الله أكبر الله أكبر لا إله إلا الله ولله الحمد..نداء العيد خلى الكل يتحرك فرحان ريحة شاي اللبن بالهبهان ملت الحيشان مع الصباح اتلخبطت بريحة المطرة الخفيفة..عم الزين طلع بعد ماصبح على كل ناس الحوش..حبابكم ..تامين ولامين، وربنا يجعلكم من المعيدين..زهور شالت المصلاية وطلعت مع الجارات لصلاة العيد..نجوى دست البتفور وطلعت ناعم سمية في شيالة الديوان..بنات الحوش آخر همة وجري وراء النضافة آخر حاجة ولعن البخور والمسجل على إذاعة ام درمان فوق تربيزة الحديد يرسل تهاني العيد..حاجه نفيسة رفعت صحن لقيمات بالحيطة للشفع ونجوى مدت ليها بسكويت مكنة..شوية شوية الحوش راق والرجال رجعوا صواني الفطور الفاضية..والناس رقدت اخدت نومة الضهرية قبال يطلع صوت سمية..تاااااااااااااني يا الريح فيس بوك..ياوليه انتي جنيتي أنا بوصي ليك لي ظرف حنة اسمو نجلاء الدامر دا آخر جزاتي ليك!!