خلوا المواصلات ..والكباري القافلة وعندنا خالنا تعبان شوية..وبقوا يتعذروا ليك ب (البرد) """"""""""""""""""""""""""""""""""" قالوا ليك الأندية طالبت ب (بطانيات) من الشركة الراعية..يلعبوا ليكم في (البرد) دا كيف؟ """"""""""""""""""""""""""""""""" من تلقى ليك زول بيدخل ليه في (تلاجة) جديدة البيت ..ويزحزح فيها حتة – حتة..بعد كم شهر من الموقف دا بتسمع بي عرسو """"""""""""""""""""""""""""""""" الزول البقول ليك من الصباح ..الليلة في كورة مولعة نار في الدوري الانجليزي..اعرفوا طوالي لمن الكورة دي تجي بكون نام """""""""""""""""""""""""""""""""""""""" • أنتوا تعالوا هنا (البرد) مالو انسحب؟. • اشتهينا البرد. • بعد ما نزلنا (المكيفات)...وبقينا نرطن ليك بالروسي زي الما حصل حاجة. • الواحد بقى فينا يمشي البقالة ..يقول لبتاع البقالة بي ثقة عريضة ..عليك الله أديني (جبنة) بالروسي. • ويضيف وأعمل لي (طحنية) بالفرنسي. • كلمة بالعربي ما بتقولها. • بتاع البقالة ما بفهمك ..بقول ليك جبنة بالروسي يعني شنو (كبريت) بالعربي؟. • تقول ليه والله عدم التعليم مشكلة ...ما بتعرف الجبنة بالروسي ..هسع لو جاك روسي وقال ليك عاوز جبنة بالروسي ح تصرف كيف؟. • أوعك تفضحنا وتديه (صابونة). • بتاع البقالة قعدنا نوصف ليه في الجبنة بالروسي لمن فهم قصدنا شنو؟. • وقت فهم القصد ..قال لينا طيب من قبيل ما تقولوا لينا (جبنة)..شنو الحركات البتعملوا فيها دي ..هسع الفرق شنو بين الجبنة بالعربي والجبنة بالروسي. • قلنا ليه أنت وقت شايف ما في فرق ..ما تفهم القصد طوالي ..بتخلينا نوصف ليك من صباح الرحمن ليه؟..وأنت فاهم ما في فرق. • طيب يا بتاع البقالة وقت بقيت مفتح كدا ..أدينا طحنية بالفرنسي. • بتاع البقالة بقى يدخل ويطلع ..ما عرف يتصرف كيف؟. • قال في نفسو يا ربي الطحنية بالفرنسي دي شنو؟...تكون (صلصة). • الفرنسيون ديل جنهم (صلصة). • زولكم ماشي على السلسلة ..قلنا ليه ..لا ..لا..اتجه نحو (المعجون). • قلنا ليه قلنا ليك (طحنية)..طحنية ...طحنية العادية دي ..أوزنها لينا وبعدين لفها بالفرنسي ..بتبقى طحنية بالفرنسي. • قال لينا طيب دا ما أنا الخايف منو ذاتو..أنا لو بعرف ألفها بالفرنسي ..كان فتحت لي (عيادة). • البرد بعمل كدا. • بلخبط الحاجات. • مرة بحضر لي في فيلم في التلفزيون. • قاعد في البرد وبحضر في الفيلم. • ضربو لي تلفون ..قالوا لي خالك (الشويتل) اتوفى. • لبست وطالع على الفراش. • وصلت بيت البكا ..اكتشفت ليك هناك ...التلفون دا كان في الفيلم...ما في الواقع. • والبكا كان في الفيلم...ما في الواقع. • ومن أساسو كدا أنا ما عندي خال اسمو (الشويتل). • ولا عندي خال في الأساس. • لكن البرد بيلخبط. • البرد غشانا. • البرد جهجهنا..وغير حتى جداول ضربنا. • هسع يا ربي الروس ديل عندهم (جدول اتنين). • جدول اتنين ساهل ...ما أظن يكون عندهم. • الروس ديل يتخيل لي ببدوا من جدول سبعة. • البرد راح. • البرد فات. • بعد حضرنا الفنائل والسيوترات والبطانيات ...الواطة قامت سخنت. • الدنيا بقت (صيف) في الشتاء. • عدينا لينا أيام كدا زي الأفلام الأجنبية...انبساطة شديدة. • الواحد يضرب ليه تلفون لي صاحبو يقول ليه اسمع أنت وين؟. • صاحبو يقول ليه أنا في الثورة. • أسمع ما بقدر أجيك مع (البرد) دا. • خلوا المواصلات ..والكباري القافلة وعندنا خالنا تعبان شوية..وبقوا يتعذروا ليك ب (البرد). • طلاب المدارس ..قالوا ليهم تجوا بعد (تسعة). • يجوا بعد تسعة عشان حبة البرد دي. • يعني لو جابت ليها جليد بالجد ...كانوا قالوا ليهم أي واحد فيكم يجيب معاهو ولي أمرو. • البرد طفش. • عارفين الاتحاد العام الأيام الماضية ما قدر يحسم موضوع (الرعاية) ليه؟. • قالوا ليك الأندية طالبت ب (بطانيات) من الشركة الراعية. • يلعبوا ليكم في (البرد) دا كيف؟. • الواحد يقوم الصباح ..ساعة ونص بفتش في أصبعو الصغيّر. • آخر حاجة تلقى أصبعك (لابد) في جيب البنطلون. • لمن تنساه. • العجيبة في البرد فرشة الأسنان ما بتلقاها. • قدر ما تقبل الدنيا ..فوق تحت ..ما تلقاها. • مرة مشينا لينا حفلة في برد مبالغ فيه. • الفنان قاعد يغني للناس من تحت البطانية. • أول ما دخلنا ليك الحفلة سألنا من العريس. • قالوا لينا العريس عندو (نزلة) حادة ما قدر يجي مع (البرد) دا. • مشينا على (العروس) لقيناها قاعدة براها في الكوشة متل (الكرت) الدبل البتكفيهو براهو في التربيزة. • تمرقو بي جنبة. • عاوز تفكو وخايف منو؟. • قعدنا (نرجف) ليك من البرد ..والفنان فاكر (الرجفة) دي طرب من أغنياته. • جابوا لينا العشا. • العشا لا فيه بيضة لا فرخة لا لحمة ..ولا طعمية ولا زيتونة ولا جبنة. • قلنا ليهم العشا دا أكيد كان مسكوه لجنة حكومية. • ضربوا اللحوم وجابوا لينا الصحون فاضية. • واحد من الجماعة (المطاميس) وقف ليك في نص الصالون..وقال ليهم أنتوا عشاكم دا لو جبتوا لينا معاه محمد الأمين ما بنقعد ليكم...جايبننا في البرد دا وجايبين ليكم (فنان).. لو ما بخاف الكضب أقول فنانكم دا بقضي في الخدمة الإلزامية غنا. • هسع دا فنان ليكم. • بعدين فنانكم دا أغاني الحقيبة من أغاني وردي ما بعرفها. • أغاني الحقيبة بغنيها لينا بإحساس أغاني وردي ..وأغاني وردي بغنيها لينا بي إحساس الحقيبة. • صاحبكم طبعاً منفوخ من البرد ..عشان كدا عاوز يتفشى في (الفنان). • والفنان ولا عندو ذنب. • لكن البرد كان مبالغة. • كلو منكم ..شبكتونا (نقة)..البرد ..البرد ..البرد. • دنقلا فيها جليد. • ودارفور درجة الحرارة فيها (4) درجات فقط. • والخرطوم تشهد انخفاضاً كبيرًا في درجات الحرارة. • الجماعة بقوا يكضبوا يجيبوا ليك صور الجليد في كوبري المك نمر ..لمن تتخيل نفسك في باريس. • لكن كوبري المك نمر الوداهو باريس شنو؟. • وداهو التلج دا. • أها الواطة سخنت. • يا حليل البرد. • عليكم الله في أحسن من (البرد). • هسع (الفول) البتصلحو فيه دا...بدون (برد) بتقدروا تاكلوه. • وقت الواطة تسخن ..بعرف ليكم الموضوع دا قبل تلاتة يوم. • الحاجات ظاهرة. • شفتوا من تشوفوا ليكم (تاكسي) سايقو عمك كبير كدا ..ورابط فوقو (مكيف) كدا وجاري في شوارع الخرطوم ..أعرفوا طوالي الصيف جاء. • أصلو (المكيف) دا ما اتربط ساكت فوق (التاكسي). • بعدين التكاسا ديل أخطر ناس. • بعرفوا ليك أي حاجة. • عشان كدا ما قاعد اتفاءل ليك بالموضوع دا. • ما بتفاءل بموضوع (المكيف) البكون مربوط في سبت التاكسي. • لو التكاسي ديل بيصبروا ما بتجينا عوجة. • خلوا الصيف يدخل. • جماعتكم ضايقين. • ودائماً جاريين. • الأشياء عندها علاقات بي بعض. • عندها مقدمات. • الحكاية فيها (علوم)..و (كيمياء). • أصلو ما في حاجة ساكت. • من تلقى ليك زول بيدخل ليه في (تلاجة) جديدة البيت ..ويزحزح فيها حتة – حتة. • ح يقولوا ليك بعد (4) شهور ..صاحبكم الكان بزحزح في (التلاجة) ..عاوز يعرس. • تلقوه عامل حساب التلاجة من الباب ..وخايف التلاجة تتزلط. • كل ما كان خوفو أكبر من التلاجة تتزلط ..بعدين وقت يعرس بكون خوفو أكبر من (مرتو). • الحاجات دي بتظهر من (التلاجة). • أصلو ما عاوزة ليها اجتهاد. • الحاجات عندها علاقة بي بعض. • الزول البقول ليك من الصباح ..الليلة في كورة مولعة نار في الدوري الانجليزي..أعرفوا طوالي لمن الكورة دي تجي بكون نام. • كلام ساكت. • الناس البتكلموا ..ديل اكتر ناس كضابين. • بكره تلقاه بحكي ليك عن الكورة تقول كان لاعب فيها. • وزولكم نايم. • ....... • ملحوظة : لكن افتكر (المكيّفات) الكبيرة دي ..بدري عليها. هوامش • إذا الواطه سخنت من الآن ...رمضان كيف؟. • قبل فترة كانوا بقولوا لينا الخرطوم فيها (جليد). • شفتوا في رمضان .ربع اللوح بتاع التلج ح يبقى بالشيء الفلاني. • ويمكن عمارة الدهب يبيعوا فيه (التلج) بدل (الدهب). • الناس بدل ما يقولوا ماشيين الدهب ..يقولوا ماشيين التلج. • واحتمال برج الاتصالات هو ذاتو يبيعوا فيه التلج. • قصدنا عدم التحدث عن مباراة الهلال والأهلي في شندي. • عشان الشحن. • عاوزين الهلال يغلب ويرجع بالنقاط الثلاث. • أي تشنج..أو تعصب أو انفعال ..بطلع الهلال من المباراة. • ما تستجيبوا لي أي انفعالات. • وخلوا ردود أفعالكم (أهداف). • ......... • عاجل : يا كيبي جيب لينا قون عادي ..نحن فترنا من (الاندهاشة) دي.
