في هذه المساحة التقينا السيد ساخر أفندي في دردشة عبر الفيس بوك، وفيما يلي ننشر مادار: أولاً كيف تنظر الى ثورة التعليم؟ - والله ياخي أنا شايفا خلت التعليم زي حلة العزابا «بفتح الحاء»...!!! دا كلام شنو يا ساخر أفندي ثورة بي طولا وعُرُ ضا، تقول حلة عزابا؟ - أيوا أنا شايفا كدي ، دا رأيي ياخي ،أصلو مافي حرية رأي ولا شفافية. طيب ورينا وجه الشبه شنو؟ - طبعًا ياولدي العزابا بتلمو في بيت واحد أكتر من عشرين، المفتحين منهم بمسكو الميزانية وإدارة البيت وبسووا الحلة، والبقية وهم الأغلبية ديل مغيبين تمامًا، بس بقولو ليهم أدفعوا «شيرينق» بدفعو.. يا حاج أدخل لينا في الموضوع.. - ماهو دا زاتو الموضوع، «الجماعة» البسووا الحلة ديل بسموهم ناس الإدارة اللي بقومو إسبكوا الحلة تسبيكة تمام التمام وبعد داك بقومو إطلِعوا اللحمة المسبكة «برا»، وبرا دي ختها بين قوسين لأنها الشاهد في الموضوع.. «قاطعته» برا السودان؟ - «يضحك بشيء من الغتاتة والسخرية»: لا برا الحلة. طيب بعد ما إطلِعو «اللحمة» برا بعملو شنو تاني. - بعد داك الحلة بيسرفوها موية لي إضيناتا، وبتبقى الشغلانة دمعة خفييييييفة، وكتييييرة جدًا، زي الجامعات.. طيب ياحاج علاقة حلة العزابا بثورة التعليم شنو؟ - الكلام دا مادايرلو شرح. لا معليش أشرح لينا، عشان المعلومة ترسخ.. - هسع المدارس والجامعات الله إسألك، وفي زمتك دي مابقت زي حلة العزابا؟ ماكتيرة ومسيخة وما عندها أي طعم؟ وهسع الجماعة مش قاعدين إطلعو أولادُم «برا» للتعليم المسبك في بريطانيا وأمريكا وألمانيا وماليزيا، زي الناس البسبكو حلة العزابا وبطلعوا اللحمة برا وإتمو باقي الحلة موية، كذلك الحال الجماعة بعد ما طلعو أولادُم برا يقومو يطجو لينا الحكاية هنا موية، يعني حلة التعليم سرفوها موية لي شلاليفا، عشان كدي تطلع رهيفة، تطلع مسيخة ما بتهمهم لأنها ما معمولة ليهم، يعني لاهم ولا أولادم بياكلو منها. كدي لاكين ماكويس، طيب هسع حصلت توسعة في التعليم ولاّ ما حصلت؟ - وكت أصلو كدي كويس، مطلعين أولادُم برا ليه، مايخلوهم في الحلة الطّجوها موية دي، عشان كدي أنا لمن أقول ثورة التعليم خلت التعليم زي حلة العزابا حقو الناس ما تزعل. كلامك دا فيهو تجني على ثورة التعليم، ثورة عظيمة زي دي تقلبا لينا كلها «دمعة»..!!! - هم القلبوها «دمعة»، ما أنا.. تعريفات عصرية جداً: المرارة هي: أن تمرر الخطة الماسونية لبيع الأوطان. السفارة هي: أن تسافر ماليزيا للاطمئنان إلى صحتك وحاجات تانية. الشطارة هي: أن تشاطر خصمك الأحزان بنصف ابتسامة صفراء. الكآبة هي: أن تكُبْ الزوغة من أعتى ملفات الفساد. العمالة هي: أن تعمل مشاريع زراعية في المناطق المحظورة. اللطافة هي: أن تُلطِف الأجواء بين الشيخ والإمام ثلاثيات ليست للبوح ثلاثة تفقع مرارة قيادات المؤتمر الوطني: حديث الجرايد عن الفساد. وكلمة «يا ناس إنتو ضيعتو البلاد». وأن يجدوا من شيخهم كل العناد. ثلاثة تفقع مرارة المهندس الطيب مصطفى: تصريحات أبو عيسى وباقان. والانبطاح للأمريكان. والرويبضة الهسع واللي كان. ثلاثة تفقع مرارة الإمام الصادق المهدي: الكلام عن توريث الحزب للأولاد. والتحدُث مع البعاعيت الأجداد. وبطء «التعويضات» وتأخير السداد.
