كنا متوقعين الرابطة كوستي تقوم علي جنها لكنها ما قامت علي جنها بل جات عاقلة شديد شي يحير رغم انها كانت قايمة علي جنها على العموم ما مشكلة المجانين كتار وقاعدين والدوري طويل المهم المستوى الذي ظهر به ابو الهل يوم الرابطة بيثبت صدقنا لما توقعنا الرابطة تقوم علي جنها مستوى دفع الاهلة الشرفاء لشكر الله على مفارقتهم للمجموعات مستوى خلى الناس الشافوا المجموعة بتاعت الصفاقسي ووفاق سطيف يحمدوا الله كتير مستوى خلى الناس كلها ترجف حتى الزمالك تأكد من انه سيصالح جماهيره على حساب ابو الهل والوطنية تدفعنا للوقوف خلف ابو الهل عشان ما يجيب لينا الكلام عشان التعادل بخلق منو طيش للمجموعتين ودي من ناحية وطنية ما دايرنها ليهو أيها الناس الممتاز دخل مراحل حرجة ولكي يعرف كلو انسان قدر نفسه لابد من تحكيم دقيق ما تحكيم يخطئ ولا يظلم ويستفيد من اخطائه فريق بعينه طواااااالي تحكيم يعطي كل زول حقه تحكيم يخلي الفرق المفروض تلعب سنتر ليق هبوط تتضح من عصراً بدري ويودي فرق ما دون الوسط لمرتبة ما دون الوسط هوووووووووي يا حكام فتحوا عيونكم كويس لتنفتح على الكرة السودانية ابواب التطور التي تلج من خلالها الى رحاب العالمية المهم اليوم نخوض مرحلة جديدة في سيكافا وزي ما قلنا سيكافا دي اهدافها كتيرة ليست البطولة بل أهداف أهم من البطولة الزعيم جاهز لتخطي هذه المرحلة وتحقيق اهداف ابعد اهداف رمينا اليها من خلال مشاركتنا فيها بالتوفيق للزعيم ممثل السودان الوحيد في البطولات الخارجية حالياً وممثل الكرة السودانية الوحيد بعد يوم الاربعا وظهور نتيجة شكوى كبسور مع انو في ناس غتيتين خلاص تمنوا ان يكسب الجماعة الشكوى تمنوا ذلك بالذات بعد ان شاهدوا وفاق سطيف والصفاقسي شاحدين ربك رب الخير ان يكسب الجماعة الشكوى لانهم مقتنعين بانو كلو شي زاد والكان بي جنيه بقى بي عشرة والخمسة بتبقى تسعة عادي وممكن تبقى تلطاشر المهم فطومة اختي او الناطقة الرسمية للفرقة الهلالية كان خسروا الشكوى حا تنطق ولو كسبوا الشكوى حا تنطق شغلتا عاد ناطق اذا كان بي مستوى مباراة الرابطة ده نطقت تسكت متين عاد المهم اليوم كلنا بالدعوات خلف زعيمنا في سيكافا القيافة سيكافا التي استعصت على الناس سيكافا التي اصبحت عقدة للذين فشلوا في الفوز بها من سنة اربعة وتمنين وحتى لحظة كتابة هذه السطور يا ربي الناطقة الرسمية دي اذا جات سيرة البطولات الجوية بتنطق برضو ولا بتعمل فيها اللوز قايمة عليها ؟؟؟؟ أيها الناس إن تنصروا الله ينصركم أها نجي لي شمارات والي الخرتوم والينا عرفنا القعونجه غنية بي بروتينا طيب يا والينا لو قبضنا القعونج واتغدينا باقي ليك المحلية بتخلينا ؟؟ ولا بتشيل مننا رسوم القعونجه السمينة ده قعونج المحلية تقول لينا وتوقفنا صفوف تصدق لينا قعونجه في الوجبة حتى ولو ما بتكفينا عشان تضمن الاجساد كسبت بروتينا مع كيلو اللحمة الحصل كم كده وسبعينا ؟؟؟ وطيرة تاكل في جناها سلك كهربا ننساك كيف والحربوية قالوا فيها كلوسترول يا والينا والى لقاء
