كأس العالم المرة دي اثبتها لينا من جديد كوستاريكا تهزم ايطاليا وكولمبيا تفوز ونتائج كتيرة تفاجئ الناس ولكنها النظرية الكورة ما بتعرف كبير اسبانيا طارت فوووووو اول المغادرين النظرية مثبتة تجي الميدان تتطاول وتتقاصر وفاكيها في روحك تترصع لما تعرف حاجة الكورة بتدي البديها الكلام ده لي لاعبينا الواحد فيهم يسجلوهوا في فريق قمة يغير مشيتو ويعمل ليك فيها منقطة ويزوغ من التمارين ويتمرن على الواقف وفي اول محك يجيب خبرنا الكورة بتدي البديها طنقعة مافي الكورة دستورها اغنية ما بنمشي لي ناس ما بجونا الما بجيها ويسكها ما بتجي ليهو براها اصلو لذا من اراد ان تعطيه الكورة عليه ان يعطيها حقها بالاول ومن اراد ان تصلو الكورة عليه ان يسكها يسعى لها يحترمها والكلام ده لكل لاعبينا واخص منهم سي تراوري حركة ملكة جانسي دي ما بتجعل منك لاعب خطير استهتارك بالكورة بعد تصلك وفقدانك لها بكل سهولة ووضعك ليديك على وجهك في حركة تشبه اعتذار الهنود كل ذلك لن يفيدك خذ العبرة من منتخبات البحر ناس كولومبياوكوستاريكا سكوها وفتحوا خيال شافوا ليك الفيل فار المهم حان موعد اعداد المريخ ويا ليت يستفيد اللاعبون من درس كاس العالم قبل الاعداد البدي الكورة بتديهو والبطنقع عليها بتحرجوا شديد ايها الناس تجولت بنا الكاميرا في مدرجات كاس العالم حتى المهزوم لم نجد منه كلمة شاذة ما سمعنا بي زول فيهم جدع كريستالة في الملعب وما فيهم زول بجدع حجر طاحونة زي زول الهلال الفلق رجل الراية يوم كورة اهلي شندي وفلق عمر بخيت يوم كورة فيتا الزول الاشول البقعد في المسطبة الوسطى لا توجد تفلتات على المدرجات ناس حلوين خلقة واخلاق ونحنا نحمد الله على خلقتنا دي وما عندنا يد فيها لكن المفروض اخلاقنا تبقى حلوة لانو بايدنا نبقيها حلوة دروس وعبر كاس العالم كتيرة منها دروس في التعليق يا ناس صاروخ ارض جو ورجل الخط رفع الخط وده شنو يا حكم وغيرها من عبارات التعليق على المباريات التي تضحك من يقولها قبل من يسمعها ودروس في التحكيم أيضاً لاقاكم حارس طلع من الخط ومسك الكورة خلوهوا يلعب تاني ؟؟؟ ودروس في النقل التلفزيوني شاشة ما زي حقتنا غشاشة ودروس في مستوى الملعب ومنظر الاستاد ودروس في شكل وجمال الشعار الذي يرتديه اللاعبون معقولة احمر المريخ زي احمر الشطة التقليد ؟؟ معقولة ازرق الهلال لا تعرفو باهت لا تعرفو مستعمل لا تعرفو اصلو كده ؟؟ معقولة شعار منتخبنا تطير النمرة من ضهر مصعب وهو جاري ؟؟؟ دي في بوكس رابط النمرة بي سلك ما حصلت يجب ان نستفيد من كاس العالم في كلو شي اها نجي لي شمارات والي الخرتوم كان شفت يا والينا قالوا سعر المويه دايرين يزيدوهوا لينا زيدوا لينا المويه اول يا والينا بعدين سعرها زيدوهوا لينا سلك كهربا ننساك كيف والمويه ما موجود منها الا الفاتورة ونشفت النافورة وقطت الماسورة،، يا ماسورة والى لقاء سلك
