الجمّل
فعال لي ناس
وهو الوَلّع
قلوب بالنار .
.............
ووآ حسرة
زمان حاضر
مدّ لسانو
للدنيا
وقال ساخر
- أسأل نفسك
المكسورة
بالأسباب
شنو الخلّي
البُعاد حاضرين
وسوّاهم
صحاب وأحباب ؟!
وكيف صبحو القُراب
غايبين
وناس ظالمين
وكوم أغراب ؟!
.............
اتعلم ....
اتعلم ....
لاتفك يا زول
زرار صدرك
تفتّش
في غُرف قلبك
عن حيين
وهم ميتين .
عن تذكار
تحت أتراح
ويسيل دمعك
ولا تندُب
زماناً راح .
............
اتعلم ....
اتعلم ....
ما زار ( سلاماً )
يوم
( بيوت أشباح )
ولا مات زول
ظلوم تبكيهو
من قلبك
حاشا عينيكا
ما عرفت
( دموع تمساح ) .
..........
وانت حقيقة
شن جابك
بعد ما شفت
بي عينيكا
( موت البيت )؟!
بعد ما عرفت
معني ( الهوة )
من جوه
في زولاً عِشق
كب اللهب
في الزيت .
..........
لا عانك
وكت مرضان
ولا تبتب
عذاب شريان
ولا جازا الفَضُل
ءاحسان
لا هو ( مراكبي )
لي ( عيزومه )
أو ( قيدومه )
لا ( ربان ) .
.............
لاكا فطرت
في ضلو
ولا اتغديت
ولا اتعشيت .
ولا في يوم
تكيت تعبك
علي لحافو
لا غمّضْتَ
لا اتمديت .
...........
انت حقيقة
شن جابك
تفتش
في سراب
وخراب
عن الأحباب ؟!
نضم قلبك
كسر عقلك
رجعت تهاتي
واترديت
واتذليت .
...........
يا واهم
( ياهو البيت
هو ذاتو البيت )
شنو الخلّي
الحنين يملاك
تفك يا زول
زرار صدرك
تفتش
في غُرف قلبك
عن التاريخ
تلوكو مسيخ
عن وطناً صغير
ضماكا
فيهو ( حَبَيت )
كمان ( تاتيت )
كبرت مشيت .
............
شنو الجابك
تفك جنزير
أسِر بابك
بعد ضُقت الهوان
ومشيت
( ولا حَنيت (1)
ولا ودّعت
لا وصيت
مرقت تكوس
علي نفسك
بَعَد ما شِبْتَ
واتْفَتْفَت
واتْدقيت ) ؟!
..........
كفاك يا زول
لا تكتب حروف
نعي الحطام
وتقول ده
- نعي أليم
وتِتْقَطّع
وكت تلمح
( فروع النيم )
كفاك تهويم
نضم قلبك
يوم أسمع
كلام عقلك
كفاك كمّلت
كُلْ وجعاً
وكُلْ تعليم
( واتْستّفْت )
بالتحصيل
طول عمرك
تشيل
وتشيل
..........
فُوق يا زول
خلي الرب
ملاذ ووكيل
ولا ترجع
تفك تاني
زرار صدرك
ولا تجهش
ودمعك يسيل
بس أكتب
علي باقي الخراب
شِعْرَك
وقول وأضحك
- نعي جميل
نعي جميل

انقر هنا لقراءة الخبر من مصدره.