رمضان قال سلام عليكم وأهلاً وسهلاً وعم الزين فتح الدكان، وقال سلام عليكم أهلي المسلمين وإن شاء الله كل سنه تامين ولامين.. حاجة زهور نظمت المطبخ شي بصلة محمرة وشي ويكة ونشفت اللحمة وقعدت في عنقريب قدام الراكوبة تنقي في بليلة العدسي.. نجوى رجعت من الخليج بمعنويات مرتفعة ووقعت في البن السعودي هرس في الفندك.. الريح تحت النيمة واقع زي الميت.. يمصمص من الإبريق وينق في سمية «الولية دي ما تخلي اللوله دي اصلا لازم اول يوم تفطر عند امها».. جعفر جالس على الفرشة يضحك ويقول: هووي يا الريح زول غير سمية كان قعد معاك وقابل خلقتك دي وبوزك الماديهو شبرين على طول الخط دا ماف! بنات الحوش كالعادة في الغرفة المظلمة وهاك يا نوم ومسيح بالكريم.. الشفع جوطة وأكل وقعوا في عصيدة الدخن بالروب المسقية سمن أكل بصوت عالٍ وكالعادة جات سفنجة طايرة من الفرشة ومعاه صوت صهيب.. تاكلوا السم الهاري ياصرم! شالوا الصحن ومشوا ادسوا في دكان عم الزين.. الشمس فجاءة قررت تبدل السحاب الأسود وصوت الرعد ضرب وهاك يا مطرة قطعت الكهرباء.. حاجة زهور خطفت الكانون وجرت جوة عشان البليلة تنجض.. الريح جاء جاري الراكوبة.. المطرة لسة مدورة.. الريح يبرطم.. ساعتي ما لابسها والمطرة حالفة ماتقيف يعني أعرف الفطور جاء كيف؟ فجأة لمح صهيب ينتح في كوز ضخم فهرول نحو المزيرة وشرب ونادى يستعجل الفطور.. ونادى عم الزين الذي لوح بيده قائلاً: ياناس الساعة يا دوب ستة المطرة دي غشتكم ولا شنو؟!
