الناس قطعت شوطًا في رمضان ومشى النص خلاص.. أثر الصيام ظهر في الوشوش.. نجوى اصلاً كملانة وكملت زيادة.. البنات بقوا شاحبين والجوع كافر، عم صهيب خلاص.. الريح وجعفر بقوا أحسن والجرسة فكت شوية.. عم الزين الوحيد العارف قيمة كل لحظة في الشهر الفضيل وما صايم أداء واجب.. ختم المصحف وما فرط في قيام الليل ولا ركعتي الضحى.. الناس بتصلي بكلفتة وترجع للسرير تقع عليهو لي وقت الأذان.. رجال الحوش رقدوا في البرش قاطعين حركة.. الريح قال لجعفر.. الزول كان عمل زي الرشيد ود بخيت مالو.. رد عليه جعفر ضاحكًا يازول انتا عطشان ساااي.. الريح الذي فاتت فيهو عطشة واصل تصريحاته.. على القسم من شراب الآبري الساقط نص النهار لامن لونو فتح.. قهقه جعفر عاليًا وضرب كفًا بكف.. يازول.. ارجع من كلامك.. نهره الريح.. يازول قايلوا كلام كضب؟ الناس دي كلها عارفة الرشيد مابصوم رمضان.. عليّ القسم من ايام كان ابوه بخيت بعافيتو وبيضربوا عشان يصوم لحدي هسي مابقوا اولادوا طولوا ماقاعد يصوم.. رد عليه جعفر.. استغفر يازول.. انتا صايم.. مد الريح يده ولكزه قائلاً.. هو اظنو داسيوه يا افندي.. قال ليك مرتو لو ماجهزت الصينية الماخمج للفطور مايخليها اصلاً.. نهض جعفر للصلاة وهو يقول.. ان بعض الظن اثم.. قوم العصر وجب خلاص.. عم الزين افترش معهم البرش بعد الصلاه.. غمغم جعفر.. ان شاء الله عطشة قبيل راحت يا الريح.. قهقه ضاحكًا.. لا والله نية ود بخيت لسه عندي.. هز عم الزين راسه.. الله يهديه.. ابوه كان راجل صالح.. اصطف الجميع في البرش.. وتأخرت صينية عم الزين واولاده.. جاء الريح يحملها مهرولاً.. ووضعها.. رفع الرشيد رأسه في سخرية.. خدماتكم تعبانة.. حرم نسوانا الشمس حية بيمرقوا الصينية.. نظر اليه الريح طويلاً قبل ان يقول.. تتفصح كدا تقول صايم فيهو يوم.