رزّاق يا كريم صلى على عجل همهم همهمة حصّن للعباد.. وهوزز سبحتو دنقر للتراب.. هم فوق هم هما صنقع لى السما وكان فى الجو فى غيم وكم نجمات بُعاد وكان الدنيى صيف لا قالتلوا كيف .. كيف أصبحت.. كيف لا لمسة وداد لا لمسة حنان لا رمشة طِريف من قلباً وفى زى أيام زمان.. أيام الدِفِى كانت ماها فِى.. كانت فى المراح شدَّتلو الحمار.. تحلب الغنم لي شاي الصباح والطير ما نضم.. ما رسّل نغم عم عبدالرحيم إتوكّل نزل.. في المُشرَع لِقَى زُملان الشقا الجا من الجريف.. الجا من الجبل علْ الناس بخير صبّح هاظرُمْ.. نقْنقْ ناقَرُمْ غاظوهو.. ونعَل وعم عبدالرحيم ما بخَبِر زعل كل الناس هنا ما بتخبِر زعل تزعل في شِنو.. وتزعل من منو.. كل الناس هِنا.. كل الناس صِحَابْ.. كل الناس أهَل والماهُم قُرَاب.. قرّبُمْ العمل الطاق اليَطُقْ.. عشتْ.. آ.. أبوالزَمَل بي الحال العليك.. بي الفال.. بي الأمل عم عبد الرحيم .. كُتْ فلاح في يوم في إيدك تنوم.. على كيفك تقوم لا دفتر حضور.. لا حصة فطور تزرع بالقمر.. تقرع بي النجوم لكن الزمن.. دوّار.. آ.. بِدُوم عم عبد الرحيم .. ماشي على الشغل فى البال القديم.. من عار التُكل تنشايح جِراح .. كيف الغُسُل الدِنيِى أم صلاح تبدا من التُكُل من حِجّة صباح.. في حق المُلاح في الغُبُن الجديد.. في القسط القديم وبيناتِن عشم.. في الفرج القريب أمونة الصباح .. قالتْلُو النِّعال والطِرقي.. إنَهَرَنْ ما قالتْلُو جِيب .. شيلِن يا الحبيب غشّهِن النُقُلْتِي والترزي القريب بس يا ام الحسن .. طقّهِن .. آ .. بِفيد .. طقّهِن .. آ .. بزيد إنطقّن زمن وإن طقّ الزمن .. لازمِك توب جديد بى أيّاً تمَن غصباً لى الظروف .. والحال الحَرَنْ شان يا أم الرحوم .. ما تنكسفى يوم لو جاراتن جَنْ .. مارقات لى صُفاح أو بيريك نجاح ده الواجب .. إذن وأيه الدِنيِى غير .. لمّة ناس في خير أو ساعة حُزُن عبد الرحيم يا حُر ماكا حُر يا ريت التمر .. ياريت لو يشيل كلِّ تَلاتْ .. أشُرْ ولاّ أيام زمان كانت ما تمُر كان ماجاك هوان .. ما لاقاكى ضُر كان لا ضِيق يضيق لا أنغرغَرْ صبر ولا شابيت غريق .. ولا طلوَحْ فقُر كان ماكان .. وكان أكيسى دُر حيكومات تجى وحيكومات تغور بتحكم بى الحِجِى .. بى الدجل الكِجُور مرّة العسكرى .. كسّار الجِبُور ويوم بإسم النبى .. تحكمك القبور هِم يا الفنجرى .. يا الجرف الصبور كل السقتو ما باقى على التِمور وأرضك راقدِى بور لا تيراب وصل .. لا بابور يدور والماهية أُفْ عيشة هاك .. وكُف فى هذا الزمن .. تُف يادنيا .. تُف يا العَبِد الشقى ما أتعوّدْ شكى لكن الكفاف فوقك .. منتكى حالك ما بتسُر إِلِّى كمان فى ناس فايتاك بى الصبُر ساكنين بى الإيجار .. لا طين .. لا تمُر وواحدين بى الإيجار .. ما لاقين جُحُر سِلعتُمْ الضُراع .. والعرق اليخُر عمال المدن كلاّت الموانى الغُبُش التعانى بحّارة السُفُن حشّاشة القصوب لقاطّة القطن الجالبة الحبال الفِطن الفُرُن الشغلانتو نار والجو كيف سُخُن عيشُنْ كمّهو .. وديشُن هان قَدُر وناساً حالا زين مصنع .. مصنعين طين فى طين .. ووين ما مرابا مُر.. بارد همها لا يعرق جبين .. ولا وشاً يصُر عين والله .. عين كلها كمها .. وهمها هان قدُر فى الجنة أم نعيم .. فى الجنة أم قُصُر يا عبد الرحيم إلِّىِ ورا القبُر ويلكد فى النعال فتاح يا عليم وإن كان الفقر يا عبدالرحيم أشبه بى الكُفُر ونقرط لى الحمار نقريط الحمار .. لاتنسى النِعال الطِرقِى الخدار اللِّبِس الجديد تسريح السفر .. لى الماشى الصّعيد ماشى الدّيش .. نَفَر والبال إشتغَل بى الأبى ما يعِيد .. الحول ما أشتغل الغُبُن الشديد .. السابا ورحَل الضيق .. المحَل والفرج القريب الجا .. وما وصَل زى الحال ده يوم .. لا كان .. لا حصَل والبال إشتعَل السكة الحديد .. يا عمو القَطَر يا عبدالرحيم قِدّامك قطر ........... وسال الدم .. مطر وطارت دمعتين .. وإنشايح وتر يا طاحن الخبر ما بين القضا .. ومَرْحاكة القدر الشِّهدوا الدموم .. والدمع الهَدَر إيدُمْ فى التُراب .. والعين فى القطر عارفين الحصل عارفين فى حذر الخبر اليقين .. بوّخ .. وإنتشر أطفال القرى .. وعمال الحضَر أدوهو الطيور .. ودَّوا البحر إنصاعت سحاب وإنْدافَقْ مطر عم عبد الرحيم .. فى الشارع عَصر لى تالا اليسار متفادى الكَجر .. دورية الكجر جفّلت الحُمار .. وطلوَح زى حجر وعم عبد الرحيم .. إتلافا القطر فتاح يا عليم .. سال الدم مطر جرتق لى التُراب منشور بى كتاب روشتّة .. وجواب مفتاح أب قُراب .. أورنيقين سَهَر جنب لِبدة حُمار مقطوعين ضَهر ... عم عبد الرحيم ..يا كمِّين بشر صحِّى الموت سلام ما يغشاك شر ..
