ضع علامة «صاح» أمام رقم الإجابة الصحيحة: 1 بعض الصحف أشارت إلى أن وزير التجارة عثمان عمر الشريف، عيّن بتو سكرتيرة ليهو وزوجها مدير لمكتبو، وطلّع ليهم حافز كبير، لكن كدي خلونا في المهم، نسأل سؤال موضوعي ونبحث عن الإجابة أدناه... السؤال ماهي الدروس المستفادة من الجدعة دي: «أ»من أهم الدروس المستفادة من جدعة عمنا عثمان إن صحت هو إنو فعلاً الفي البر عوام، لأنو جماعة مولانا ديل كانو شابكننا المحسوبية المحسوبية، ونحنا عايزين نطهِّر الخدمة المدنية من المحسوبية، وناس الجبهة بوّظو الخدمة المدنية، لكن هسع لما دخلو الحكومة بقو إعملوها ظاهرة ولابخجلو، والله تقول أخير الجماعة ديل، شوية كدي بتفننو في الجدعات دي « » «ب»من أهم الدروس من القصة دي، وهو إنو الشريف عايز يطبق المبدأ الإسلامي القرآني: «الأقربون أولى بالمعروف ولأنو بقى جزء من دولة المشروع الحضاري الإسلامي « » «ج» العملو شيخ عثمان الشريف دا عادي جدًا، ودي ما مشكلتو هو مشكلة مجتمع شغال بس بالقيل والقال، مجتمع غير موضوعي، دايمًا يخلق من الحبة قبة، ديل من حقهم يشتغلو في الوزارة، ومن حقهم ياخدو حافز، المشكلة شنو يعني « » «د» من أهم الدروس المستفادة من الحكاية دي، إنو بس ناس المعارضة دايمًا في كلو العهود بنقدو أشياء ولمن يمسكو الحكومة بعملو نفس الممارسات البنقدوها، ومن امثلة ذلك، الحكاية الهسع دي، وقصة الوزير اللي كان معارض وجاب مرتو مديرة لمكتبو، عندما دخل الحكومة، والبيان الأول للإنقاذ، نقد الفساد والمحسوبية والغلاء وجات الإنقاذ إتوحلت فيها لي إضيناتا « » «2» وزير العدل دوسة قال حينقل مكتبو لي نيابة المال العام عشان يتابع ملفات «الهبرو ملو» بي نفسو، لكن ماعارف نقلو ولاّ «كو» ما علينا، المهم إنو أشار إلى أن «الايام القادمة» ستشهد تطبيق قانون من أين لك هذا، اختر أنسب تعليق: «أ » ياآآآآآآآآآآآآآآآآآآآآآآآآآآ الله ، هو لِسّه في أيام تاني، اللهم طوِّلك ياروح « ». «ب» يا ربي القانون ده كتير للدرجة دي، تلاتة وعشرين سنة ما أجازوه إلا السنة دي « » « ج» يا مولانا قول من أين «لكم» هذا هم واحد ولاّ إتنين، عييييك ديل كتار شديد « ». «د» ما تتعب ساي يا مولانا، ديل لو قلتا ليهم من أين لك هذا، حيقولو ليك هذا من فضل ربي، ويشبكوك آيات وأحاديث لمن تشك إنتا زاتو في نفسك « ».