الخرطوم : يوسف دوكة (نيران توّج جواها اكتر بي كتير من نار كوانينا التعج بي اصناف الكفاتير والبراريد والشرارق)... هكذا قال شاعر الشعب محجوب شريف في ست الشاي وكأنه يعرف أن النيران التي تعج جواها الآن ليس تلك التي تخرج من (الكانون) بل هي نيران (اسعار السكر) التي تستعد للارتفاع بصورة مزعجة ومخيفة وتهدد بانهيار مملكة الشاي عما قريب...(السوداني) خرجت للشارع وجلست مع عدد من بائعات الشاي قبل أن يدخل القرار حيز التنفيذ، سألتهم عن الحال والمآل، والى اين ستمضي راحلتهم بعد تطبيق ذلك القرار...هل سيعتزلن المهنة..؟ أم سيضطررن لزيادة بضاعتهن التي تدور في فلك (المزاج) ولا تحتمل اي (عكننة)...كثير من الاسئلة تجدون اجابتها في سياق التقرير التالي: بنخلي الشغل: (بعد القرار دا طوالي حيزيد سعر الشاي والجبنة واي حاجة بقت زايدة وما عارفين والله نعمل شنو)....هكذا ابتدرت بائعة الشاي ابتسام الشهيرة ب(وارغو) حديثها معنا، واضافت : (الشاي في زيادة والفحم في زيادة وكمان تجيب ليها زيادة سكر..!!..وبالطريقة دي انا بعمل كباية الجبنة ب 3 جنيه والشاي بجنيه ونص، وبعد شوية احتمال نوقف الشغل ذاتو).! احتجاج زبائن: التقينا بها وهي تضع يدها على خدها تنظر في فراغ لا ينتهي، قطعنا حبل افكارها وجلسنا معها... اسمها مريم عبد الباقي وعن الموضوع تقول : (لا بد أن نزيد سعر الكباية سواء أكانت شاي أم جبنة أم غيرها وهذا شيء طبيعي ولكن المشكلة أن زبائننا لا يتفهمون تلك الزيادات ودايما ما يحتجون وكأنهم ما عارفين الحاصل في سوق السكر شنو)...واضافت: (اذا اشتغلنا بالسعر القديم ما بنستفيد حاجة... والزيادة دي خلوها... نحنا الكشة ذاااتا ما مريحانا كمان تجيب ليها زيادة في سعر السكر).! ناس السكري: اما طيبة عطرون اطلقت ضحكة قصيرة ثم قالت بعدها : (والله زبائنا تاني الا يكونوا عندهم مرض السكري -بمعني الكباية تكون خالية من السكر- واضافت: (الزيادة ليس في السكر فحسب ولكنها زيادة في الفحم والشاي وسعر كباية الشاي للزبون المعتمد سيكون بنفس السعر القديم الى أن يتفهم الحاصل ونقوم بزيادته في الايام القادمة ونحنا بنشتغل عشان المواطن لكن مرات الناس بحتجوا وكأنهم لا يعرفون أن الزيادة لسنا نحن الذين نقررها)...صمتت قليلاً قبل أن تضيف: (والله ياجماعة بصراحة لو استمر الحال بالصورة دي حنخلي الشغل عديل، عشان بالطريقة دي ما بتغطي معانا). سترك يارب: وتقول (س، ع) التي امتنعت عن ذكر اسمها ل(السوداني): (اي شيء في البلد زاد.. لذلك من الطبيعي أن نزيد سعر الشاي والجبنة بعد زيادة السكر، واضافت: (المشكلة ليست في الزيادة، لكن هي في الزبون الذي عندما يعلم بهذه الزيادة يثور ويلعن وهذا الاحتجاج يشعرنا بأننا نحن من قمنا بزيادة السكر مع العلم أن الدولة هي من قامت بذلك...ووالله يا اخوانا جد كدا الحالة بقت صعبة شديد وربنا يسترنا).
