القِبالة أو التوليد، (مهنة) مرت بمراحل عديدة شأنها شأن أية مهنة أخرى، ومثلما اخترعت تقنيات حديثة سهلت كثيراً انجاز العمل في مختلف المجالات، واكبت (القبالة) هذه الحداثة واستفادت منها كثيراً، لكن إذا ما عدنا القهقرى وأطلعنا على كيفية الولادة لوجدنا أن كل المعطيات قد تغيرت، فبعد أن كانت تتم (بقدرة قادر) وبأقل خسائر صارت بعد تقنينها تدريجياً، خاصة بالنسبة للقابلات اللائي انخرطن في هذه الحداثة التي غيرت الحال تماماً. أول قابلة قانونية ولعل التاريخ يحتفظ بأسماء عدد من القابلات اللائي كانت لهن صولة وجولة في مضمار التوليد، مثل"عائشة البشير" أول قابلة قانونية، وأول (باش داية) "جندية صالح ياسين" التي تخرجت في مدرسة القابلات عام 1921م. وفي السياق يٌشار إلى أن مدرسة (القابلات) بأم درمان تأسست عام 1920م، في أعقاب إلغاء القبالة ( البلدية) لتصبح جميع القابلات قانونيات، ومن بين هؤلاء اللائي درسن القبالة في مدرسة أم درمان للقابلات، جلست (المجهر) إلى القابلة الحاجة "النعمة محمد أحمد" من ولاية الجزيرة مدينة أبو عشر، وأمضت معها لحظات من الدردشة الرائعة. (مقص وجفط وحقنة شرجية) { أنتِ درست في مدارس القابلات يا حاجة النعمة؟ - سنة دراسية كاملة 1970 1971م. { كنت معلقة (يافطة) على باب بيتك؟ - لا، لأنو ناس الحلة بيعرفوني وكنت الداية الوحيدة بعد وفاة زميلتي من الكاملين كنا بنشتغل سوا. { بتشتغلي في حلتكم بس؟ - بمشي الخلا أولد نسوان العرب الرحل. { طيب أدوات الولادة زمان كانت شنو؟ وياها ذاتها ولا أتغيرت؟ - الشنطة ياها ذاتها الأدتنا ليها الحكومة، بمقصها وجفطها وحقنتها الشرجية والإبرة، لكن هسي أضافوا ليها (ميزان ضغط وقسطرة بول وجهاز تنفس وأوكسجين. (التعقيم موية حارة وسبيرتو) { بتعقميها كيف؟ - بالموية الحارة وإذا كانت الحالة مستعجلة بنستعمل السبيرتو. { كيف.. أشرحي لينا شوية؟ بنجيب حوض ونكب عليه شوية سبيرتو مع موية مغلية، ونوقد فيه النار، وبنديها حقنة شرقية عبارة عن خليط من الموية الحارة والباردة مع الصابون. { طيب الحمل كانوا بتابعوا وين؟ - بتابعن معاي من (3) لى (9) شهور؟ { وبتكشفي وتحددي الولادة على أي أساس؟ - عندي مقاسات للبطن بالأصابع، بتجيني الحامل كل 15 يوم وبوريها هي في الكم وبتلد يوم كم. { طيب لو عندها مشكلة بتتعاملي معها كيف؟ - بحولها لاختصاصية الولادة، ولو تأخرت في الولادة لأكثر من (24) ساعة طوالي بحولها للمستشفى. (ولادة الحبل موس وشوكة هجليج) { أكيد حضرتي ولادة الحبل.. كيف كانت؟ - أنا ما استخدمتها لكن حضرتها مرة عند عرب الخلاء، عندما استدعوني بعد أن فشلت الداية البلدية في توليد إحدى النساء، لما جيت لقيت الداية البلدية مبركة المرة ومعلقه أيديها في حبل معلق في عود وتحتها حاجة ذي النطع وفي ركبتها شملة عشان ينزل فيها الطفل. وهي تدخل تحتها وتقطعها بموس، وبعدها تخيط الجرح بشوك هجليج وخيط غزل. { على حسب علمي انو (الكلبش) حالة تتعرض ليها الحامل أثناء الولادة.. هو شنو وبتتعاملي معاهو كيف؟ - الكلبش بكون نتيجة لإهمال الحامل بعدم المتابعة وفحص الزلالي الذي يسبب ورماً في الوجه والأرجل، وفي الحالة دي لما نجي للولادة نشعر بيها (تخز) وإذا شعرت انو ولادتها بعيدة طوالي بحولها المستشفى، لكن في حالة اكتشافه مبكراً وعلاجه بطلع مع الخلاصة. (البليلة والبلح بديلاً للفيتامين) { يفترض أن تتناول الحامل مقويات.. أنت بتنصحيها بشنو؟ - بنصحها بأكل البليلة العدسية والبلح واللبن والشية، بدل يمشوا المستشفى ويدوهم فيتامين. { زمان النسوان بلدوا كثير؟ - والله ما شاء الله تسعة وعشرة، وكمان كانت ولادة التوأم كتيرة. { هسي الولادة قلت.. وبقوا يميلوا للقيصرية.. مش كده؟ - آي والله، وغير كده الواحدة تتابع معاك لحدي الشهر التاسع، ولما تجي للولادة تسمعي بيها في المستشفى. { شنو الحاجات الكان بشيلوكم ليها بعد ما تنتهوا من الولادة؟ - كان بدونا ربع اللحمة وربع المرارة والجلد والرأس والسكر والشاي والبلح والحلاوة والخُمرة والدلكة والسجائر إذا الداية بتسجر، يجمعوهن كلهن في صينية ويرسلوهن لينا يوم السبوع. { وأكيد نصيبكم في الولد أكبر؟ - كيف.. كان بدونا قروش. { وهسي؟ - هسي بقت قروش بس، والدايات الجديدات بشيلن بين 50 200 جنيه، لكن أنا البدوني ليها بشيلها. {بالنسبة للختان.. امتنعتوا عنو ولا لسه مواصلين؟ زمان الحلة كلها كانت بتختن فرعوني، لكن هسي الناس وعت ونحن منعونا وعملوا لينا ورشة في الحصاحيصا، وأي واحدة تختن تتعرض للمساءلة القانونية.
