ننتقل في هذه الحلقة من امدرمان زمان الى مجموعة كانت وما زالت تقوم بأعظم عمل، الا وهو الاشراف على توليد النساء بعد الفترة العصيبة التي مرت بالسودان اذ كان النسوة يولدن بطريقة بدائية خطرة الا وهي ولادة الحبل، وما يتعرضن له من معاناة وتتنوس باستعمال معدات غير معقمة ونساء ليست لديهن الخبرة الكافية لذا كان الكثيرات يمتن «بالكلبش» او غيره قبل فتح مدرسة الدايات بأمدرمان. تاريخ مدرسة الدايات والمستشفى بأمدرمان: أ?. مدرسة الدايات: حسب افادة الدكتور/ على ابوبكر عبدالرحمن المدير الاسبق لمستشفى الدايات انشئت عام 1925م بواسطة الانجليز، وكان الممرضات «السورات» الايطاليات هن اللآئي يشرفن على العمل واشهرهن السورة «كليستا» التي عملت بجد واندمجت في المجتمع السوداني وقدمت خدمات كبيرة في تدريب الدايات داخل المستشفى وتوفيت بإطاليا وكذلك السورة ماريا واشهر السودانيات كانت ست بتول التي وصلت لوظيفة «باش داية». ب?. مستشفى الدايات بأمدرمان: افتتحت عام 1957م على يد دكتور/ عبدالرحمن عتباني رحمه الله وسمي على اسمه ولكن اسم مستشفى الدايات هو الذي ساد واشهر الدكاترة الذين شغلوا منصب مدير المستشفى هم: 1. د. عبدالعزيز عتباني. 2. د. الحارث حمد. 3. د. مصطفى مختار 4. د. عبلة شاشاتي 5. د. على منصور مجذوب. 6. د. هاشم عبدالرحمن 7. د. عبدالرازق الزين 8. وآخر مدير للمستشفى هو د. مروان ابراهيم. أشهر الدايات في امدرمان: أشهر الدايات في امدرمان حسب رواية السر وقيع الله وابو جميل وبابكر السيد كما يلي: 1. حي بانت: الداية عائشة عبد الجبار وفاطمة على (بت المقرن). 2. حي الموردة فريق ريد: زبيدة عابدون والروضة وحرم محمد عثمان. 3. الموردة غرب: علوية الداية وزينب مرسال. 4. العباسية: الداية فاطمة عبدالغني. 5. ودنوباوي: امد الحسن بت التماري وأخواتها فاطمة والسرة وزينب بت التماري. 6. شارع الدومة: سعدية محمود. 7. العرضة: الداية ست بتول. 8. السوق الجديد ودنوباوي: سكينة الداية. 9. وداللدر وبيت المال وابوروف: نفيسة بت مياسة وسعدية ابراهيم. 10. ودنوباوي جوار جامع الشيخ قريب الله: الداية ست البنات. 11. العرضة جنوب: سكينة الداية. 12. في القعلة: حاجة وزنو. 13. في الملازمين: قساية الداية. 14. في حي العرب: الشول الداية وبت القندف. 15. في مدرسة الدايات: رجبية الداية وفاطمة وزنو. شوية حكايات عن الدايات: 1. الجعلي شغال في ودمدني ومرتو في الدامر ست مرات يخلي المرة حامل يرسلوا ليه تلغراف يقولوا ليه مبروك جابو ليك بت زوجته لما حملت في المرة السابعة جا حرسة من الشهر السادس لحدي ما جابو الداية الداية هي داخلة على غرفة الولادة مسكها من يدها وسل سكينه من ضراعه وقال ليها حرم المرة دي تجي بت اضبحك انتي ومرتي والبت، بعد ساعة النسوان زغردن قالوا ليه مبروك جابوا ليك ولد قال ليهم يعني الواحد لازم يقيق على الشغلة براهو؟. 2. زمان الداية كانت تكرم من أهل المرأة والوالدة تكريم شديد غير الفلوس التي تعطى لها فكانو بدوها جزء من خروف السماية والمرارة وفي الغالب كراع خروف غير السمن والدهن والكركار ومديدة التمر ومديدة الحلبة. واحد من السكرجية بتاعين الانادي قال بخت الامه داية وخالته شيخة أنداية صاحبنا داير يشرب الكتموتو وكمان داير يمزمز. 3. الجعلي مرتو ولدتها الداية بعد منتصف اليل وجابت بت قالت ليه مبروك جاتك بت قال ليها دي ما بتي ما عندنا بت بتجي انصاص الليالي!. 4. الرباطابي الداية قالت ليه المولود دها مقلوب وجاي بي صلبه قال ليها «شنو اصلوا عربية داخلة البنطون»؟. 5. مستشفى الدايات في امدرمان تقع شمال دار الرياضة امدرمان المرمى الشمالي كان بفصل بينها وبين الدايات والمدرجات الشمالية وشارع الزلط اي مهاجم بصوب نحو المرمى اذا طاشت تصويبته بعيداً رواد دار الرياضة امدرمان يقول ليك وداها الكشافات او وداها الدايات!. مرة مباراة هلال اهلي شغالة وكان لاعبهم الفذ «حبو» معروف انه شوات جداً شات كورة عالية تعدت المدرجات وشارع الزلط ووصلت الدايات وضربت صينية الشاي بتاعت الدايات قمن قالن بي صوت واحد اتلموا يا نسوان الليلة «حبو» لاعب. 6. الراجل مرته بعد 15 سنة ولدت بت وصاحبنا زعل لانه كان متوقع ولد الرباطابي قال ليه انت زعلان عشان جابوا ليك بت بعد 15 سنة والله انت حقو لو جابو ليك «دو» تفرح!. 7. عجوز عايزة تدخل حلة اللبن في الثلاجة ما لقت مكان (صنقرت وشربتها)!. 8. واحد احنف «يعني بنخنخ» وقع في بير لحظه السيئ اول زول جا يطلعه يطلع برضو احنف قال ليه «اطنعك» قال ليه آآآي «طنعني» قال ليه بتحاكيني طيب شول ليك زول «يطنعك». 9. صعيدي حاول يدلع مرته قال ليها انتي حمامة قالت ليه لا انا غزالة قال ليها المهم حيوانة!. 10. الشافع قال لي جاراتهم ممكن اشوف لسانك قالت ليه ليه قال ليها لأنه أمي قالت لسانك زي العقرب!. 11. واحد متشاكل مع زوجته وهي راكبة معاه في العربية مروا بي مزرعة بقر قالت ليه ديل بقربوا ليك قال ليها ايوة اهل زوجتي!. خاتمة: نحي شريحة الدكاترة الذين وردت اسماءهم ونترحم على الذين توفوا منهم ونحي كذلك امهاتنا الدايات اللآئي قمن بدور عظيم في ولادتنا جميعاً ونعتذر للذين فات علينا ذكرهم. الراجل مرته بتتوجع وتقول «الله لي الله لي» قال ليها الله لي انا الماعندي حق السماية. استاذة عربي لما بدأ معاها الوجع كانت بتقول بلغة عربية فصحى «الله لي الله لي» ولما سخن الوجع معاها بدت تكرك «الله لي» بالدارجي!. (سنة يالخنساء)