شوهد السيد زنكلوني يتحدث في ندوة نُظمت حول قرار رفع الدعم عن المحروقات: بسم الله الرحمن الرحيم أول حاجة يا جماعة نبدأ بالسؤال الجوهري والأساسي وهو عنوان الندوة: لماذا رفعت الحكومة الدعم عن المحروقات؟! لكن قبل ان أجيب عن السؤال المطروح، لا بد لي من كلمة أمينة وصادقة وشفافة في حق أخوانّا في المؤتمر الوطني، نحنا من ما دخلنا معاهم في الحكومة العريضة دي ما لقينا منهم إلا المعاملة الطيبة والنِّدِّية والاحترام المتبادل، وأقول ليكم حاجة للأمانة والتاريخ إنو أخوانّا ديل- جزاهم الله خير - لو اتخذوا أي قرار نحنا دايمًا بخلونا نكون أول ناس عارفين بالقرار قبال ما يعلنوهو في وسائل الإعلام، يعني حكاية إنو بهمشونا دي افترا ساكت، عشان كدي نحنا دايمًا معاهم على الحلوة والمرة يربطنا حبل واحد ويقطعنا سيف واحد، وهسع دي كان الهيكلة الجديدة شالتنا، نحنا عافين ورضيانين عليهم، وكان خلتنا كتر خيرُم وبارك الله فيهم ياها المحريّة فيهم، والله المؤتمر الوطني دا فيهو رجال أشاوس غُر محجلين من آثار الوضوء، وسيماهم في وجوههم من أثر السجود، وأنا متأكد من إنو لوشالونا تاني بجيبونا ولو ماجابونا «عديل» ما حيقصرو مننا، وعشان كدي نحنا مطمئنين من الناحية دي لأننا ماسكين في شجرة قوية أصلها ثابت وفرعها في السماء، مش شجرة «دمس » زي مابروجو المغرضين والمندسين والعملا والمأجورين والبقول الشجرة عروقا نشفت، بنقول ليهو نحنا في حزب «الشراكة الوطنية» ما حنخليها تنشف وبنرويها بي دمّنا ودمّ أولادنا ونسوانا وبناتنا، لأنو هذه الشجرة هي دوحة الإيمان والطهر والنقاء والعفة والاستقامة التي نفقدها في الأحزاب الأخرى حتى في حزبنا نحنا زاتو، ياخي ديل صحابا عديل كدي ربنا يخليهم لينا يارب.. أما بخصوص عنوان الندوة لماذا رفعت الحكومة الدعم عن المحروقات، فاقول بالفم المليان: والله والله والله إنو الحكومة دي مارفعت الدعم عن المحروقات إلا لخير السودان وشعب السودان العظيم، ولأنها حكومة عظيمة وبتعرف قدر هذا الشعب العظيم، وأقول بملء فيّ إنو: القرار العملتو الحكومة دي، اكبر من أن تستوعبه قدراتنا المحدودة وأكبر من ان تحيط به أفهامنا العادية وهي تنظر للخطر القادم للسودان بعيون زرقاء اليمامة، ودي مرحلة من النظرة الثاقبة لم نصلها نحن بعد... بعد نهاية الندوة ربت صاحبه على كتفه وهو يهمس في أذنه: بالغتا يازنكلوني الليلة كسرتا تلج كتير شديد، فرد بخبث: ياريت بعد دا الجبهجية الغتيتين ديل يخلونا!!