هاشتاق الخميس هناء إبراهيم #مرات كتير شكلنا بيوحي ليك إننا مبسوطين ونكاد نطير من الفرح والأمور عشرة على عشرة.. بينما الحقيقة أنت ما عارف حاجة ساي.. أقسم بالله الأيام ماسحة بينا الأرض مسح. والله جد.. #زي ما في ناس بكرهوك عشان عيوبك وعشان كرهتكم العيشة.. في ناس بكرهوك لمزاياك.. عشان جميل عشان سمح.. والله جد.. #قالوا الغربة أن يكون لديك خبر سار ولا تجد من تنقلهُ إليه. صحي والله غربة عدوك.. # (الببلومانيا) هو هوس أو جنون الكتب وهو الاهتمام بالكتب حد النهم و (الببلوماني) لا يبدو طبيعياً حين يرى كتباً ويحتفظ بكل الكتب حتى التي ليس لها قيمة ثم أنه لو حصلت حريقة أو أي مصيبة أول حاجة ح يفكر في إنقاذ الكتب بعد داك يشوف التانيين.. والله جد.. عام 1990 حُكم على الأمريكي (ستيفن بلومبرج) بالسجن (42) عاماً، بعد أن اكتشفوا أنه قام بسرقة أكتر من (23) ألف كتاب.. ااي (23) ألف.. المهم بعد داك أكتشف أنه مريض بالببلومانيا.. مغرم بالكتب حد الجنون ويعاملها ككنز ك روح.. والغريبة أن الببلومانيين قد لا يقرأون هذه الكتب التي يجمعونها.. لا والواحد ممكن يشتري كذا نسخة من نفس الكتاب.. والأخطر ما عندو أي حاجة لي أي زول في هذه الحياة. فنسأل الله السلامة.. #تتذكر موقف حلو بينك وبين زول وتقعد تبكي وتبكي وتستغفر لأنو الزول دا هسه ما موجود لسبب أو لأخر.. #تقريباً الأمهات كلهن بعملن الحركة دي، إنك تمشي وراها البيت كلو من غرفة لي غرفة ومن مطبخ لي هول وأنت بتتكلم معاها وفي النهاية (خشما دا ما بتفتحو معاك) ولا بتشتغل بيك الشغلة.. حارة والله.. #المشكلة يكون أصحابك كلهم بؤساء من برج النكد ومواضيعهم تسد النفس.. والله جد.. #حاجات كتيرة عندنا ليها مبررات وأسباب منطقية.. لكن لو زول سألنا منها بنحب نجاوب بعبارة : أنت مالك؟ و........ مالو قلبي لدواعٍ في بالي
