محمد عبد الماجد دق الدلجة قناة النيل الازرق زي (الدكان) الفي بيتكم زمان استاذ الجغرافيا – كان بخش الفصل ويقول لينا الحصة شنو؟. نقول ليه الحصة (انجليزي). في الجدول مكتوب كدا. بقوم يقول لينا طلعوا كراس الرسم – الحصة فنون. نقوم نكورك زي (السبعة) في نص الرقم من الفرحة. ما في علاقة بين الانجليزي والفنون – زمان برضو – كان لمن زول يعرس بسألو عن علاقتو بي العروس شنو؟. بقوموا يقولوا (ود عمها). المدخل الوحيد للعرس كان (ود عمها). لا في علاقات – لا تفاهمات – ولا قصص حب – ولا حدايق (حبيبي مفلس). لكن بي اي حال من الاحوال الوضع زمان احسن من الوضع الآن – عشان الان بقى في (قصص حب) وما في (زواج). وبقى في حدايق حبيبي مفلس – ما في بيوت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في مباراة الهلال والنسور – واحد سألني بعد ما شاف الثعلب – قال لي انت الهلال فيه كم (ثعلب)؟. قلت ليه – ما عارف لكن الظاهر كدا الكاردينال دا ح يعمل الهلال دا كلو (ثعالب). من اعتزل جمال الثعلب ونحن بنفتش لينا في (ثعلب). ما خلينا نادي – الى ان جابوا لينا (صهيب الثعلب). في زول تاني في استاد الخرطوم بعد ان سجل الهلال هدفه الثاني في نادي النسور سألني قال لي القون الجابو منو؟. قلت ليه جابو الثعلب. قال لي والله (الثعلب) دا فعلا (مكار) – انا زمان كنت فاكرو شغل (كتب مطالعة ساكت) – لكن الليلة شفت (المكر) بي عيني. قلت ليه انت القاعد في (المدرجات) بتقول كدا – طيب (ابوعشرين) الواقف في المرمى داك يقول شنو؟. نظرنا للمرمى لقينا ليك ابوعشرين بطلب في (الغيار). لكن المدرب ما اشتغل بيه. وقت وليد الشعلة جاب قون الهلال الرابع – الزول ذاتو اتلفت عليّ وقال لي دا منو الجاب القون دا؟. قلت ليه دا وليد الشعلة. صاحبكم طوالي قام – قال لي لا كدا كترتوها عديل كدا يا هلالاب. الزول بدون ما يشعر قال لي انت شفت – سيحة ما غلطان عليكم. قلت ليه سيحة مالو؟. قال لي سيحة عشان الاهداف دي – ح يجيكم يوم الجمعة يوم مباراة الهلال والمغرب التطواني ويقول ليكم الاجهزة كلها اتعطلت بسبب قون (الثعلب). لكن قطع شك – سيحة ح يقول ليكم ضربة جزاء الهلال ما ضربة جزاء – اصلو دي البعرف ليها. واحتمال سيحة وقت ما يلقى ليه ثغرة في الاهداف التانية يقوم يقول الفاضل ابوشنب دا مفروص يحلق شنبو. شنبو ما قانوني. عشان شنبو دا ما بتوافق مع لوائح الفيفا. سيحة يطلع ليه كتاب من تحت التربيزة – يقوم رضا مصطفي الشيخ يقول ليه عشان فضل لينا دقيقتين يا سيحة – سريع بس. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). برامج قناة النيل الازرق بقت زي (البيض الملسوق) – اي زول ممكن يعملها. طبعا في ناس كتيرة وقت تسألهم بتعرفوا تطبخوا شنو؟. بقولوا ليك نحن بنعرف نسوي (البيض المسلوق). ومعروف كمان البيض المسلوق ما فيه اي طعم. برامج النيل الازرق بقت كدا. القناة قدر ما تفتحها تلقى فيها الطاهر حسن التوم. الطاهر حسن التوم في القناة بقى اكتر من طه سليمان. طلتو الكتيرة دي لو حولها الطاهر حسن التوم في (غنا) يكون احسن من النظريات البعمل فيها دي. الطاهر عاوز يبقى مفتى. وعاوز يبقى شيخ. وعاوز يبقى مقدم. والغريبة بعد دا كلو مرات بيجيبوه (ضيف). وعاوز يبقى (وائل الابراشي) ذاتو. وخايف الامر يمشي ابعد من كدا ويبقى الطاهر حسن التوم – عماد اديب ويبقى اخوه عمرو اديب وتوفيق عكاشة. ما عاوز اقول ليكم اكتر من كدا. بالمناسبة برامج التو شوك الايامات دي في مصر متل (اعلانات السجائر) مفروض يلحقوها ب (ضارة بالصحة). نفاق – وكسير تلج مبالغ فيه. في برنامج كدا اسمو (علي مسؤوليتي) بجيبوا ليك مقدم البرنامج يصرخ على طريقة (عمرو خالد) – ايه دا – مين البقول كدا – اديني ابراهيم محلب. هكذا يتحدث مقدم البرنامج. ثم ينزل وينفرك – ويتغزل في قناة السويس. دي موش معقول. دي موش ممكن. هو نحن بنشطب في شقة. دا البيشطب في عمارة ما بعملها في سنة. دي قناة..قناة السويس انتوا عارفين يعني ايه قناة. الصحف السعودية. والصحف الاماراتية كلها بتتحدث عن هذا الانجاز…وللاسف الشديد في مصريين موش عاجباهم القناة. تصوروا في ناس كدا. البعمل فيه الزول دا نفس البعمل فيه الطاهر حسن التوم. لكن الطاهر بعملو على شكل (فقهي) كدا. بي عمة وجلابية مع وضع اليد على الخد. سيطرة الطاهر حسن التوم على قناة النيل الازرق بيذكرني ليك بي الدكان البكون في بيتكم. ناس البيت على حساب ان الدكان في بيتهم – وسيد الدكان ما بدفع الايجار اول شهر بيقوموا يجروا من الدكان على كيفهم. يشيلوا السكر. ويشيلوا الطحنية. ويشيلوا البارد. ووقت كهربتهم تنتهي بجروا يشيلوا من الدكان حق الكهربة. نفس الفهم الذي تدار به قناة النيل الازرق. معقولة. معقولة بس. من الاستديو للشاشة. زيتنا في شارع المشتل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قالوا ليك حرامي تلب ليه في بيت. تلب الساعة اتنين صباحا. مفتكر الجماعة ناموا. الحرامي تلب كدا – ودخل ليك على الصالون – فتح الخزنة. مع فتحة الخزنة كدا ..ناس البيت قاموا ..سيد البيت جاء جاري بي سيفو. كمش ليك الحرامي. الحرامي عاين ليه كدا ..وعاين في الحوش – لقى ليك بنات الراجل السبعة واقفات بي (كريماتن). الحرامي قال يتصرف سريع..قام قال لي سيد البيت يا حاج انا جيت عشان اطلب يد بنتك. سيد البيت السيف وقع منو؟..وقال للحرامي طيب يا ولدي انت ضايق مالك؟ – ما كان تتعب وتجيني في وقت زي دا – كان تخليها تصبح…يا بيت جيبي البارد واعملي العشا. البنات السبعة قعدن يزغردن. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مريخابي قابلوه في الشارع اربعة هلالاب.. اربعة هلالاب صعبين ما بتفاهموا. المريخابي حاول ما يجيب سيرة الكورة. لكن الهلالاب ما ادوه فرصة – ضغطوه. المريخابي طوالي قال ليهم : والله انا ما غايظني نقطة النقعة. الهلالاب شافوه مغيوظ شديد – قالوا ليه طيب الغايظك شنو؟. المريخابي قال ليهم غايظني الفاتح النقر البقول المستقبل للهلال. مريخابي تاني بعد تعادل النقعة قال لي زوجتو اسمعي انا تاني لو سمعتك بتيجبي سيرة (الكهربة) ساكت بوديك بيت ابوك ..صاحبكم عاوز ليه اي سبب. زوجتو قالت ليه انا سيرة (الكهربة) ما بجيبها ليك – لكن (النقعة) ما بخيلها ولا بكضب عليك. هسع في علاقة بين الكهربة والنقعة لو ما حركات منكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و بكرة نزار حامد سوف يتعرض لمراقبة قوية. عشان كدا (بشه) يكون جاهز. افريقيا كلها بقت تراقب في نزار حامد. نتمنى اندرزينهو من بداية المباراة. كاريكا الايامات دي ايامه. لو نيسلون دخل (الفورمة) يبقى ما عندنا اي مشكلة. جهزوا الخرطوم – للاحتفال بكرة. اطلعوا للشارع. الناس عاوزة تفرح. والهلال الايامات دي بيفرح. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. السيدة (ل) – الفول (السادة) لو شلخوه ما ببقى (كبدة). وقرّض على كدا.
