هرولت حاجة زهور بثوبها الابيض لتلحق صلاة العيد.. المنزل بعد تجديد الطلاء والأثاث الجديد اصبح كالعروس.. بنات الدار قبعن في الفناء متبهرجات.. نجوى واحسان تساعدن في رص الخبيز في الشياله ولسان حال سمية يقول.. غريبة الهناء تقول لي خبيز فرن الحطب! الناس افواجا يدخلون البيوت في تحية جماعية ودعوات العفو والعافية وينعاد عليكم.. والجاية عروس تتبعها عبارات آمين من بنات الدار لكبار السن ونظرات تمنٍ نحو عزاب الفريق.. شفع الحوش كالعاده.. هاك يا فوضى..الكبت الحصل في رمضان كلو فرغوه في مسدسات الموية والالعاب النارية.. كلو مره يرموا واحدة في الراكوبة تخلي نسوان الحوش يجروا وراهم.. عم الزين.. بعد ما دخل بيوت الحلة بيت بيت.. جاء يستعجل الفطور عشان يشيلوا حوش ناس حسين لانو العيد الاول لابوهم ومعاهم ضيوف وعلى حسب كلام الزين.. البنات قلبهم مكسور ودايرين شويه نعوض فقد ابوهم في يوم زي دا..الريح انفرد بجعفر عشان يديهو قروش..انتا جنيت يا الريح تديني قروش الجلاليب حقت اولادك؟ وبعدين القروش دي خليها مصاريف لحدي ماتبيع العيش بتاعك..الساعة واحدة كان العيد ودع زي ما رمضان في لمحة عين فارقنا.. الشفع حايمين والرجال نايمين في الديوان ونسوان الحوش لسه مع الونسات.. استرقت نهى السمع لونسة امها مع جارتهم في الباب.. سمعت عبارة طلاق.. خملة.. بيتها وسخان.. ما لحقت خبزت.. تشوفا مجيهة تقول بيتا يبرق.. ضربت كفًا بكف وهي تجلس بين بنات الحوش في عنقريب امام المطبخ.. سبحان الله صباح العيد الناس تشمت ياحليل رمضان اقلوا كانت الواحدة قبل تقطع بتقول استغفر الله وبعدها اللهم اني صايم.. جاءها صوت حاجة زهور من المطبخ ما خلاص يابتي الشياطين فكوها.
