المعلم سبت بلال عبد الله أحد الشخصيات التي لا يمكن تجاوزها بالمنطقة الصناعية بأم درمان، والتي جاء إليها في مطلع خمسينيات القرن الماضي شافع يافع لا يتعدى عمره الثمانية سنوات، دفع به والده إلى المنطقة لتعلم صنعة «تنفعه» في مستقبل أيامه كما كان التفكير السائد وسط الأسر في تلك الحقبة خاصة الفقيرة منها، والمعلم سبت منذ تلك الفترة وهو يجوب شوارع المنطقة الصناعية بأم درمان بدأ متنقلاً بين الورش ليتعلم الصنعة.. كصبي ميكانيكية حتى أصبح اليوم أحد أكبر المعلمين خبرة وعمراً بالمنطقة الصناعية بأم درمان بل أحد معالمها وتخرّج على يديه العشرات، بل المئات من الميكانكية المهرة. كان مدخلي للمعلم سبت عمرك كم يا معلم، حيث أن نشاطه وحيويته لا تتيح لك فرصة لتخمين عمره؟ - أجاب بدبلوماسية.. والله ما بتذكر المدة طالت، وضحكنا جميعاً. طيب، على يد من تعلمت الصنعة؟ - لم أتعلم على يد معلم واحد رغم قلتهم في ذلك الوقت، فقد تجولت في عدد من الورش والتي كانت تعرف ب«القراشات» والتي كان يمتلكها كبار المعلمين أمثال عز الدين «أب كريك» وشقيقه عثمان وجابر أبو العز والمعلم الكبير «الفندقلي» وده كانت بداياتي معه، وبالمناسبة الفندقلي لم يكن ميكانيكي فقط، بل كان براداً وقد برع في هذا الجانب وكانوا بجيبوا ليهو الإسبير القديم ويصنع ليهم واحد أحسن منه، وكان يصنع الإسبيرات غير المتوفرة في السوق «في واحد يقدر يعمل كده هسع»، هكذا علق ضاحكاً. ً سألت المعلم سبت عن طريقة تعليم الصنعة زمان؟ - أول شيء التلميذ كان يقعد ساكت في الأيام الأولى يرسلوهو للشاي وينظف الورشة بعد كده بسمحوا ليه يقيف مع المعلمين وهم شغالين «يعاين ساكت» بعد شوية يكلفوهو بفك اللستك ورفع العربة بالعفريتة، ويتدرج الواحد في المهام إلى أن يتعلم الصنعة والكلام ده بعد سنتين ثلاثة -ويستدرك المعلم سبت- وخلال المدة دي تكون ادقيت بالسوط الذي يكون معلقاً على أحد الحوائط بواجهة الورشة وما تنسى كمان «الفلقه» وهي ربط الكرعين الاثنين «بالمنجلة» ويعلق ضاحكاً-اليومين ديل تدق ليك تلميذ يدقك، لأنه بجونا ناس كبار مش زي زمان. طيب كانت اليومية بكم؟ - مبتسماً.. ياخي قروش شنو الأسبوع كلو بدوك ريال حق الصابون عشان تغسل هدومك، عشان يوم السبت تجي نضيف. قلت للمعلم سبت مازحاً-المكيانيكية بغسلوا هدومهم؟ - أجاب بسخرية أشد من سخريتي.. لو جيت وسخان المعلم «بدقك» والله الوسخ والزيوت في هدوم الميكانيكية الأيام دي.. زمنا الميكانيكي كان نظيف لأننا بنستعمل «الاصطبه» وهي قطعة قماش من بواقي مصانع النسيج بستعملها في نظافة الأيدي وعدة الشغل.. ياخي اليومين ديل أي واحد يوسخ هدومو بالزيت ويعمل ليك ميكانيكي وديل بخسروا العربات مش بصلحوها وأي ميكانيكي تلقاهو وسخان ده «فشنك» وشغلو وسخان زي هدومو. قلت ليهو المستوى بتاع الميكانيكية هبط اليومين ديل؟ - لأنهم ما اتعلموا صاح ياخي ديل دايرين قروش مش تعليم الواحد يجي داير يتعلم يقول ليك بتدوني كم «نحنا اتعلمنا بدون قروش». العمرة بتاعت العربية كانت بكم؟ - أجاب.. خمستاشر جنيه للعمرة، وما بين خمسين قرش إلى جنيه ومرات «طرادة» للأعطاب الصغيرة بالنسبة للعمرة تجب عربيتك «القراش» يقولو ليك شيل أي شيء بخصك منها بس الاسبير والعفريتة وتسلم المفتاح لأكبر صبي بالورشة.. إذا كان الشغل بستغرق يومين يقولوا ليك تعال بعد ثلاثة يوم لما تجي في المواعيد تلقى عربيتك جاهزة ومغسلة وكل الإسبيرات التي تم اسبتدالها في «ضهرية» العربية تدفع بس «كان في نظام». يا معلم سبت أشهر الماركات الموجودة في ذلك الزمان؟ - أولاً العربات ما كانت كتيرة ويمتلكها قلة من الأثرياء أمثال ناس أبو العلا كانوا بيركبوا مرسيدس وأصبحوا فيما بعد وكلاء لها في السودان. وناس البرير وبعض الشوام وبعض كبار الموظفين وديل تحسبهم على أصابع اليد الواحدة، أما الأسر الاقل ثراءً فكانوا بيركبوا «الحنطور». أما الماركات الثانية فكانت أغلبها إنجليزية «بحكم الاستعمار» البيجو «المكوة» وهو فرنسي الصنع وكانت عربة قوية جداً، وقد كان الأستاذ الصحفي محمود أبو العزائم عنده واحدة لونها أسود.. سموها المكوة ليه؟ - كانت بتشبه المكوة! طيب يا سبت حال التاكسي كان كيف؟ - التكاسي كانت بالعدد ومعظمها ماركة الفورد المعروف بأبورفسة والماركات الكانت عند الحكومة «الكومر» و«اللاندكروزر» و«القندراني» الكبير كان اسمو «الكندا» وناس النقل الميكانيكي «يا حليلو» كانوا بجونا في المنطقة عشان نعلمهم الشغل بتاع العربات الصغيرة.. وقال المعلم سبت وهو يختم الحوار.. أكبر غلطة كانت إزالة النقل الميكانيكي ياخي ده كان مدرسة، بل جامعة علمت ناس كتار.
