تسارعت وتيرة الاحداث والمواجهات بين شباب حي بيت المال وانصار ومريدي شيخ الطريقة المكاشفية الامين عمر الامين منذ نهار الجمعة المنصرم ولم تعرف حتي الان طريقا للهدنة، "الصحافة" جلست الي الرجل داخل منزلته بزاوية الطريقة بحي ود البنا بأمدرمان، ووجهت له العديد من الاسئلة وساقت كافة الاتهامات للوقوف علي اسباب الازمة التي نملك لها ثلاث روايات، الشيخ تمسك بروايته قبل ان ندلف الي محاور اخري واسئلة كثيرة وضعناها امام الشيخ لساعتين كاملتين لم يقطعهما سوي تجدد الاشتباكات بين انصاره وشباب الحي، ومرة ثانية لاستبدال شريط الكاسيت.. فماذا قال ومن هم من يتهم الشيخ وماهو سر هذا الثراء الذي يتحدث عنه الناس . ماهي الاسباب التي قادت لكل هذا العنف؟ المشكلة داخلية بين اولاد الحي وبتحصل لا مرة ولا اتنين ولا عشرة ولو مافي الحي هنا بتحصل في اماكن كثيرة ويتدخل الناس ليصلحوا بين المتخاصمين وتنتهي علي كدة، لكن السبب ولد من ابناء الحي جاء ماشئ واتحرش علي واحد من الحيران، فقام الحوار ضربوا ومشئ الولد احضر خالوا وحكي الحاصل واعتذرنا ليه وانتهي الامر علي كدة. لكن هل يمكن ان تتسبب مشاجرة بين شابين كما ذكرت في كل هذا العنف والاشتباك المتواصل حتي الان؟ هناك ايادٍ خارجية دخلت تحرش وتوسع في المشكلة وحورتها من قصة فقير مع ولد من ابناء الحي واصبح المقصود الشيخ نفسه والقصد الزاوية تتفرتق والذكر يتوقف دا الشئ البهتفوا بيهو والهتاف بتاع الشباب يردد الشعب يريد اسقاط الامين وانا ماعندي منصب دستوري عشان يتم اسقاطي، وتاني الزاوية دي ما اول زاوية في نص الحلة ولا اخر زاوية والزاوية دي ليها عشرين سنة واي انسان يقول كلام مثل هذا يسأل نفسو خلال العشرين سنة هل حصلت مشكلة؟ ماحصلت وهم ناس جيرانا وحبانا واهلنا وقمنا معاهم وانا ما دخيل علي الحي ولدوني فيهو، وترعرعت ونشأت معاهم فيهم الاهل والاصحاب وفيهم الدرسنا معاهم . من تحدثنا معهم بالطرف الاخر تحدثوا عن اعتداء علي امرأة من نساء الحي ؟ حسب حديثهم لكن الليلة لو مشيت بتلقي الانسان سيد المشكلة وخالو والمفاوضات حتي الان جارية معاهم لحل المشكلة وديا لانو الولد موجود واهلو موجودين وانا ساعي انو الموضوع دا ينتهي علي كدة، لكن قصة امرأة تم ضربها وغير ذلك محض كذب عشان كدة انا قلت ليك في ايادي دخيلة. لكن هم يتمسكون بأن احد المريدين قام بضرب امرأة ... مقاطعا... امرأة وين الثارت حفيظتهم المشكلة سببها ولد في الحي اعتدى علي احد الحيران في الزاوية والموضوع ما بتاع خمس دقائق وعادي بحصل وينتهي بالاعتذار لكن الامر جاب ليه كمية من الناس وملتوف وحجار وصعدوا في راس البيوت والحيران كلهم ما من خارج الحي في كل بيت بتلقي واحد ولد البيت او ود عمه يعني في النهاية نص الفقرا من الحي ولو كانوا كلهم من الخارج كان نقول دخله لكن كلهم اهل وعوائل وناس مترابطة مع بعض وهناك اشاعات كتيرة بتقول الشيخ يسئ اهل الحي الشيخ يشتم اهل الحي يستحيل الكلام دا ما من عاداتنا اصلا. ايضا تحدثوا عن انوا المريدين سببوا ليهم مشاكل وازعاج؟ دا السمعته انت لكن مفروض اهل الحي القراب وجيرانا الملاصقين يقولوا الكلام دا لكن دا ما حصل وكلهم اهلنا وحبانا والما ماخدين معانا الطريق برضوا حبانا واهلنا. نرجع لقصة المرأة بتقول انك عصيت عليها اولادها؟ بغض النظر عن المشاكل شيخ الامين الدعوة البقدمة شنو البتعصي اولادهم عليهم، انا ارشدت الناس للصلاة والتربية الروحية وبر الوالدين وطريق المصطفي صلي الله عليه وسلم ، يعني الليلة ممكن اعصيك عشان تخلي الصلاة وتتبع طريق الشر لكن مامكن اعصيك عشان تصلي وتصوم وتذكر وتقراء القرآن والناس لو عرفت كلمة عصاني ممكن يعرفوا الفرق ، لكن الشيخ يدرس الناس الجنة تحت اقدام الامهات. هناك ثلاث رويات لما حدث مشاجرة بين شابين ... مقاطعة .. لا دي الرواية الصحيحة وعارفنها اولاد الحي والاخوان الكانوا معاي الان عشان مساعي الصلح لو مشيت وسألتهم حيقولوا ليك الرواية الصحيحة والزول بره الحي ممكن يكون ماعارف لانو الصحف نقلت اشاعات لكن انت اخدتها من المصدر نفسو ولو مشيت سألته الطرف الثاني بتلقي القصة هي مشكلة مع ولد عادية جدا. هل يعقل ان تؤدي لكل هذه الازمة ؟ قول قتلنا المرأة هل يؤدي الامر للملتوف والضرب بالحجارة لكن هناك شئ خفي. ماهو الشئ الخفي؟ الخفي في ناس من مقاصدها انو شيخ الامين ليهو عشرين سنة جمع الكم الهائل دا من الشباب للذكر يوميا والامر ماعجبها و يمكن دافعهم من النهج او خلاف في العقيدة . من هم الذين يترصدون بك ؟ انا ما داير احدد ناس بعينهم لكن وراهم جهات منظمة وكيف نفسر طلوعهم فوق البيوت وقذف الناس بالحجارة يعني ناس الحي ما اظن يعملوا كلام مثل هذا ديل ناس من خارج الحي لانو شباب الحي كلهم مابصل عددهم 300 شاب. لكن هم طالبوا بي عدم تعرض الحيران والمريدين لشباب الحي والتحرك والازعاج؟ يعني دي المطالب البتخلي الناس تضرب بالملتوف والحجارة ويدعوا لاغلاق الزاوية وترك الذكر واصابة 28 نفر ما اظن دي المطالب والانسان القال ليك الكلام دا لو بيتو قريب واسال اي انسان حولين الزاوية لو قال ليك مضايقاني والناس مسببين لي الازعجاج اوعدك بقفلها اليوم لكن براهنك اي واحد من الناس ديل بيتو من الزاوية كيلو. لكن نحنا شفنا بيوت زجاجه تم تحطيموا قالوا ديل حيرانك؟ المنطقة الحصل فيها تحطيم الزجاج كان يفصل بين المريدين والشباب العساكر وهم كانوا يقذفوا بالحجارة وردموا البوليس بالطوب وطعنوا اتنين منهم والكلام دا امشي القسم الشمالي واعرف الحاصل شنو. يعني المشكلة بين العساكر وشباب الحي؟ المشكلة بين العساكر والشباب لكن مناوشات بين المريدين والشباب ما حصلت لانو العساكر طاردوا الناس البتجدع بالحجار وضربوهم . في رأيك ماهو الحل الان بعد ان تصاعدت الاحداث؟ ناس الحي والناس البهمها الامان قالوا نحن ماعندنا مشاكل وانا ماعندي مشاكل مع ناس في النهاية ديل اهلي وناس حلتي ومهما كان وحصل لا اريد الدخول في مشاكل مع الاخرين واستجدي عداءهم حتي نعطي الدخلاء فرقة للتفرقة بين الاهل واهل الحي ومن ناحيتي انا مبادر للسلام لاخر درجة رغم اصابة 28 من المريدين. هناك من قال إن مريديك استخدموا اعيرة نارية واطلقوا رصاصاً في الهواء؟ اعيرة نارية والشرطة موجودة تتفرج دا كلام مامنطقي قوات الشرطة اكثر من 200 فرد يقودهم عقيد ماممكن يحصل الكلام دا. انت متهم بالاستقواء بنفوذك ؟ شوف كلامهم كيف يعني انا لواء في الشرطة قواتهم كانت موجوده في وسط الناس وفضوا الاشتباك ولولاهم لمات الكثيرين لكنهم قاموا بدور كبير جدا ولم تتعرض بالضرب لاحد لكن بعد ما قاموا هم بضرب الشرطة استخدمت سلطاتها وانت ممكن تمشي الشرطة وتسأل عن تعرض افرادهم للضرب . الازمة الحالية لماذا انت دون غيرك من رجال الطرق الصوفية؟ امشي اعمل مقابلة مع اي شيخ ليه صيت في السودان لو ما لقيت عندو مشاكل زي دي تكون شغلتنا دي كلها ما ياها . هل من يقف خلف الاحداث جهات من الطرق الصوفية ؟ الجهات دي ما فيها صوفيه لانو جميع مشايخة الطرق الصوفية حضروا وازرونا وعلاقتنا معاهم سمحة وقالوا لو فيها احزاب حيجيبوا حيرانهم لكن اخبرناهم ان الامر لا يحتاج وهي مشكلة بين ابناء الحي فقط واي انسان في طريق المصطفي لازم يلاقيهو شئ من عنت النبي يعني مامكن مشكلة بسيطة مثل هذه يتعمل ليها رواج كبيرة كدة والجرائد تكتب واساءات في الانترنت وغيره . لكن لا بد للجرائد ان تنقل الحقائق؟ اي الجرائد مفروض تكون (fair) وتاخذ الاخبار من مظانها. لكن هناك بعض الحديث عن ان الطرق الصوفية فيها بعض الصراعات؟ الشئ المتأكد منو انو ما وراها جماعة صوفية لكن يمكن تكون في جماعات تانية لانهم منظمين وبتحركوا في زمن محدد وبهاجموا ساعة الذكر كلها دلائل علي وجود ايادي خارجية تدفع الشباب. متي تتوقع ان تنتهي الازمة؟ الان قمنا باتصالات بالاطراف والمشكلة ماضية الي حل وما يحدث من تحرشات هنا وهناك كلها فردية ويمكن ان تنتهي خلال اليوم وغدا وعندنا 28 بلاغ لي يوم الليلة مانع تنفيذ اي بلاغ للتخفيف من حدت التوتر وعندي اصابات كبيرة لكن مامكن تلقي القبض علي ابناء الحي عشان يتوسطوا ليك وتفكهم ومفروض البلاغات تتنفذ منذ بداية الاسبوع الجاري. هل انت تعمل علي محاربة الشيوعية بالمنطقة؟ دا سقط ولغط الرسالة حقت الشيخ عبدالله والطلب من الشيخ وانا كان عمري 14 سنة وهو في ذلك الوقت كان يؤهل فيني لفتح الزاوية واقامة الذكر واعطاء النفقة، واتأهلت سنة 1990م وبعد سنتين فتحت الزاوية يعني كان عمر 27 سنة والقصة مابختاروك بالتعيين زي الوالي او الوزير لذا انا درسته العمل الشرعي والفقه بين يديه لمدة خمس سنوات بعد ما خلصته الجامعة واول نوبة دقينها في سنة 92 والان 2012م يعني ما فتحت وغمضت ولقيت كل الحاصل دا، والشيخ ما قال احارب الشيوعية. هذا يعني ان الحديث عن محاربة الشيوعية ليس صحيحا؟ عايزين يعملوا لي مشاكل مع الشيوعيين انا ما جيت احارب الشيوعية لكن عندي نهج وجيراني هنا السمانية والختمية لكن الشيوعية امر سياسي وانا رجل دين ما عندي دخل بالسياسة البخليني ادخل في السياسة شنو؟ و من المفترض كان ادرس في الاتحاد السوفيتي لولا تدخل الشيخ عبدالله ود العجوز وعن طريق علاقاته قام بعثني للدراسة في جامعة الملك عبدالعزيز ، ودرست ادارة الاعمال ، والشيخ عبدالله قال لي انا خايفك تمشي موسكو وتبقي ماركسي ولو درسته الفقة في السعودية تجيني سلفي وهناك امر اخر وهو مجايلة شباب اليوم وفهم لغتهم وضروري في العاصمة تكون مواكب وخابر لغتهم وتعرف ان تحدثهم في اي موضوع لذلك درست الفقه والشرع علي يد الشيخ وليس بالجامعة . لكن الطرق الصوفية تتدخل في السياسة ،والانتخابات الاخيرة دليل علي ذلك؟ نحن نؤازر فقط وما مكن تجيب رجل دين وتقول يقود البلد وتدخلنا في الدور السياسي يأتي في باب الدعم لان رسالتنا مختلفة ونحن مارقين للتربية والدين والصلاة وهم للقيادة. شيخ الامين انت تقرب عليك ابناء الطبقة الراقية فقط؟ بعتبر الكلام دا من باب كل ذي نعمة محسود انا مافي زول جاني هنا قفلته ليه بابي وانت شايف الباب فاتح ،انا عندي ناس معدمة وممكن تشوفهم بي نفسك عشان لما تكتب شئ تكون شفته بيعينك وبعد شوية حتلقي طلبة القرآن وهم شبه معدمين. لكن في جولتنا داخل الزاوية لا شفنا تقابة ولا عصيدة ؟ انا في العاصمة منتهج نهج مختلف عن التقابة عندي مايكرويف لانو الناس البتجيني ماممكن تنتظر لمن اذبح ليه واسلخ ليه واولع النار عشان كدة نستخدم التكنلوجيا في الاكل وفي كل شئ ونحن في العاصمة ما بتتقبل العصيدة ام دبلبة الا تاكلها براك وهنا لازم تجيب ليهم الهامبيرغر والهوت دوق لكن لو جيبته ليك العيكورة انت دا ما بتقدر تشربه لانو كل ناس عندهم جوهم ، وانا بجوني اجانب وناس من هولندا وبلجيكا دخلوا الاسلام جديد وناس من الخليج . هناك ايضا ملاحظة كل مريدنك وانصارك من الاثرياء؟ في كل مجتمع هناك اثريا ووسط ومعدمين نحن عندنا دكاترة ومهندسين وعندنا معدمين وفي زمن الرسول تلقي السيد علي قال لو كان الفقر رجلا لقتله وسيدنا عثمان الرسول قال عنه اشتري الجنة مرتين عندما جهز جيش المسلمين، وهو كان اغني اغنياء مكة وخليفة الرسول وسيدنا علي لا يمتلك قوت يومه. يقال انك من تقوم بتشغيلهم والصرف علي دراستهم من وين وكيف؟ بشغلهم بالعلاقات بتاعتي يكون عندي حوار تاجر يشغل معاهو نفر نفرين وتاني واحد عندو شركة مقاولات يشغل المهندسين الخريجين، عشان مايتعطلوا ويقولوا لي منقطعين للذكر،لما اعطي ماداير من وراه شئ الجامعة بدرسهم ماعشان يشتغلوا عندي وهو امر ايجابي ولا رايك شنو وتاني الرسول امر بذلك. لكن شيخ راكب همر ويستخدم التكنلوجيا من وين المال بجيك برضو علاقات ؟ عندي مكتب في السوق العربي لاستيراد الشاي في عمارة جاد غريب، وتوكيل مكيفات ماركة بور وهذه اول مرة افصح فيها عن الاعمال التجارية ايضا املك دكان للاسبيرات وشركة مقاولات في دبي يديرها الحيران هناك وقسم لغسيل الكلي في اديس ابابا بإثيوبيا ودي نعمة انعم بها الله علي لاني اهوي التجارة ، والكل بسأل انا بجيب القروش من وين لكن مافي زول سمع بي اني عندي شيك طاير ولا زول ادي الشيخ قروش سلف او منحة ، وانا من دخل شركاتي واعمالي اقوم بالصرف علي الزاوية والحبان والاخوان. اسرة شيخ الامين وين من دا كلوا طول الوقت ذكر وحيران؟ لازم اجالس الاسرة في المساء وهي تتكون من الزوجة وثلاث ابناء ولد عمرو 13 سنة وبنتين 11 و9 سنوات بجانب الوالدة واختين متزوجات واخ اصغر هو الخليفة ايمن لكن الوقت الاكثر معهم عندما اصطبحهم في زيارتي للزواية خارج السودان في بروكسل ببلجيكا وامستردام في هولند ودبي بالامارات العربية المتحدة.
