عندما توجهت إلى فتح الباب أدركت أن الطارق هو ثقيل أفندي من الطريقة المزعجة والملحة التي يطرق بها الباب، وحين توقفت من الخارج أمام الباب تعمدت ألا أدعوه إلى الدخول، لكن ثقيل أفندي يدرك مثل هذه الأساليب التي تمنعه، فسرعان ما تقدم لوحده للدخول بينما تبعته وهو يدخل إلى صالون الضيافة، وما أن جلس قال: يا فردة المويه عندنا قاطعة وعايز أستحم، ولم ينتظر أجابتي فطلب مني حذاء السفنجة، ثم ألتفت إلى المقعد ولمح البشكير وأخذه على كتفه، فقلت له: يا شاب أنت عارف البشكير حاجة خاصة وما بستعملوه غير صاحبه، لكنه لم يعر حديثي اهتماماً وقال لي: سيبك من الوهمات دي يعني حيسممك لو أستعملته؟ ثم ابتسم بخبث وقال: حضِّر العطر الرهيب بتاعك لمن أطلع عايز أتعطر. وقبل أن يخرج التفت ولمح حقيبة تحت السرير فأخرجها، فصحت فيه بغضب: يا أخي دي ما شنطتي دي بتاعة ضيف معانا، وهنا أرجعها إلى مكانها، وقال لي: طيب أمشي جيب لي جلابيتك الكاربة أنا الليلة ما عندي ملابس نضيفة، وهنا فضلت الصمت عسى أن يغير رأيه، لكنه عاد وقال: يا فردة شدة واحدة بجيبها ليك آخر اليوم. ٭ متين في حاجة شلتها وجبتها مرة تانية؟ نحن أصحاب وفرد ما في مشكلة حاجتك هي حاجتي وحاجتي هي حاجتك. ٭ ياتو حاجة حقتك بقت بتاعتي.. يا أخوي بصراحة أنا ما عندي ليك جلابية. خلاص يا فردة لمن أتجرست خلينا الجلابية أمشي جيب لينا العطر الرهيب بتاعك. وتعمدت أن أغير الموضوع وقلت له: كدي ورينا عملت شنو في موضوعك المعلق، ويبدو أنه بخبثه أدرك أنني أريد أن أصرفه عن إحضار العطر، فقال لي سريعاً: بعدين يا فردة في المساء بوريك الحاصل، لكن هسه عليك الله بسرعة يا فردة ناولنا العطر بتاعك. وهنا أدركت أنه لا مفر من إحضار العطر، فولجت بالداخل، وهناك قررت أن أحضر عطراً آخر أقل جودة وأرخص سعراً، وقدمته له متصنعاً الابتسامة، وقلت له ٭ يلا يا فردة أتعطر ده عطر رهيب أحسن من العطر داك، لكنه فاجأني بسرعة وقال: يا فردة عايز تدقسني عطرك ده بتاع تسعة جنيه، وكمان بخمسة في سوق ستة، أمشي يا أخوي ما تضيع زمنا جيب العطر الرهيب. وهنا لم أجد مفراً، وأحضرته له، فأخذ يرشه رشاً على جسده وملابسه، فقلت له غاضباً ٭ أوع تنسي كمان الشبشب بتاعك، فضحك وقال لي: والله الحمد لله ذكرتني، أمشي بسرعة جيب لي جزمتك السنينة عايز أشدها بس لحدي بعدين.. وهنا انفجرت فيه وقلت له: ٭ عليَّ الطلاق ما بديك ليها.. أنا ما عندي غيرها.. عليك الله يا أتوكل ألبس شبشبك ده وهوينا. وهنا ابتسم وقال لي: أنت بقيت صعب.. ما كنت زول أريحي. ٭ يا أخوي أريحية ما بتنفع ما طلباتك الما عندها حد. هنا ابتسم وقال: نعمل شنو.. عشمنا دائماً فيك كبير.. هسي كدي آخر طلب أدينا شوية فكة بتاعة المواصلات، ورأيت أنه لا مفر، وخوفاً من طلبات جديدة أخرجت له مبلغ ثلاثة جنيهات وقدمتها له. فقال لي: يا فردة أنا ماشي الكلاكلة، الحافلة ماشي بس بألف ومتين، وهنا قررت أن أخرجه بأسرع ما يمكن وقلت له: طيب هات الثلاثة. فأعطاني لها فأبدلتها له بفئة خمسة جنيهات، فاستلمها وقال مبتسماً: خلاص يا فرده بعدين بجيك آخر اليوم، ويمكن برضو ألقي الموية قاطعة، وناخد لينا حمام منعش وبخة بختين من عطرك الرهيب.. باي باي يا فردة.